ލިބޭނޭކަމަށް ލަފާކުރި އާމްދަނީގެ 80 އިންސައްތަ ލިބިއްޖެ: މާލީ ވުޒާރާ

މިހިނގާ 2025 ވަނަ އަހަރު ދައުލަތަށް ލިބޭނޭކަަށް ލަފާކުރި އާމްދަނީގެ ތެރެއިން 80 އިންސައްތަ އާމްދަނި ލިބިފައިވާކަމަށް މާލީ ވުޒާރާއިން ބުނެފިއެވެ.

ފިނޭންސް މިނިސްޓްރީން އާއްމުކުރި ވީކްލީ ފިސްކަލް ޑިވެލޮޕްމަންޓްސް ރިޕޯޓުން ދައްކާގޮތުގައި ހުސްވި ނޮވެމްބަރުމަހުގެ 20 ވަނަ ދުވަހުގެ ނިޔަލަށް ޖުމްލަ އާމްދަނީއާއި ހިލޭ އެހީގެ ގޮތުގައި ލިބިފައިވަނީ 33.5 ބިލިއަން ރުފިޔާ އެވެ. މިއީ 2024 ވަނަ އަހަރުގެ އެ މުއްދަތުގައި ލިބުނު އާމްދަނީ އާ އަޅާބަލާއިރު 9.5 އިންސައްތަ އިތުރުވުމެކެވެ. މިދިޔަ އަހަރުގެ އެ މުއްދަތުގައި އާމްދަނީގެ ގޮތުގައި 30.6 ބިލިއަން ރުފިޔާ ވަނީ ލިބިފައެވެ.

މިހާތަނަށް ލިބުނު ޖުމްލަ އާމްދަނީއާއި ހިލޭ އެހީގެ 75.2 އިންސައްތަ ލިބިފައިވަނީ ޓެކްސް އާމްދަނީގެ ގޮތުގައެވެ. 23.9 އިންސައްތަ ލިބިފައިވަނީ ޓެކްސް ނޫން އާމްދަނީގެ ގޮތުގައެވެ. ބަޖެޓްގައި މި ހިނގާ އަހަރަށް ލަފާކޮށްފައިވަނީ 39.7 ބިލިއަން ރުފިޔާ ލިބޭނެކަމަށެވެ.

ދައުލަތަށް ލިބުނު އާމްދަނީއަށް ބަލާއިރު ޓެކްސްގެ ގޮތުގައި ވަނީ 25.2 ބިލިއަން ރުފިޔާ ލިބިފައެވެ. ޓެކްސްގެ ގޮތުގައި ލިބުނު އާމްދަނީ އިތުރުވެފައިވަނީ، މައިގަނޑު ގޮތެއްގައި ޖީ.އެސް.ޓީ. އިތުރުވުމުގެ ސަބަބުންނެވެ. އަހަރުގެ މިހާތަނަށް ޖީއެސްޓީގެ ގޮތުގައި އެކަނިވެސް ވަނީ 13.7 ބިލިއަން ރުފިޔާ ލިބިފައެވެ. ޖީއެސްޓީއަށް ބަލާއިރު ޓޫރިޒަމް ޖީއެސްޓީގެ ގޮތުގައި 9.1 ބިލިއަން ރުފިޔާ ލިބިފައިވާއިރު، ގްރީން ޓެކްސްގެ ގޮތުގައި ވަނީ 1.9 ބިލިއަން ރުފިޔާ ލިބިފައެވެ.

ޓެކްސް ނޫން އާމްދަނީގެ ގޮތުގައި ލިބުނު އާމްދަނީ އިތުރުވެފައިވާއިރު، އެއަރޕޯޓް ތަރައްގީކުރުމަށް ނެގޭ ފީގެ ގޮތުގައި 1.3 ބިލިއަން ރުފިޔާ ލިބިފައިވާއިރު، ރިސޯޓު ބިމުކުލީގެ ގޮތުގައި ވަނީ 1.5 ބިލިއަން ރުފިޔާ ލިބިފައެވެ. އަހަރުގެ މިހާތަނަށް އާއިރު ޓެކްސް ނޫން އާމްދަނީގެ ގޮތުގައި ލިބުނު އަދަދުވަނީ 6.8 ބިލިއަން ރުފިޔާއިން 8.0 ބިލިއަން ރުފިޔާއަށް އިތުރުވެފައެވެ.