ވަގުތީ ބޭނުމަކަށް އަސާސީ ހައްޤުތައް ހަނިކުރުމުން މުޅި ނިޒާމު ގަޑުބަޑުވެގެންދާނެ - ރައީސް ސާލިހު
ލިޔުންތެރިޔާ
ޝަފްރާޒް އަހްމަދު
މީގެ އިތުރުން ވަގުތީ ބޭނުމަކަށް ވިޔަސް، ރައްޔިތުންނަށް ލިބިގެންވާ އަސާސީ ޙައްޤުތައް ހަނިކުރުމުން މުޅި ނިޒާމު ގަޑުބަޑުވެގެންދާނެ ކަމަށާއި، މިއީ މި ސަރުކާރުން ވެރިކަން ކުރަން އެދޭ ގޮތް ނޫންކަމުގައި ރައީސުލްޖުމްހޫރިއްޔާ ވިދާޅުވެެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، އަރިއަތޮޅު އުތުރުބުރީ އުކުޅަހު ރައްޔިތުންނާ މިއަދު ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ސާލިހު މިހެން ވިދާޅުވެފައިވަނީ މިހާރު ރައީސް އުފައްދާފައިވާ ކޮރަޕްޝަނާއި ގޮތްނޭގޭ މަރުތަކަށް ހަދާފައިވާ ރިޔާސީ ދެކޮމިޝަނަށް ބޮޑެތި ބާރުތަކެެއް ލިބިދޭ ބިލް މަޖިލީހަށް ހުށަހަޅާފައިވަނިކޮށެވެ.
މީގެ އިތުރުން މި ސަރުކާރުން ކުރާ ކަންތައްތަކާ މެދު ފާޑު ކިޔުމުގެ ފުރުޞަތު އަބަދުވެސް ރައްޔިތުންނަށް އޮންނާނެކަމަށާއި، ނޫސްވެރިކަމުގެ މިނިވަންކަން މި ސަރުކާރުން އަބަދުވެސް ކަށަވަރުކޮށްދޭނެކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.
"ރައްޔިތުންގެ އަސާސީ ޙައްޤުތައް ކަށަވަރުކޮށްގެން ނޫނީ އަޅުގަނޑުމެން މިއެދޭ ދިވެހިރާއްޖެ ބިނާ ކުރެވޭނެ ކަމުގައި އަޅުގަނޑު ނުދެކެން. ރައްޔިތުން އެދޭ ގޮތަކީ ސަރުކާރު ނުރުހޭ ކަމެއް ކަމުގައި ވިޔަސް އެ ޚިޔާލާއި ފިކުރުގެ މައްޗަށް ބިނާކޮށް ރައްޔިތުންގެ އެއްވެސް ޙައްޤެއް ހަންޏެއް ނުކުރެވޭނެ. އެއީ ގޯހެއް" ރައީސުލްޖުމްހޫރިއްޔާ ވިދާޅުވިއެވެ.
މި ޖަލްސާގައި ރައީސުލްޖުމްހޫރިއްޔާވަނީ މި ސަރުކާރުން ކުރިޔަށް އޮތް ދުވަސްތަކުގައި ރާއްޖޭގެ ތަރައްޤީއަށް ކުރައްވަން ރާއްވަވާފައިވާ ބައެއް މަޝްރޫޢުތަކުގެ މައްޗަށް އަލިއަޅުއްވައިލައްވާ ވާހަކަފުޅުދައްކަވައިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
