ކަރުހިއްކުން ފިލުވާލަން ބޯނެ ފެންފޮދެއް ހޯދަމުންދިޔަ ޣައްޒާގެ ކުޑަކުދިންތަކެއް ޝަހީދުކޮށްލައިފި

ޣައްޒާގެ ނޫސައިރާ ކޭމްޕުގައި ފެން ބަހާ ތަނެއްގައި، ބޯނެ ފެންފޮދެއް ލިބޭތޯ ހޯދަން ގޮސް ތިބި ކުޑަކުދިންނާއި، މީހުންނަށް އަމާޒުކޮށް ނިރުބަވެރި އިޒުރޭލުގެ ސިފައިން ދިން ވައިގެ ހަމަލާއެއްގައި 10 މީހުން ޝަހީދުވެއްޖެ އެވެ.

އިއްޔެ ހެނދުނު ދިން މި ހަމަލާގައި ޝަހީދުވި މީހުންގެ ތެރޭގައި ހަ ކުޑަކުދިން ހިމެނެ އެވެ.

މި ހަމަލާގައި ޝަހީދުވި ޢަބްދުالله ނަމަކަށް ކިޔާ ކުޑަ ފިރިހެން ކުއްޖާގެ ބައްޕަ، މަޙްމޫދު ޢަބްދުއްރަޙްމާން އަޙްމަދު ބީބީސީއަށް މަޢުލޫމާތު ދެމުން ބުނީ، އޭނާގެ ދަރިފުޅު ޢަބްދުالله އާއި އެހެން ކުޑަކުދިންވެސް ފެން ހޯދަން ކިޔޫގައި މަޑުކޮށްގެން ތިއްބައި، އެއްވެސް އިންޒާރެއް ދިނުމެއް ނެތި ވައިގެ ހަމަލާ ދީފައިވާ ކަމަށެވެ.

"އެ ސަރަޙައްދުގައި ތިބީ ގަތުލްއާއްމުގެ ސަބަބުން ހާލުގައި ޖެހިފައިވާ، ހަމަލާތަކުގެ ސަބަބުން ބޮޑެތި ތަކުލީފުތަކެއް އުފުލަމުންދާ ރައްޔިތުން. ޢަބްދުالله އާއި އެހެން ކުޑަކުދިންވެސް ތިބީ ކާއެއްޗެއް ނުކައި ހައިހޫނުކަންމަތީ، ފެންބޮވައި، ވަރަށްބޮށް ކަރުހިއްކައިގެންފައި." މަޙްމޫދު ބުންޏެވެ.

އިޒުރޭލުގެ މި ހަމަލާ ދިންތަނުގެ ވީޑިއޯއެއްވެސް އާއްމުވެފައިވާއިރު، އެ ވީޑިއޯއިން ފެންނަނީ ހަމަލާގެ ސަބަބުން އެއްކޮށް ހަލާކުވެފައިވާ އިމާރާތެއްގެ ދަށުގައި ރީނދޫ ކުލައިގެ ގިނަ ފެންއަޅާ ހަންތަކެއް ހުރި މަންޒަރެވެ. އަދި އަންހެނުން ރޮއެ ހަޅޭއްލަވަމުންދާ މަންޒަރާއި، މީހުން ކުޑަކުދިން އުފުލައިގެން ދުވަމުންދާ މަންޒަރުގެ އިތުރުން ވެއްޓިފައިވާ ބައެއް މީހުންނަށް އެހީތެރިވާން މަސައްކަތް ކުރާތަންވެސް ވީޑިއޯއިން ފެނެ އެވެ.

ނޫސައިރާތުގައި ހުންނަ އަލް-އަވްދާ ހޮސްޕިޓަލުން ބީބީސީއަށް މަޢުލޫމާތު ދެމުން ބުނީ، މި ހަމަލާގައި ޝަހީދުވި 10 މީހުންގެ ތެރޭގައި ހިމެނޭ ހަ ކުޑަކުދިންނަކީ އަބްދުالله އިތުރުން، ބަދްރުއްދީން ޤަރަމާން، ސިރާޖް ޚާލިދު އިބްރާހިމް، އިބްރާހިމް އަޝްރަފް އަބޫ އުރައިބާން، ކަރަމް އަޝްރަފް އަލް-ޣުސައިން އަދި ލާނާ އަޝްރަފް އަލް-ޣުސައިން ކަމަށެވެ. އަދި 16 މީހުން ޒަޚަމްވެފައިވާ ކަމަށްވެސް ހޮސްޕިޓަލުން ބުނެ އެވެ.

މި ހަމަލާއާ ބެހޭގޮތުން ހައްދުފަހަނައަޅާފައިވާ އިޒުރޭލުގެ އަސްކަރިއްޔާއިން އެމީހުންގެ ދިފާއުގައި ބުނީ، ހަމަލާ ދިނީ ފަލަސްތީނުގެ އިސްލާމިކް ޖިހާދުގެ "ޓެރަރިސްޓް“ އަކަށް އަމާޒުކޮށް ކަމަށާއި، ނަމަވެސް "ޓެކްނިކަލް މައްސަލައެއް ޖެހިގެން ބޮން އަމާޒު ކުރި ދިމާއަށްވުރެ ދިހަ މީޓަރެއް ދުރަށް" ވެއްޓުނު ކަމަށެވެ.

ނަމަވެސް، ޝަހީދުވި ޢަބްދުاللهގެ ބައްޕަ މަޙްމޫދު ބުނީ، އިޒުރޭލުން ބޭނުންވީ "ކަރުހިއްކައިގެން ތިބި މީހުންނަށް ފެންފޮދެއްވެސް ނުބޮވޭނެ ކަމުގެ މެސެޖެއް ދޭން" ކަމަށެވެ.

އދ. އިން ބުނާގޮތުގައި، ޣައްޒާގައި ފެނުގެ ދަތިކަން ވަނީ ވަރަށް ބޮޑުވެފަ އެވެ. އެއީ ފެން ސާފުކުރާ މެޝިންތަކާއި، ފެން ޕަންޕުކުރާ ނިޒާމުތަކަށް ބޭނުންވާ ތެލާއި، ބަދަލުކުރާ މުހިންމު ސާމާނު ނުލިބުމުގެ ސަބަބުންނެވެ. އަދި އިޒުރޭލުން ހިންގަމުންދާ ގަތުލްއާއްމު ތަކުގެ ސަބަބުން އެއްގަމު މަގުން އެއްވެސް އެއްޗެއް ނުފޯރާކަމީވެސް މައްސަލަ އިތުރަށް ގޯސްވެފައިވާ ސަބަބުތަކެވެ.

ނަތީޖާއެއްގެ ގޮތުން ގިނަ ބަޔަކަށް ދުވާލަކު ބޭނުންވާނެ އެންމެ ކުޑަ މިންވަރު ކަމަށްވާ 15 ލީޓަރުގެ ފެންވެސް ނުލިބެ އެވެ. އދ. އިން މި ޙާލަތު ސިފަކޮށްފައިވަނީ "ހަނަފަސްކަމުގެ ކާރިސާ" އެއްގެ ގޮތުގަ އެވެ.