މަންފާގެ ނަމާދު ވޯކްޝޮޕްގައި 150 ދަރިވަރުން، ބޮޑު ތަރުހީބެެއް

ދިވެހީންގެ ދީނީ ހޭލުންތެރިކަމަށް އެންމެ ފުޅާ ދާއިރާއެއްގައި މަސައްކަތް ކުރަމުންދާ "މަންފާ" ޖަމިއްޔާއިން މާލެ ސަރަހައްދުގައި ކުރިއަށް ގެންދާ ފުރަތަމަ ނަމާދު ވޯކްޝޮޕް ފަށައިފި އެވެ.

ހަތަރު ދުވަހުގެ މުއްދަތަށް މި ވޯކްޝޮޕް ކުުރިއަށް ގެންދަނީ އަހްމަދިއްޔާ އިންޓަނޭޝަނަލް ސުކޫލްގެ ހޯލްގަ އެވެ. މިއީ މާލެ ސަރަހައްދުގައި މަންފާއިން ކުރިއަށް ގެންދާ ފުރަތަމަ ނަމާދު ވޯކްޝޮޕެވެ. ނަމަވެސް އެ ޖަމިއްޔާއިން މިދިޔަ މަދު ދުވަސްކޮޅުގެ ތެރޭ ވަރަށް ގިނަ ރަށްރަށުގައި ވަނީ މިފަދަ ވޯކްޝޮޕްތައް ކުރިއަށް ގެންގޮސްފަ އެވެ.

މާލެ ސަރަހައްދުގައި ނަމާދު ވޯކްޝޮޕް ކުރިއަށް ގެންގޮސް ދިނުމަށް ވަރަށް ގިނަ ބެލެނިވެރީން ދިޔައީ މަންފާގައި އެދެމުންނެވެ. އެހެން ކަމުން މި ފަހަރު ސުކޫލު ބޮޑު ބަންދާއި ދިމާކޮށް އެ ޖަމިއްޔާ އިން އުމުރުން 8 އަހަރާއި 14 އަހަރާއި ދެމެދުގެ ކުދީންނަށް ޚާއްސަކޮށްގެން ނަމާދު ވޯކްޝޮޕް ކުރިއަށް ގެންދަން ނިންމާ އެކަމަށް ހުޅުވާލި އެވެ. ހުޅުވާލީ 100 ޖާގަ އަށެވެ. ނަމަވެސް ފުރަަތަމަ ދެތީން ދުވަސްތެރޭ އެ އަދަދަށް ވުރެ ގިނަ ކުދީން ކުރިމަތިލުމުން 150 ކުދީންނާއެކު ނަމާދު ވޯކްޝޮޕް ހަތަރު ދުވަހަށް ކުރިއަށް ގެންދަން ނިންމީ އެވެ.

ނަމާދު ވޯކްޝޮޕްގައި ކުދީންނަށް ކިޔަވައިދެއްވަނީ މަޝްހޫރު ދީނީ އިލްމުވެރިޔާ ޑރ. އިމްރާން މުހައްމަދު އަލީ އެވެ. މީގެ އިތުރުން އަލްއަޚް އަލީ ރަމީޒު, ބަންގި ސެޝަންވެސް ކުރިއަށް ގެންދާނެ އެވެ.

މަންފާއިން ބުނީ މި ވޯކްޝޮޕް ނިމިގެންދާއިރު ކުދީންނަށް އެނގިފައިވާ މިންވަރު ބެލުމަށް ވަކިވަކީން ކޮންމެ ދަރިވަރަކު އިމްތިހާނު ކުރެވޭނެ ކަމަށެވެ. މިފަހަރުގެ ވޯކްޝޮޕުން ފުރުސަތު ނުދެވުނު ދަރިވަރުންގެ ކިބައިން މާފަށް އެދެމުން އެ ޖަމިއްޔާއިން ބުނީ ދެން އަންނަ ކޮންމެ ސުކޫލު ބަންދެއްގައި މިފަދަ ޕްރަގްރާމްތައް މާލެ ސަރަހައްދުގައި ހިންގުމަށް ހާއްސަ އިސްކަމެއް ދޭނެ ކަމަށެވެ.

މީގެ އިތުރުން މަންފާ އިން ބުނީ އަގީދާ ވޯކްޝޮޕްތަކާއި އެ ނޫންވެސް ބައެއް މުހިންމު ވޯކްޝޮޕްތައް ހިންގުމަށް ރާވާފައިވާ ކަމަށެވެ.

މަންފާ އިން ގެންދަނީ މާލެ ސަރަހައްދާއި އަތޮޅުތަކުގައިވެސް ސިލްސިލާ ދަރުސްތަކާއި ދީނީ ހޭލުންތެރިކުރުމަށް ހާއްސަ މަސައްކަތްތަކެއް ކުރަމުންނެވެ. ހުރިހާ ރަށަކުން ވެސް މަންފާގެ ހަރަކާތްތަކަށް ބޮޑު ތަރުހީބެއް ލިބެ އެވެ.