ރާއްޖޭގެ އެންމެ އުތުރަށް ޓޫރިޒަމް ފުޅާކުރުމުގެ މަސައްކަތް ކުރިއަށް އެބަދޭ: ޠާރިޤް

ރާއްޖޭގެ އެންމެ އުތުރަށް ޓޫރިޒަމް ފުޅާކުރުމުގެ މަސައްކަތް ސަރުކާރުން ކުރަމުންގެންދާކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤް އިބްރާހިމް ވިދާޅުވެއްޖެއެވެ.

ހއ.މާރަންދޫގައި މިއަދު އޭޓީއެމްގެ ހިދުމަތް ފައްޓަވައިދެއްވުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ޠާރިޤް ވިދާޅުވީ މި ސަރުކާރުން ޓޫރިޒަމް ފުޅާކުރުމުގެ ސިޔާސަތުގެ ދަށުން ހއ އަތޮޅާއި، ހދ ގެ އިތުރުން ށ އަތޮޅުގައި ޓޫރިސްޓް ރިސޯތްތައް ތަރައްޤީކުރުމަށް ކުރަންޖެހޭ މަސައްކަތްތައް ކުރަމުްނގެންދާކަމަށެވެ. މިނިސްޓަރު ވިދާޅުވީ، ޓޫރިސްޓް އިންވެސްޓްމަންޓްތައް ޤާއިމްކުރެވިގެންދާއިރު، ރަށްރަށުގައި އޭޓީއެމްފަދަ، ބޭންކްގެ ހިދުމަތްތައް ލިބެންހުރުމަކީ، ވަރަށް ފަސޭހަވެގެންދާނޭ ކަމެއްކަމަށެވެ.

ޠާރިޤް ވިދާޅުވީ ރަށްރަށުގައި އޭޓީއެމްގެ ހިދުމަތް ލިބެންހުރުމަކީ، އެރަށެއްގެ ރައްޔިތުން ވަރަށް ބޭނުންވާ ހިދުމަތެއް ކަމަށާއި، ރަށުގައި އޭޓިއެމް ނެތްނަމަ މިހާރު އޮންނަގޮތަކީ ކިތަންމެ ކުޑަ އަދަދެއް ޖަމާކުރަންޖެހުނު ނަމަވެސް ނުވަތަ ނަގަންޖެހުނު ނަމަވެސް ހަރަދެއްކޮށްފައި އޭޓީއެމް ހުންނަ ރަށަކަށް ދިއުންކަމަށެވެ.

މިނިސްޓަރު ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސަތަކީ ރާއްޖޭގެ މީހުން ދިރިއުޅޭ ހުރިހާ ރަށެއްގައި މިއަހަރު ނިމުމުގެ ކުރިން އޭޓިއެމްގެ ހިދުމަތް ފެށުންކަމަށާއި، ރަށެއްގެ އިޤްތިސާދު ކުރިއަރައިގެންދާނީ، ވިޔަފާރީގެ ކަންކަމަށް ފަސޭހަވެގެންދާގޮތަށް ބޭންކިންގެ ހިދުމަތްވެސް ލިބެން ހުރެގެން ކަމަށެވެ.

ހދ.ހަނިމާދޫ އިންޓަރނޭޝަނަލް އެއާޕޯޓް ތަރައްޤީގެ މަޝްރޫޢު ތަރައްޤީކުރުމުގެ މަޝްރޫޢު ކުރިއަށްދާއިރު، މި މަޝްރޫޢުގެ ނިމުމުން އިތުރުގެ އަތޮޅުތަކުގެ ތަރައްޤީގެ ކަންކަން ބާރު ސްޕީޑެއްގައ ކުރިއަރައިގެންދާނޭކަމަށް ސަރުކާރުން ވަނީ ބުނެފައެވެ.