ކަޅު ބާޒާރުގައި ޑޮލަރު ވިއްކާކަމަށް ފާހަގަކުރެވުނު ތަންތަން ބަލައި، އެއްތަން ބަންދުކޮށްފިން: މުނައްވަރު

ކަޅު ބާޒާރުގައި ޑޮލަރުގެ އަގު މަތިވަމުންދާ މައްސަލަ ހައްލު ކުރުމަށް ކުރަމުންދާ މަސައްކަތުގެ ތެރެއިން އެފަދަ ތަންތަން ބަލައި، އެތަނުން އެއްތަން މިހާތަނަށް ބަންދު ކުރެވިފައިވާ ކަމަށް އެމްއެމްއޭގެ ގަވަރުނަރު މުނައްވަރު ވިދާޅުވެއްޖެއެވެ.

ވަޒީރުންގެ މަޖިލީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މުނައްވަރު ވިދާޅުވީ، މެދު އިރުމަތީ ހަނގުރާމައިގެ ސަބަބުން ރާއްޖެއަށް ފަތުރުވެރިން އަންނަ ނިސްބަތް ދަށްވި ނަމަވެސް، ރާއްޖެއަށް ބޭރު ފައިސާ ވަންނަ ނިސްބަތް %1 އިތުރުވެފައިވާ ކަމަށެެވެ. އަދި ދަތި ތަކާއެކުވެސް ރާއްޖޭގެ ރިޒާވް މަތި ކުރެވޭތޯ ގިނަ މަސައްކަތް ތަކެއް ކުރެވެމުންދާކަންވެސް ފާހަގަކުރެއްވިއެވެ.

އެހެން ނަމަވެސް ފާއިތުވި މަހެއްހާ ދުވަހުގެ ތެރޭގައި ކަޅު ބާޒާރުގައި ޑޮލަރު ވިއްކާ އަގު ވަރަށް ބޮޑުތަނުން މައްޗަށް ޖެހިފައިވާ ކަމަށާ، އެކަން ފާހަގަ ވެގެން ދިޔައީ ފޮރެކްސް ގާނޫނުގެ ވާހަކަތައް ދާއިރާގެ ސްޓޭކްހޯޑަރުންނާއި އެހެނިހެން ފަރާތްތަކާއެކު ވާހަކަދައްކަވަމުން ދިޔުމުގެ ތެރޭގައި ކަމަށް އޭނާ ފާހަގަ ކުރެއްވިއެވެ.

މިޑްލްއީސްޓް ކްރައިސިސްއާއެއްކޮށް ވަގުތީ ހީނަރުކަމެއް އައި ނަމަވެސް، އޯވާއޯލްކޮށް މިހާ ހިސާބަށް ދިޔައިރުވެސް އަޅުގަނޑުމެންނަކަށް ނުފެނޭ މިހާ ބޮޑަށް ރޭޓް މައްޗަށް ދާންވީ ސަބަބެއް. އެހެންވީމާ މީގައި އެބައުޅޭ ވަރަށް ބޮޑު ސްޕެކިޔުލޭޝަންތަކެއް.

މުނައްވަރު

އެކަން ފާހަގަކުރެވޭތީ، މަނީޗޭންޖަރުންގެ އޮޕަރޭޝަންތައް މޮނީޓާކުރެއްވި ކަމަށް މުނައްވަރު ވިދާޅުވިއެވެ. އަދި، ތަންފީޒީ އިދާރާ ތަކާއެކު ކުރެވުނު މަސައްކަތް ތަކުން، ޑޮރަލުން އާމްދަނީ ލިބޭ ފަރާތްތަކުން ކަޅު ބާޒާރުގައި ބޮޑު އަގުގައި ޑޮލަރު ވިއްކަމުންދާކަން ފާހަގަކުރެވުނު ކަމަށް އޭނާ ވިދާޅުވިއެވެ.

”އެހެންކަމުން ސަރުކާރަށް އަޅުގަނޑު ދަންނަވާފައި ވާނީ ގާނޫނު ތަންފީޒުލުރުމަށްޓަކައި މިއަށް ބޭނުންވާ ތަހުގީގު ކުރިއަށް ގެންދިޔުމަށް. މިގޮތުން އަޅުގަނޑުމެންނަށް ފާހަގަކުރެވި، މިހާރުވަނީ އެއް މަނީ އެކްސްޗޭޖާ ބަންދުވެސް ކުރެވިފައި.“ މުނައްވަރު ވިދާޅުވިއެވެ.