ކެޕްޓަނާއި ތިން ސްޓްރައިކަރުން ނުލައި ވެސް ޕީއެސްޖީން ބާސެލޯނާ ބަލިކޮށްފި

ޓީމުގެ އެންމެ މުހިންމު ތިން ކުޅުންތެރިންނާއި ކެޕްޓަން ނުލައި މިދިޔަ އަހަރުގެ ޗެމްޕިއަން ޕެރިސް ސެއިންޓް ޖަމަން (ޕީއެސްޖީ) އިން ބާސެލޯނާ 2-1ގެ ނަތީއްޖާއަކުން ބަލިކޮށްފިއެވެ.

ބާސެލޯނާގެ މޮންޓްޖުއިކް އޮލިމްޕިކް ސްޓޭޑިއަމްގައި ކުޅުނު އެ މެޗު ބާސެލޯނާއިން ފެށީ ވަރަށް ވަރުގަދަކޮށެވެ. އެގޮތުން ބާސެލޯނާގެ ފޯވާޑް ފެރާން ޓޮރޭޒްއަށް ގިނަ ހުސް ފުރުސަތުތަކެއް ލިބުނު ނަމަވެސް، އެ ފުރުސަތުތަކުގެ ބޭނުން އޭނާއަށް އެންމެ އެދެވޭ ގޮތެއްގައި ހިފޭގޮތް ވެފައެއް ނުވެއެވެ.

ނަމަވެސް މެޗުގެ 19 މިނެޓުގައި އަރިމަތިން ހުސްކޮށްލުމަށްފަހު ތިރިތިރން މާކަސް ރަޝްފޯޑު ދިން ބޯޅައިގެ ބޭނުން ހިފައި ޓޮރޭޒް މެޗުގެ ލީޑް ނެގިއެވެ.

އެ ގޯލަށް ފަހު ބާސެލޯނާ އަދި ޕީއެސްޖީން ވެސް ދިޔައީ ވަރަށް ބޮޑަށް ގޯލަށް ބާރުބޮޑު ކުރަމުންނެވެ. އެގޮތުން ޕީއެސްޖީގެ ފުލްބެކް ނޫނޯ މެންޑޭޒްގެ އެޓޭކްތައް ފާހަގަކުރެވުނެވެ. ނަތީއްޖާއެއްގެ ގޮތުން ނޫނާ މެންޑޭޒް ވާތްފަރާތުން ކުރިއަށް ދިއުމަށްފަހު، 19 އަހަރުގެ ސެނީ މަޔޫލޫއަށް ދިން ބޯޅައިގެ ބޭނުން ހިފައި ޕީއެސްޖީން މެޗުގެ ނަތީއްޖާ އެއްވަރުކުރުމެވެ.

ދެވަނަ ހާފު އެއްކޮށްހެން ކޮންޓްރޯލްކޮށްގެން ކުޅުނީ ޕީއެސްޖީންނެވެ. އެ ޓީމުން ވަނީ ގިނަ ފުރުސަތުތަކެއް ހޯދައި، ބާސެލޯނާގެ ގޯލަށް ވަރަށް ބޮޑަށް ބާރުބޮޑުކޮށްފައެވެ. އެ އެޓޭކްތައް އިތުރަށް ވަރުގަދަވީ މެޗުގެ 72 ވަނަ މިނެޓުން ދެ ޓީމުން ވެސް ކުރި ބަދަލުތަކާ އެކުއެވެ.

އެގޮތުން ޕީއެސްޖީން އެ ޓީމުގެ އެޓޭކަށް ގޮންޒާލޯ ރާމޮސް އަރުވައި،  މަޔޫލޫގެ ބަދަލުގައި ކޮރެއާގެ ލީކަންއިން އެރުވި ހިސާބުން އެ ޓީމުގެ އެޓޭކްތައް އިތުރަށް ވަރުގަދަވިއެވެ. އޭގެ ނަތީއްޖާއެއްގެ ގޮތުން މެޗުގެ 83 އިން ވަނަ މިނެޓުގައި ކަންގްއިންގެ ވަރުގަދަ ޝޮޓެއް ގޯލު ދަނޑީގައި ޖެހި ބޭރަށް ވެސް ނުކުތެވެ. މެޗުގައި ޕީއެސްޖީ މޮޅުވި މެޗު، މެޗުގެ 90 ވަނަ މިނެޓުގައި ކާމިޔާބުކޮށްދިނީ ގޮންސާލޯ ރާމޮސްއެވެ.

އޭނާ އެ ލަނޑު ޖަހައިފައިވަނީ މޮރޮކޯގެ ހުނަރުވެރި ފުލްބެކް، އަޝްރަފް ހަކީމީ ކަނާތްފަރާތުން ކުރިއަށް ގޮސް ތިރިތިރިން ދިން ބޯޅަ ގޯލު ތެރެއަށް ވައްދައިގެންނެވެ.

މި މެޗު ދެ ޓީމުން ވެސް ކުޅުނީ މުހިންމު ކުޅުންތެރިންތަކެއް ނުލައެވެ. އެގޮތުން ޕީއެސްޖީއަށް އެ ޓީމުގެ ކެޕްޓަން މާކިންހޯސް އާއި ކުރިޔަށް ކުޅޭ އަދި އެންމެ ފަހުގެ ބެލެންޑިއޯ ހޯދި އުސްމާން ޑެމްބެލޭ، ކްވިޗާ ކަވަރަސްކޭލިއާ އަދި ޑެސިރޭ ޑުއޭ އަނިޔާގެ ސަބަބުން ކުޅެފައެއް ނުވެއެވެ.

އަދި ބާސެލޯނާއަށް ބްރެޒިލްގެ ފޯވާޑް ރަފިނިއާ، ކީޕަރު ޖޯން ގާސިއާ އަދި ފާމިން ލޮޕޭޒް ވެސް އަނިޔާގެ ސަބަބުން ކުޅެފައެއް ނުވެއެވެ.

މެޗަށްފަހު ބާސެލޯނާގެ ކޯޗް ހާންސީ ފްލިކް ބުނީ ޕީއެސްޖީ މޮޅުވުން ހައްގު ކަމަށާއި، ރޭ ބާސެލޯނާގެ ފަރާތުން ފެނުނީ އެންމެ އެދެވޭ ކުޅުމެއް ނޫން ކަމަށެވެ.  ޕީއެސްޖީގެ ކޯޗް ލުއިސް އެންރީކެ އޭނާގެ ޓީމުގެ ހިތްވަރަށް ތައުރީފުކޮށް، ޚާއްސަކޮށް މަޔޫލޫގެ ކުޅުމަށް ތައުރީފުކޮށްފައެވެ.