އާސަންދަ ލިބޭގޮތަށް އެހެން އެއާޕޯޓްތަކުންވެސް ބޭރަށް ފުރޭގޮތް ހަދަން މަޝްވަރާކުރެވެންޖެހޭ: ނާޒިމް

އާސަންދަ ލިބޭގޮތަށް އަތޮޅުތެރޭގެ އެއާޕޯޓްތަކުން ބޭރަށް ފުރޭނެ އިންތިޒާމެއް ހަމަޖެއްސުމަށް މަޝްވަރާ ކުރެވެން ޖެހޭކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވޮއިސްގެ ނޫސްވެރިޔާ ވަނީ، އާސަންދައިގެ ދަށުން އަތޮޅުތެރޭގެ އިންޓަރނޭޝަނަލް އެއާޕޯޓްތަކުން ރާއްޖެއިން ބޭރަށް ބޭސްފަރުވާއަށް ނުދެވޭތީ އެކަން ފާހަގަކޮށްފައެވެ.

މި ސުވާލުގެ ޖަވާބުގައި މިނިސްޓަރު ނާޒިމް ވިދާޅުވީ، އާސަންދައިގެ ދަށުން އަތޮޅުތެރޭގައި ގާއިމްކޮށްފައިވާ އިންޓަރނޭޝަނަލް އެއާޕޯޓްތަކުން ފުރޭގޮތް ހެދުމުގެ ސިޔާސަތެއް އެކުލަވާލުމަށް ކަމާބެހޭ ފަރާތްތައް އެކުވެ މަޝްވަރާތައް ބޭއްވުން އެއީ ވަރަށް މުހިންމު ކަމެއްކަމަށް ފާހަގަކުރައްވާފައެވެ.

އެއީ އަޅުގަނޑު ހިތުން ހެލްތު މިނިސްޓަރު އެކަނި މިތަނުގައި ހުރެފަ ދެވޭނެ ޖަވާބެއް ނޫން، އެއަށްވުރެ ބްރޯޑް ސުވާލެއް، ވަރަށް ރަނގަޅު ހިޔާލުފުޅެއް ތިދެއްވީ ޕޮލިސީ ލެވެލްގަ ޑިސްކަސް ކުރަން. އެއާ ގުޅޭ އެހެނިހެން ޓްރާންސްޕޯޓާއި، އާސަންދަ، ސޯޝަލްލް މިނިސްޓްރީ އާއި މިހުރިހާ ފަރާތްތަކެއް، ނުވާ ވަރުގެ ކަމެއް ނޫން ދެއްތޯ؟ އެހެންވީމަ ޑިސްކަސް ކުރަން ރަނގަޅު ޓޮޕިކެއް

މިނިސްޓަރު ނާޒިމް

މިހާރު އުސޫލްތައް އޮންނަގޮތުން އާސަންދައިގެ ދަށުން ރާއްޖެއިން ބޭރަށް ބޭސްފަރުވާކުރުމަށް މާލީ އެހީތެރިކަން ލިބެނީ ވެލާނާ އިންތަރނޭޝަނަލް އެއާޕޯޓުން ކުރާ ދަތުރުތަކަށެވެ. އަތޮޅުތެރޭގައި ޤާއިމްކޮށްފައިވާ ދެ އެއާޕޯޓަކުން ދިވެހިން އާސަންދައިގެ ދަށުން ބޭސްފަރުވާ ހޯދުމަށް ދާ ދެ ޤައުމަކަށް އިންޓަރނޭޝަނަލް ޝެޑިއުލް ދަތުރުތައް ކުރެެވެ.

އެގޮތުން ގަން އިންޓަރނެޝަނަލް އެއާޕޯޓުން ސްރީލަންކާއަށް ޝެޑިއުލް ދަތުރުތައް ކުރާއިރު، ހަނިމާދޫ އިންޓަރނޭޝަނަލް އެއާޕޯޓުން އިންޑިއާއަށް އުދުހުންތައް ބާއްވައެވެ. ނަމަވެސް އެ ދެ އަތޮޅުގެ ރައްޔިތުންވެސް އާސަންދައިގެ ދަށުން ބޭސްފަރުވާ ހޯދަން ރައްޖެއިން ބޭރަށް ފުރަން ދާންޖެހެނީ ވެލާނަ އިންޓަރނޭޝަނަލް އެއާޕޯޓުންނެވެ.

އާސަންދައިގެ ދަށުން އައްޑޫ ގަން އަދި ހަނިމާދޫ އެއާޕޯޓުން ބޭރަށް ނުފުރޭ މައްސަލައަކީ އެ ސަރަހައްދުތަކުގައި ދިރިއުޅެމުން އަންނަ ރައްޔިތުންގެ ވަރަށްބޮޑު ޝަކުވާއަކަށް ވެފައި އޮންނަ މައްސަލައެކެވެ.