އިންތިހާބަށް ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރުން ހުއްޓުވުމަކީ އެންމެ އިސްކަންދޭ ކަންތައް: އޭސީސީ

ދައުލަތުގެ ވަޞީލަތްތައް އިންތިޚާބާއި ކައިރިކޮށް ނަހަމަ ގޮތުގައި ބޭނުން ކުރުން ހުއްޓުވުމަކީ މިވަގުތު އެންމެ އިސްކަމެއްދީގެން ކުރަމުންދާ މަސައްކަތްކަމަށް އެންޓި ކޮރަޕްޝަން ކޮމިޝަނުން ބެނެފިއެވެ.

ދައުލަތުގެ މIޑިއާގެ ރާއްޖެ މިއަދު ޕްރޮގުރާމުގައި ވާހަކަ ދައްކަވަމުން އެންޓި ކޮރަޕްޝަންގެ ކޮމިޝަންގެ ޑިރެކްޓަރ އޮފް ޕްރިވެންޝަން، އެޑިއުކޭޝަން އެންޑް އެޑްވޮކަސީ ޢަލީ ޝަމީމް އާދަމް ވިދާޅުވީ, އިންތިޚާބާއި ދިމާކޮށް ކޮރަޕްޝަނަށް މަގުފަހިވާ ގޮތަށް ކަންކަން ކުރާ ކަމުގެ މައްސަލަތައް އިތުރުވާކަމަށް އެކޮމިޝަނަށް ފާހަގަކުރެވޭކަމަށެވެ.

އެގޮތުން އެކަންކަން ހުއްޓުވުމަށް ހަރުދަނާ ފިޔަވަޅުތަކެއް އެޅުމުގެ މަސައްކަތް އޭސީސީއިން މިހާރު ކުރަމުންދާކަމަށެވެ. ޝަމީމް ވިދާޅުވީ އިންތިހާބާއި ކައިރިކޮށް ދައުލަތުގެ ވަސީލަތްތައް ނަހަމަ ގޮތުގައި ބޭނުން ނުކުރެވޭ ގޮތަށް ލާމަރުކަޒީ ޤާނޫނަށް ސަރުކާރުން ގެނެސްފައިވާ އިސްލާޙަކީ ރަނގަޅު އިސްލާޙެއް ކަމަށް އޭނާ ޤަބޫލުކުރައްވާކަމަށެވެ.

ރަށްރަށުގައި ހުރި ބިންތައް ކުއްޔަށް ދިނުމާއި، އެގްރިމެންޓްތައް އައު ކުރުމާއި، ވަޒީފާތައް ދިނުމާއި، މިކަހަލަ ކަންތައް ކުރެވިފައި ހުރީ. އެހެންވީމަ މި ޤާނޫނުގެ ސަބަބުން އެބައި ވަރަށް ބޮޑަށް މަދުވާނެ ކަމަށް މި ބެލެވެނީ

ޢަލީ ޝަމީމް އާދަމް

ކުރިއަށް އޮތް ލޯކަލް ކައުންސިލް އިންތިޚާބާއި ގުޅޭ މައުލުމާތު ދެއްވަމުން ޝަމީމް ވިދާޅުވީ، ކޮމިޝަނަށް ހުށަހެޅޭ މައްސަލަތަކުގެ ތެރެއިން އިންތިޚާބުތަކާއި ގުޅިގެން ދައުލަތުގެ ވަޞީލަތްތައް ނަހަމަ ގޮތުގައި ބޭނުން ކުރާ މައްސަލަ ވަރަށް ބޮޑަށް ފާހަގަކުރެވޭ ކަމަށެވެ. އެގޮތުން މީގެކުރިން އޭސީސީއަށް ހުށަހަޅާފައިވާ މައްސަލަތަކަށް ބަލާއިރު، ކައުންސިލު މެންބަރުންގެ ގޮތުގައި ތިއްބަވާ އެކި ފަރާތްތަކުން ކައުންސިލްތަކުގެ ވަޞީލަތްތަކާއި މަޤާމުތައް އިންތިޚާބުގައި ކާމިޔާބު ހޯދުމަށް ބޭނުން ކުރާކަން އެނގިފައިވާ ކަމަށެވެ.

ލާމަރުކަޒީ ޤާނޫނަށް އެންމެފަހުން އެންމެފަހުން ގެނައި އިސްލާޙަށް ޢަމަލުކުރަން ފަށާފައިވަނީ, މިދިޔަ އަހަރުގެ އޯގަސްޓް މަހުގެ ތެރޭގައެވެ. މި އިސްލާޙުގެ ދަށުން ކައުންސިލް ދައުރުގެ ފަހު އަހަރު ކައުންސިލްތަކަށް މުވައްޒަފުން ހަމަޖެއްސުމާއި، ކައުންސިލްތަކުގެ އިޙްތިޞާޞްގައި ހިމެނޭ ބިމާއި، ފަޅާއި، ފަރު ސަރަޙައްދު ކުއްޔަށް ދިނުމާއި، ކައުންސިލްތަކުގެ ތަރައްޤީގެ ޕްލޭންތަކުގައި ކަނޑައަޅާފައިނުވާ އާ ތަރައްޤީގެ މަޝްރޫޢުތައް ފެށޭނީ، މާލީ ކަންކަން ހިންގުމާ ބެހޭ ވުޒާރާއާއި ލޯކަލް ގަވަރމަންޓް އޮތޯރިޓީން ކަނޑައަޅާ އުސޫލުތަކާ އެއްގޮތްވާ ގޮތުގެ މަތިންނެވެ.

އޭސީސީއިން ބުނީ އިންތިޚާބާއި ގުޅިގެން އެކޮމިޝަނުން މިހާރު ކުރަމުންދާ އެންމެ މުހިންމު އެއް މަސައްކަތަކީ، މި ލާމަރުކަޒީ ޤާނޫނަށާއި، އިންތީޚާބީ ކުށްތަކަށް ދައުލަތުގެ އެކި އިދާރާތަކާއި ގުޅިގެން މީހުން ހޭލުންތެރި ކުރުމުގެ މަސައްކަތް ކަމަށެވެ. އެގޮތުން އިލެކްޝަން ކޮމިޝަނާއި ގުޅިގެންމިހާރުވެސް ބައެއް ރަށްތަކުގައި މިފަދަ ޕްރޮގްރާމްތައް ހިންގާފައިވާކަމަށާއި، އަދި ކުރިއަށް އޮތް ދުވަސްތަކުގައި ވެސް އާންމުން ހޭލުންތެރި ކުރުމަށް ގިނަ މަސައްކަތްތަކެއް ކުރުމަށް ރާވާފައިވާ ކަމަށް އެންޓި ކޮރަޕްޝަން ކޮމިޝަނުން ބުނެފައިވެއެވެ.