އިސްރަށްވެހިންގެ ފުރަތަމަ ނާދީ ހުޅުވައިފި

ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވައުދުވެ ވަޑައިގެންނެވި ފަދައިން އިސްރަށްވެހިންގެ ފުރަތަމަ ނަދީ މިއަދު އެމަނިކުފާނާއި، އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު ހުޅުއްވައި ދެއްވައިފިއެވެ.

ރައީސް ޑރ.މުހައްމަދު މުއިއްޒު ވެރިކަމަށް ވަޑައިގަންނަވަން ވެގެން އަދި ވެރިކަމަށް ވަޑައިގެންނެވުމަށް ފަހުވެސް އެންމެބޮޑަށް ވެ ވަޑައިގެންނެވި އެއް ވައުދަކީ ޤައުމުގެ އިސްރަށްވެހިން ހަވާސާ ނުކުރައްވާނެކަމާއި، އެބޭފުޅުންނަށް ދޭންޖެހޭ ފުރިހަމަ ލޯތްބާއި ކުލުނު ދެއްވާނެކަމުގެ ވަޢުދެވެ.

އެގޮތުން އެމަނިކުފާނުގެ ވެރިކަމަށް 100 ދުވަސް ވުމުގެ ކުރިން މިއަދު މިވަނީ މުޖުތަމަޢުގައި އިސްރަށްވެހިންގެ ދައުރު ފުޅާކުރުމަށާއި، އެފަރާތްތަކުގެ ސިއްޙީ، ނަފްސާނީ އަދި އިޖުތިމާޢީ ދުޅަހެޔޮކަން އިތުރުކުރުމަށް މަގުފަހި ކޮށްދިނުމުގެ ގޮތުން އިސްރަށްވެހިންނަށް ހާއްސަ ނާދީއެއް ކުރީގެ ޤުރުއާނާއި ބެހޭ ޤައުމީ މަރުކަޒުގައި ހުޅުވައިދެއްވާފައެވެ.

މިއަދު މި ހުޅުވުނު އިސްރަށްވެހިންގެ ނާދީ ހުޅުވުމުގެ ރަސްމިއްޔާތުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. އައިޝަތު ޝިޙާމް ވިދާޅުވީ، މިއަދު ހުޅުވުނު ނާދީން، އިސްރައްވެހިންނަށް ދޭނެހިދުމަތްތައް ކަނޑައަޅާފައިވަނީ ސަރުކާރުގެ ކަމާއި ގުޅުންހުރި ހުރިހާ މުއައްސަސާއެއް ވާހަކަދައްކާ މަޝްވަރާކުރުމަށްފަހު އިސްރަށްވެހިންނަށް ބޭނުންވާނެ އެންމެ ރަނގަޅު ޚިދުމަތްތައް ބައްލަވައިގެން ކަމަށެވެ.

"މި ނާދީ ވަނީ އުމުރުން ދުވަސްވުމުގެ ސަބަބުން ކުރިމަތިވެދާނެ ނުތަނަވަސްކަމަށް ހިތްހަމަޖެހުމެއް ލިއްބައިދޭނެ ތަނަކަށް. ގިނަ އިސްރަށްވެހިން މިތަނަށް އައިސް ޚިދުމަތް ހޯދުމަށް އެދެން. އުމުރުން ދުވަސްވުމުގެ ސަބަބުން އަމިއްލައަށް ނާދެވޭ މީހުންނަށް އެމީހުންގެ އާޢިލާ މީހުން މިތަނަށް ގެނެސްދިނުން އެދެން."

މިނިސްޓަރ ޑރ. އައީޝަތު ޝިހާމް ވިދާޅުވިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވީ މިއަދު މިހުޅުވުނު އިސްރަށްވެހިންގެ ފުރަތަމަ ނާދީން ، އިސްރަށްވެހިންނަށް ބޭނުންވާ ގިނަގުނަ ޚިދުމަތްތަކެއް ލިބިގެން ދާނެކަމަށެވެ.

އެގޮތުން ކޮންމެ  ހަފްތާއަކު 3 ދުވަހު ކަސްރަތު ޕްރޮގްރާމެއް ހިންގުމާއި، ހަފްތާއަކު އެއް ފަހަރު ކޯޗުން އައްޔަން ކޮށްގެން ކެރަމް، ޗެސް، ޓޭބަލް ޓެނިސްފަދަ ކުޅިވަރުތައް ކުޅެވޭނެ އިންތިޒާމް ތައް ކުޅިވަރާ ބެހޭ ވުޒާރާއިން ކުރިއަށް ގެންދާނެއެވެ. އަދި ކޮންމެ 3 މަހަކުން އެއްފަހަރު އިސްރަށްވެހިންގެ މެދުގައި ޚިޔާލުފާޅުކުރުމާއި، ތަޖުރިބާ ޚިއްސާކުރުމަށް އަދި ދުޅަހެޔޮ ޞިއްޙަތެއްގައި ދެމިހުރުމަށް ބޭނުންވާ މަޢުލޫމާތު ފޯރުކޮށްދިނުމާއި ހެލްތް ސްކްރީނިންގ ސެޝަންތައް ކުރިއަށް ގެންދިއުމަށް ނިންމާފައިވާކަމަށްވެސް މިނިސްޓްރީން ހާމަކުރައްވައެވެ.

މި ސަރުކާރުގެ ފުރަތަމަ"އިސްރަށްވެހިންގެ ނާދީ" ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ނައިބް އަލްއުސްތާޛް ހުސައިން މުޙައްމަދު ލަޠީފާއި ، ދައުލަތުގެ ވަޒީރުންނާއި، ސަރުކާރުގެ އިސްވެރިންނާއި އަދި އިސްރަށްވެހިން ބައިވެރިވެ ވަޑައިގެންނެވިއެވެ.