ރިސޯޓުތަކުން ޑޮލަރު މާރުކުރަންޖެހޭ ނިސްބަތް ދެ ގުނައަށް އިތުރުކޮށް، ކޮންމެ މަހަކު މާރުކުރަންޖެހޭ ގޮތް ހަދަނީ

ރިސޯޓުތަކަށް ލިބޭ ބޭރު ފައިސާގެ އާމްދަނީން 40 އިންސައްތަ ދިވެހި ބޭންކުތައް މެދުވެރިކޮށް މާރުކުރުން ލާޒިމުކުރާ ގޮތަށް ބޭރު ފައިސާގެ ޤާނޫނަށް އިސްލާހު ހުށަހެޅުމަށް ނިންމައިފައިވާ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު މިއަދު ވިދާޅުވެއްޖެއެވެ.

ރައީސް އޮފީހުގައި ތިން ވަޒީރަކާ އެކު ބޭއްވި ނޫސްވެރިންގެ ބައްދަލުވުމެއްގައި ގަވަރުނަރު ހާމަކުރެއްވި ގޮތުގައި މިހާރު ޤާނޫނުގައި 20 އިންސައްތައިގެ ގޮތުގައި ކަނޑައެޅިފައި އޮތް އެ ނިސްބަތް 40 އިންސައްތައަށް މަތިކުރުމަށް ރައްޔިތުންގެ މަޖިލީހަށް ހުށަހެޅުމަށް ވަނީ ތައްޔާރުވެފައެވެ.

މިހާރު ގެނެސްފައި އިން އިސްލާހަށް އިތުރު އިސްލާހެއް ގެންނަން މި މަސައްކަތް ކުރަނީ. ކުރީގައި އިން 20 އިންސައްތައިގެ ބަދަލުގައި 40 އިންސައްތައަށް އިތުރުކުރަން. އޭރުން އަޅުގަނޑުމެންނަށް މި ޓީޓީއަށް ދެވޭވަރު އިތުރުކުރެވޭނީ.

އެމްއެމްއޭގެ ގަވަރުނަރު އަހުމަދު މުނައްވަރު

ހަމައެއާ އެކު ކޮންމެ ތިން މަހަކުން ޑޮލަރު މާރުކުރުމަށް މިހާރު އޮންނަ މުއްދަތު ކޮންމެ މަހަކު މާރުކުރާ ގޮތަށް ބަދަލުކުރުންވެސް ހުށަހަޅާ އިސްލާހުތަކުގެ ތެރޭގައި ހިމެނެއެވެ.

ކުރިން އަޅުގަނޑުމެން އެބަދެން ތިންމަސްދުވަސް ފަތުރުވެރިކަމުން ލިބޭ އާމްދަނީ އެމްއެމްއޭއަށް މާރުކުރަން. މިހާރު ބަދަލުވެގެންދާނީ އެއްމަސްދުވަހަށް.

އެމްއެމްއޭގެ ގަވަރުނަރު އަހުމަދު މުނައްވަރު

މީގެ އިތުރުން އެމްއެމްއޭއަށް ޑޮލަރު މާރުކުރުމަށްފަހު، ބާކީ ހުންނަ ޑޮލަރު ހޭދަކުރާގޮތް މޮނިޓާކުރުން ރަނގަޅު ކުރުމަށް ނިންމަވާފައިވާ ކަމަށާ، އެކަން އެހެން ކުރަނީ ޑޮލަރުން އާމްދަނީ ލިބޭ ފަރާތްތަކުން ކަޅު ބާޒާރުގައި ޑޮލަރު ވިއްކާތީ ކަށް މުނައްވަރު ވިދާޅުވިއެވެ.

"ވަރަށް ދުވަސް ވަންދެން ދިރާސާކޮށްފައި އަޅުގަނޑުމެން މި ބަދަލުތައް މި ގެންނަނީ ޓޫރިޒަމަށް ވެސް ޝޮކް ވެސް އެބްސޯބް ވެސް ކުރެވޭ ވަރަށް ބަލާފައި މިހާ ދުވަސް ވަންދެން އޮތް މައްސަލައެއް ވީމާ. ބޭނުމަކީ %100 އަށް ވެސް ގެންދިޔުން" މުނައްވަރު ވިދާޅުވިއެވެ.

އެމްއެމްއޭގެ ގަވަރުނަރު އަހުމަދު މުނައްވަރު

ތަފާސްހިސާބުތަކަށް ބަލާއިރު ފަތުރުވެރިކަމުގެ އާމްދަނީ އާއި ބޭންކުތަކުގެ ޑިޕޮސިޓް އިތުރުވި ނަމަވެސް ތެލަށް ކުރާ ހޭދަ ދެ ގުނައަށް ބޮޑުވުމާ ގުޅިގެން ދައުލަތުގެ ރިޒާވް ވަނީ ދަށަށް ގޮސްފައެވެ.