މީޓޫ މޫވްމަންޓް: ދުނިޔެ ބަދަލުކޮށްލި ހޭޝްޓެގެއް!

އަންހެންކުދިންނާއި އަންހެންކަނބަލުންނަށް ކުރެވޭ ތަފާތު ގޯނާތަކުގެ ވާހަކައަކީ މި ދުނިޔެއަށް އާ ވާހަކަތަކެއް ނޫނެވެ. އެ ވާހަކަތަކަކީ އޭގެ މައްޗަށް މުޅި ދުނިޔެ ލަދުވެތިވާންވީ ފަދަ އަމަލުތަކެއް ހިނގައިފައިވާ ވާހަކަތަކަކަށް ވީއިރު، ފަހަކަށް އައިސް ސޯޝަލް މީޑިޔާގެ ވަސީލަތްތަކުން އަންހެނުންނަށް ކުރެވޭ ގޯނާތަކުގެ ވާހަކަތައް ދައްކައި، އެކަމާއި މެދު ހޭލުންތެރި ކުރުމަށް ގިނަ މަސައްކަތްތައް ދަނީ ކުރަމުންނެވެ.

މިގޮތުން އެންމެ މުހިންމު އަދި މަގުބޫލު އެއް ހަރަކާތަކަށް ވާނީ މީޓޫ މޫވްމެންޓްއެވެ. ހޭޝްޓެގްއެއްގެ ސިފައިގައި މަގުބޫލުވެގެންދިޔަ މި ހަރަކާތުގައި ދުނިޔޭގެ ކަންކޮޅުތަކުގައި އަންހެނުންނަށް ކުރިމަތިވެފައިވާ ޖިންސީ ގޯނާއާއި ފުރައްސާރައިގެ ވާހަކަތައް، ބިރެއްނެތި ދަނީ ދައްކައި، މުޖުތަމައުގެ ތެރޭގައި ހެޔޮކަމުގެ ނިޣާބު އަޅައިގެން ތިބި އެތައް ބަޔެއްގެ ހަގީގީ ސޫރަ ދައްކަމުންނެވެ.

މި ހަރަކާތުގެ ހަގީގީ މޭސްތިރިއަކީ އެމެރިކާއަށް ނިސްބަތްވާ، އިންސާނީ ހައްގުތަކަށް ވަކާލާތު ކުރާ އެކްޓިވިސްޓެއްކަމުގައިވާ ޓަރާނާ ބާރކްއެވެ. ޓަރާނާގެ މި ހަރަކާތް ހަގީގަތުގައި ފެށިގެން ދިޔައީ ސޯޝަލް މީޑިޔާ ޕްލެޓްފޯމެއް ކަމުގައިވާ މައިސްޕޭސްއިންނެވެ.

މައިސްޕޭސްގައި އޭނާ ކުރަމުންދިޔަ ޕްރޮޖެކްޓެއްގެ ތެރެއިން ދިމާވި ކުއްޖަކަށް ޖިންސީ އަނިޔާ ލިބެމުންދިޔަކަން އެނގުމާއި އެކު އެކަމަށް ސަމާލުކަން ހޯދުމަށް، އެކުއްޖާ ބުނި ބަހެއްގެ މައްޗަށް ބިނާކޮށް، ހޭޝްޓެގް މީޓޫއާއި އެކު އެވާހަކަ ޓްވިޓަރއަށް އަޕްލޯޑްކުރިއެވެ.

އޭރު އެންމެ 500 ފޮލޯވަރުން ޓަރާނާއަށް ލިބިފައިވިޔަސް، އެ ހޭޝްޓެގް އިސާހިތަކު ވައިގައި ހިފައި، އޭގެ ޒަރިއްޔާއިން އެތައް ބަޔަކު އެމީހުންގެ ވާހަކަތައް ހިއްސާކުރިއެވެ.

މީޓޫ މޫވްމެންޓް ބޮޑަށް މަގުބޫލުވާން ފެށީ ހޮލީވުޑް އަދި ބޮލީވުޑް ފަދަ ބޮޑެތި އިންޑަަސްްޓްރީތަކުގައިވެސް، ފަރާތްތަކަށް ޖިންސީ ފުރައްސާރައާއި ގޯނާގެ ތުހުމަތު ކުރެވި، ހޫނުފެނަށް ވެއްޓިގެން ދިޔުމުންނެވެ.

ޓަރާނާ ފެއްޓި މި ހަރަކާތުން މަޝްހޫރު އެތައް ބަޔަކަށް ހިތްވަރު ލިބުނު އިރު، ޓަރާނާވެސް ޓައިމްސް މެގަޒިންގެ ކަވަރ ޕޭޖަށް، އެންމެ ނުފޫޒުގަދަ އެކަކުގެ ގޮތުގައި އަރުވައިދިނެވެ.

މިއަދު އެ ހޭޝްޓެގްވެފައިވަނީ ބޮޑު ހަރަކާތަކަށެވެ. އެތައް ބަޔަކު، އެބަޔެއްގެ ހައްގުގައި ކުރާ ހަނގުރާމައިގެ ވަރުގަދަ ހަތިޔާރަކަށެވެ. އެ ހުރިހާކަމެއްގެ ޝުކުރު ހައްގުވެގެންވަނީ ޓަރާނާާ ބާރކްއަށެވެ. ހަގީގީ ސުޕަރވުމެންއަށެވެ.