ހިރިމަރަދޫ ރައްޔިތުންނަށް ހަނިމާދޫގައި ގެ އަޅަން އެޗްޑީސީއާ ހަވާލުކޮށްފި

ހދ. ހިރިމަރަދޫ ރައްޔިތުންނަށް އެ އަތޮޅު ހަނިމާދޫގައި ގެ އަޅަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކޮށްފި އެވެ.

ތިލަދުންމަތީ ދެކުނުބުރީގެ މީހުން ދިރިއުޅޭ ރަށްރަށަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ފެއްޓެވި ދަތުރުފުޅުގައި އެ އަތޮޅު އެންމެ އާބާދީ މަދު ރަށްކަމަށްވާ، ހިރިމަރަދޫ ރައްޔިތުންނާ މިއަދު ވަނީ ބައްދަލު ކުރައްވާފަ އެވެ.

މި ބައްދަލުކުރެއްވުމުގައި ހަނިމާދޫއަށް ހިރިމަރަދޫން ހިޖުރަކުރާ ރައްޔިތުންނަށް ހާއްސަ ކުރެވިފައިވާ ސަރަހައްދުގައި ބޯހިޔާވަހިކަމުގެ މަޝްރޫއެއް ހިންގެވުމާއި، މުނިސިޕަލް ހިދުމަތްތައް ގާއިމްކުރެއްވުމުގެ ފްރޭމްވާކް އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ އާއި ހައުސިން ޑިވެލޮޕްމަންޓް ކޯޕަރޭޝަން ލިމިޓެޑާއި ދެމެދު ވަނީ ސޮއިކުރައްވާފަ އެވެ.

ހިރިމަރަދޫ ރައްޔިތުން ވަނީ އެ ރަށުން އެހެން ރަށަކަށް ބަދަލުވާން އެދިފަ އެވެ. އެގޮތުން ހަނިމާދޫއަށް ބަދަލުކޮށް ދޭން ރަސްމީކޮށް އެދިފަ އެވެ. އަދި އެކަން ކޮށް ދޭނެ ކަމަަށް ސަރުކާރުން ވަނީ ބުނެފަ އެވެ.

ހިރިމަރަދޫގެ ދުއިސައްތައެއްހާ ރައްޔިތުންނާއި ބައްދަލު ކުރައްވާ ރައީސް ވިދާޅުވީ ހިރިމަރަދޫގައި ގޯއްޗެއް އޮތް ކޮންމެ ރައްޔިތަކަަށް ހަނިމާދޫން ގޯއްޗެެއް ދެއްވާނެ ކަމަށާ އަދި އެ ގޯތީގައި ގެއެއްވެސް އިމާރާތް ކޮށް ދެއްވާނެ ކަމަށެވެ. މީގެ އިތުރުން އެމަނިކުފާނު ވަނީ ހަނިމާދޫއަށް އެ ރައްޔިތުން ބަދަލުވާއިރު ބަދަލު ފައިސާ ވެސް ދެއްވާނެ ކަމަށް ވިދާޅުވި އެވެ.

ރައީސް ވިދާޅުވީ ހިޖުރަކުރާ ރައްޔިތުންނަށް މިހާތަނަށް ދެމުން އައީ ނިސްބަތުން ކުޑަކުޑަ ފައިސާކޮޅެއް ކަަމަށެވެ. އެހެން ކަމުން ހިރިމަރަދޫ ރައްޔިތުންނަށް އެ ފައިސާ ދެއްވުމުގެ ކުރީން އެ އަދަދު މުރާޖައާ ކުރައްވާނެ ކަމަށެވެ.

ހިރިމަރަދޫ ރައްޔިތުން އެ ރަށުން ބަދަލުވާން އެދި ތަކުރާރުކޮށް ހުށައަޅާފައިވާކަން ފާހަގަ ކުރައްވާ ރައީސް ވިދާޅުވީ އެ ރައްޔިތުންނަށް ހަނިމާދޫއިން ހަމަޖައްސައިދޭ ގޯއްޗާއި އެ ގޯތީގައި ގެދޮރުއުޅުމާއި އެ ނޫން ވަސީލަތްތައް ގާއިމުކުރުމުގެ މަސައްކަތަށް އަވަހަށް އަވަހަށް ފައްޓަވާނެ ކަމަށެވެ. އެ މަސައްކަތް ފެށޭތާ 18 މަސްދުވަހުގެ ތެރޭގައި މުޅި މަސައްކަތް ނިންމާލުމަށް އަމާޒު ހިފާފައިވާ ކަމަށް ވެސް ރައީސް ވިދާޅުވި އެވެ.