މިޞްރާއެކު ވިޔަފާރީގެ ދާއިރާއިން ބިނާކުރަނިވި މަޝްވަރާތަކެއް ކުރެވުނު: ވަޒީރު
މިޞްރާއެކު ވިޔަފާރި އާއި އެހެނިހެން ދާއިރާތަކުން ބިނާކުރަނިވި މަޝްވަރާތަކެއް ކުރެވުނުކަމަށް ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވެއްޖެއެވެ.
މިކަން އެމަނިކުފާނު ފާހަގަކުރެއްވީ މިޞްރަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު "އެކްސް"ގައި ކުރެއްވި ޕޯސްޓެއްގައެވެ.
މިދިޔަ ހުކުރު ދުވަހު ފެއްޓެވި މި ދަތުރުފުޅުގައި، ޚާރިޖީ ވަޒީރު ވަނީ މިޞްރުގެ ޚާރިޖީ ވަޒީރު ޑރ. ބަދްރު ޢަބްދުލްލަޠީއާ ބައްދަލުކުރައްވާފައެވެ. މި ބައްދަލުވުމުގައި ވިޔަފާރި، އިންވެސްޓްމެންޓް، ފަތުރުވެރިކަން އަދި ތަޢުލީމީ ދާއިރާއިން ދެ ޤައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެވުނު ކަމަށް ވަޒީރު ވިދާޅުވިއެވެ. އަދި އެ ދަތުރުފުޅުގެ ތެރޭގައި، ޚާރިޖީ ވަޒީރު ވަނީ އަލް އަޒްހަރު އަލް ޝަރީފްގެ އިމާމު ޑރ. އަޙްމަދު އަލް ޠައްޔިބާއާވެސް ބައްދަލުކުރައްވާފައެވެ.
މި ބައްދަލުވުމުގައި ތަޢުލީމާއި ސަގާފަތުގެ ދާއިރާއިން ދެ ޤައުމުގެ ދެމެދުގައި އޮތް ގުޅުމުގެ މައްޗަށް އަލިއަޅުވާލެވުނު ކަމަށާއި، މިޞްރުގައި ކިޔަވާ ދިވެހި ދަރިވަރުންނާވެސް ބައްދަލުކުރައްވައި، އެ ދަރިވަރުންގެ ކަންބޮޑުވުންތަކަށް އަޑުއެއްސެވި ކަމަށް ވަޒީރު ވިދާޅުވިއެވެ.
މި ދަތުރުފުޅުގެ އެންމެ މުހިންމު އެއް ކާމިޔާބީގެ ގޮތުގައި ފާހަގަކުރެވެނީ ރާއްޖެއާއި މިޞްރާ ދެމެދު ސިޔާސީ ދާއިރާއިން އެހީތެރިކަން ފޯރުކޮށްދިނުމާ ގުޅޭ އެއްބަސްވުމެއްގައި ސޮއިކުރުމެވެ. މި އެއްބަސްވުމުގެ ސަބަބުން 2019 ވަނަ އަހަރު ދެ ޤައުމުގެ ދެމެދުގައި މި ދާއިރާއިން އެއްބާރުލުން ދިނުމަށް ކުރެވުނު މަސައްކަތްތައް ރަސްމީކަން ލިބިގެން ގޮސްފައިވާކަމަށް ޚާރިޖީ ވުޒާރާއިން ބުނެއެވެ.
ޚާރިޖީ ވަޒީރުގެ މި ދަތުރުފުޅުގައި އެމަނިކުފާނާއެކު ޚާރިޖީ ވުޒާރާގެ ސެކްރެޓަރީ ޑރ. ހާލާ ޙަމީދާއި އެޑިޝަނަލް ސެކްރެޓަރީ ޚަދީޖާ ނަޖީހާ ބައިވެރިވެވަޑައިގެންނެވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
