ބޭސްލިބުން ދަތިވީ ބޭހުގެ އަގު ކުޑަކުރުމާ ގުޅިގެން، ބޭސް ގެންނަ ފަރާތްތަކުން އެކަމަށް ދަތިކުރުމުން: ރައީސް ޑރ.މުއިއްޒު

ބޭސްލިބުން ދަތިވީ ބޭހުގެ އަގު އެސްޓީއޯ ރޭޓަށް ކުޑަކުރުމާ ގުޅިގެން, ބޭސް ގެންނަ އަމިއްލަ ފަރާތްތަކުން އެކަމަށް ދަތިކުރުމުންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިހެން ވިދާޅުވީ ދ.އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު އެއަތޮޅު މީދޫއަށް ކުރި ޒިޔާރަތުގައި މިރޭ އެރަށު ރައްޔިތުންނާ ބައްދަލުކޮށްލެއްވުމަށް ބޭއްވި ޖަލްސާގައި ވާހަކަދައްކަވަމުންނެވެ. ރައީސް ޑރ.މުއިއްޒު ވިދާޅުވީ، މެޑިކަލް މާފިޔާގެ ގޮތުގައި ފާހަގަކުރެވިފައިވާ ފަރާތްތަކަށް ރާއްޖެއަށް ބޭސް އެތެރެކޮށް އެ ބޮޑު އަގުގައި ވިއްކުމުގެ ފުރުސަތު ނުދެއްވާނޭ ކަމަށެވެ. ރައީސް މުއިއްޒު ވިދާޅުވީ، އަމިއްލަ ފަރާތްތަކުން މިހާތަނަށް ބޭސް އެތެރެކޮށް ވިއްކަމުންދިޔައީ 2000 އިންސައްތައާ ހަމަޔަށް ފައިދާލައިގެންކަމަށެވެ.

ރައީސް ވިދާޅުވީ އެފަރާތްތައް ދިޔައީ ބޭސް ބޮޑުއަގުގައި ވިއްކައިގެން ރައްޔިތުންގެ ޓެކްސް ފައިސާއިން ބޮޑު އަދަދެއް ނަގަމުން ކަމަށާއި މި ސަރުކާރުން އެސްޓީއޯ ރޭޓަށް ބޭހުގެ އަގު ކުޑަކުރުމުގެ ނަތީޖާއެއްގެ ގޮތުން ބޭސް ގެންނަ އެ ފަރާތްތަކުން ބޭސް ލިބުމުގެ މުއާމަލާތްތަކަށް ދަތިކުރިކަމަށެވެ. ރައީސް ވިދާޅުވީ މިފަހުން ބޭސް ލިބުމުގައި ދަތިތައް ކުރިމަތިވެގެން ދިޔައީ އެފަރާތްތަކުން އެކަމަށް ދަތިކުރުމުގެ ސަބަބުން ކަމަށެވެ. ރައީސް ވިދާޅުވީ ބޭސްލިބުމުގައި ދަތިކަމެއް ކުރިމަތިވީ ސަރުކާރުގެ ސަބަބުން ނޫންކަމަށާއި، އެކަން އެހެން އެދިމާވީ ބޭސް ގެންނަ ފަރާތްތަކުގެ އަމަލުތަކުގެ ސަބަބުންކަމަަށެވެ.

ބޭހުގެ މައްސަލައަށް ފިޔަވަޅު އަޅަން ފެށީމައި، އެއްހާސް އިންސައްތަ، ދެހާސް އިންސައްތަ ފައިދާލާފައި އާސަންދައިގެ ތެރެއިން ތިޔަބޭފުޅުންގެ ޓެކްސް ފައިސާއިން ބޭހުގެ ވިޔަފާރިކުރާ އެތައް ބަޔަކު ދިޔައީ ފައިސާ ނަގަމުން. އެއްހާސް އިންސައްތަ ދެހާސް އިންސައްތަ. އެއީ ބޮޑު އިސްރާފެއް. އަޅުގަނޑުމެން އެކަން ހައްލު މި ކުރީ. ޕްރައިޒް ކަޓްޑައުން ކުރީ. އެސްޓީއޯގެ ރޭޓަށް ތިރިކުރީ. ތިރިކުރީމަ މި ބޭސް ގެންނަ ފަރާތްތަކުން ދަތިކުރަންފެށީ. ދަތިކުރަން ފެށީމަ ބޭސް މަދުވީ. މިއީ ދިމާވި މައްސަލައަކީ

ރައީސް ޑރ.މުއިއްޒު ވިދާޅުވިއެވެ

ރައީސް ވިދާޅުވީ އެސްޓިއޯ މެދުވެރިކޮށް ބޭސް ގެނެސް ބޭސް ވިއްކުމުގެ ކަންކަން ކުރަމުންދާކަމަށާއި، މިގޮތުން މާޗްމަހުގެ 15 ވަނަ ދުވަހުން ފެށިގެން ކޮންމެހެން ބޭނުންވާ ބޭސްތައް އެއްވެސް ދަތިކަމެއްނެތި އެސްޓިއޯގެ ފާމަސީތަކުން ލިބެންފަށާނޭކަމަށެވެ. އަދި އޭޕްރިލްމަހުގެ 15 އިން ފެށިގެން އެމްއެފްޑީއޭއިން ޤަބޫލުކުރާ ހުރިހާ ބޭހެއް އެސްޓީއޯގެ ފިހާރަތަކުން ލިބެމުންދާނޭކަމަށްވެސް ރައީސް ވިދާޅުވިއެވެ.

ރާއްޖެއަށް ބޭސް ގެންނަ ފަރާތްތަކުން ބޮޑުއަގުގައި ވިއްކައި ރައްޔިތުންގެ ޓެކްސް ފައިސާއިން ހިތުހުރި އަދަދަކަށް ފައިސާ ނަގަމުްނދިޔަކަން ފާހަގަކުރައްވައި ރައީސް ވިދާޅުވީ، ރަށެއްގައި ކުޑަކުޑަ ބޭސް ފިހާރައެއް ހުޅުވާލާ މީހާވެސް އަހަރު ނުވަނީ ބޮޑެތި މަސްދޯނިފަހަރު ބަންނަކަމަށާއި އެއީ ހަޤީޤަތެއްކަމަށެވެ.

ރައީސް ވިދާޅުވީ މެޑިކަލް މާފިޔާ ނައްތާލައި ސަރުކާރުގެ ސިޔާސަތުގެ ތެރެއިން ބަލްކްކޮށް ބޭސް ގެންނަން ފެށުމުން ދައުލަތުގެ ބައިތުލްމާލުން ބޭހަށްކުރަންޖެހޭ ހޭދަ ކުޑަވުމުގެ ނަތީޖާއެއްގެ ގޮތުން އެފައިސާ އެހެން ކަންކަމަށް ބޭނުންކުރެވިގެންދާކަމަށެވެ. މިގޮތުން އެފަދަ ފިޔަވަޅުތަކުގެ ސަބަބުން ހަރަދުތަކުން ސަލާމަތްވާ 500 މިލިއަނެއްހާ ރުފިޔާ ތައުލީމަށާއި، ރައްޔިތުންގެ ތަރައްޤީގެ އެކި އެކި ކަންކަމަށް ބޭނުންކުރެވި އެ ހަރަދު އުފެއްދުންތެރި ގޮތެއްގައި ކުރެވިގެންދާކަމަށް ރައީސް ޑރ.މުއިއްޒުގެ ވާހަކަފުޅުގައި ފާހަގަކުރެއްވިއެވެ.