ފޮނި އެއްޗެހި ކާހިތްވާ ކުދިން ވާނެ މިވެސް ޓްރައި ކޮށްލަން!

ކޮންމެ ލޮނު އެއްޗެއް ކާލާފައި ފޮނި އެއްޗެއްގެ ރަހަ ބަލާލުމަކީ އާއްމުކޮށް އަހަރެެމެންގެ ތެރެއިން ގިނަ މީހުން ކުރާ ހިތްވާ ކަމެކެވެ. އެހެންކަމުން މިއަދުގެ ރެސިޕީ މި ޚާއްސަ ކޮށްލަނީ އެފަދަ ފަރާތްތަކަށެވެ. ހުތް ފޮނި ރަހައެއް ހުންނަ، މި ލެމަން ބަރ އަކީ ކިޔުންތެރިންނަށް ކަމުދާނެ އެއްޗެއް ކަމަށް އުއްމީދު ކުރަމެވެ.

ކްރަސްޓް ހެދުމަށް ބޭނުންވާ ތަކެތި

16 މޭޒުމަތީ ސަމުސާ ބަޓަރ (ރޫމް ޓެމްޕަރޭޗަރ ގައި)

1/2 ޖޯޑު ހަކުރު

1 1/2 ސައި ސަމުސާ ވެނީލާ އެސެންސް

2 ޖޯޑު ފުށް

1/4 ސައި ސަމުސާ ލޮނު

ލެމަން ފިލިން ހެދުމަށް ބޭނުންވާ ތަކެތި

7 ބިސް

2 1/2 ޖޯޑު ހަކުރު

2 މޭޒުމަތީ ސަމުސާ ލުނބޯ ތޮށި

1 ޖޯޑު ލުނބޯ ހުތް ( ދޮންވެފައި ހުރި ބޮޑެތި ލުނބޮލުގެ)

1 ޖޯޑު ފުށް

ކްރަސްޓް ތައްޔާރު ކުރާނެ ގޮތް

1) ބަޓަރ، ހަކުރު، ވެނީލާ އެސެންސް، ފުށް އަދި ލޮނު ތަށްޓަކަށް އަޅާލުމަށްފަހު ހޭންޑް މިކްސަރަކުން އެކުލަވާލާށެވެ.

2) ހިކި ފުށް ކޮޅުކޮޅު ނުހުންނަ ވަރަށް އެއްކޮށް ރީތިކޮށް އެކުލަވާ ލެވުމުން، ޓްރޭ އަކަށް އަޅާލުމަށްފަހު، 175 ޑިގްރީ ސެލްސިއަސްގައި 20-18 މިނެޓް ވަންދެން ނުވަތަ ރަން މުށިކުލަ އަރަންދެން ޕްރީ ހީޓް ކޮށްފައި ހުރި އަވަނަށް ލައި ފިހެލާށެވެ.

ފިލިންގ ތައްޔާރު ކުރާނެ ގޮތާ

1) ބޮޑު ތައްޓެއްގައި ހަކުރާއި ބިސް ހޭންޑް މިކްސަރުން ރަނގަޅަށް އެކުލަވާލާށެވެ.

2) ލުނބޯ ހުތާއި، ގާނާފައި ހުރި ލުނބޯތޮށި އަޅާލުމަށްފަހު، އެކުލަވާލާށެވެ.

3) ދެން އޭގެ ތެރޭއަށް ފުށް އެޅުމަށްފަހުވެސް ވަރަށް ރަނގަޅަށް އެކުލަވާލާށެވެ.

4) ކުރިން ފިހުނު ކްރަސްޓް ކުޑަ ކޮށް ހޫނުކޮށް ހުއްޓައި އޭގެ މައްޗަށް ފިލިން އަޅާލުމަށްފަހު އަވަނަށްލައި 175 ޑިގްރީ ސެލްސިއަސްގައި 30-40 މިނެޓް ވަންދެން ނުވަތަ ފިލިންގ ރޯފިލަންދެން ފިހެލާށެވެ.

5) ފިހެވުމުން އަވަނުން ނަގައި ހިހޫ ވުމުން މައްޗަށް ޕައުޑަރޑް ހަކުރު އެޅުމަށްފަހު ކާންވީއެވެ.