716 ހެކްޓަރު ހިއްކައި، ރާއްޖޭގެ އެންމެ ބިން ބޮޑު ރަށަކަށް ރަސްމާލެ
ލިޔުންތެރިޔާ
ޚަދީޖާ އަރުފާ
މި ސަރުކާރުގެ ބޯހިޔާވަހިކަމުގެ އެންމެ ބޮޑު މަޝްރޫޢު، ރަސްމާލެ ހިއްކުމުގެ މަޝްރޫޢުގެ ދަށުން މިހާތަނަށް 716 ހެކްޓަރުގެ ބިން ހިއްކިފައިވާ ކަމަށް ހައުސިން މިނިސްޓްރީން ބުނެފިއެވެ.
މިއީ ރާއްޖޭގެ އެންމެ ބޮޑުރަށް، ލ. ގަމަށްވުރެ 107 ހެކްޓަރު ބޮޑު މިންވަރެކެވެ. ގަމުގެ ބޮޑު މިނަކީ 609 ހެކްޓަރެވެ.
ހައުސިން މިނިސްޓްރީގެ ޑެޕިއުޓީ މިނިސްޓަރު މުޙައްމަދު ނާޝިދު ވިދާޅުވި ގޮތުގައި ރާއްޖޭގެ ތާރީޚުގައި ހިންގާ ބިން ހިއްކުމުގެ އެންމެ ބިޔަ މި މަޝްރޫޢުގައި ޖުމްލަ 1,150 ހެކްޓަރު ހިއްކުމަށް ވަނީ ކަނޑައަޅައިފައެވެ. އަދި މުޅި މަޝްރޫޢުގެ 62 އިންސައްތަ ނިމިފައިވާ ކަމަށް އޭނާ ވިދާޅުވިއެވެ.
ރައީސް ޑރ. މުޙައްމަދު މުޢިއްޒުގެ ބޯހިޔާވަހިކަމުގެ ސިޔާސަތުގެ މައިގަނޑު ބައެއްގެ ގޮތުގައި ތަރައްޤީކުރާ މި އިކޯ ސިޓީން 25,000 ގޯތި ދޫކުރުމަށް ނިންމާފައިވާ އިރު ފުރަތަމަ ފިޔަވަހީގައި 15,000 ގޯތި ދޫކުރުމަށް ވަނީ ހަމަޖައްސައިފައެވެ.
ހައުސިން މިނިސްޓަރު ޑރ. ޢަބްދުالله މުއްޠަލިބު ކުރިން ވިދާޅުވެފައިވާ ގޮތުގައި ގޯއްޗަށް ހުށަހެޅި ފޯމުތައް އިވެލުއޭޓްކޮށް ނިމެންވާ އިރަށް ބިން ހިއްކުމުގެ ޢަމަލީ މަސައްކަތް އެއްކޮށް ނިންމައިލެވޭނެއެވެ. މާލެ ސަރަޙައްދުން ގޯއްޗާއި ފްލެޓް ލިބޭ ފަރާތްތަކުގެ ލިސްޓު އަންނަ ޑިސެމްބަރު މަސް ނިމުމުގެ ކުރިން ޢާންމުކުރުމުގެ މަސައްކަތް އެ ވުޒާރާއިން ދަނީ ކުރަމުންނެވެ.
"ބޯހިޔާވަހިކަން އެންމެނަށް" ސިޔާސަތުގެ ދަށުން މާލެ ސަރަޙައްދުން ފުރުޞަތު ހުޅުވައިލި މުއްދަތުގައި ޚާއްޞަ ޕޯޓަލް މެދުވެރިކޮށް 58,505 ފޯމު ވަނީ ހުށަހަޅައިފައެވެ. އެ ޢަދަދުގެ ތެރެއިން 35,930 ފޯމު ހުށަހެޅީ ފްލެޓަށް ކަމަށް ވާ އިރު ގޯއްޗަށް އެދި ހުށަހެޅި ފޯމުގެ ޢަދަދަކީ 22,575 އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
