"ހިޔާ އަލިނޫރު" އޮންލައިން ގުރުއާން މުބާރާތުގައި ބައިވެރިވުމުގެ ފުރުސަތު!

ހއ. ހޯރަފުށީ ހިޔާ ޖަމިއްޔާއިން ކުރިއަށް ގެންދާ 'އަލި ނޫރު' އޮންލައިން ގުރުއާން މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

ހޯރަފުށީގެ ކުދިންނަށް އަމާޒުކޮށްގެން ކުރިއަށް ގެންދާ މި މުބާރާތުގައި ބައިވެރިވުމުގެ ފުރުސަތު މިމަހު 15 ވަނަ ދުވަހުގެ 00:00 އާއި ހަމައަށް ވަނީ ހުޅުވާލެވިފައެވެ. އެގޮތުން، ގުރުއާން މުބާރާތުގައި ބައިވެރިވާން ބޭނުންވާ ފަރާތްތަކުން ފުރިހަމަ ނަމާއި، ގޭގެ ނަމާއި، އައިޑީކާޑު ކޮޕީއެއް، އަދި ބައިވެރިވާ އުމުރުފުރާ، 7741177 އަށް ވައިބާ އިން މެސެޖު ކޮށްލުމަށް އެދިފައިވެއެވެ.

މި ގުރުއާން މުބާރާތާއި ގުޅޭގޮތުން ވޮއިސް އަށް މަޢުލޫމާތު ދެއްވަމުން ހިޔާ ޖަމިއްޔާގެ ރައީސް އަބްދުالله އާތިފް ވިދާޅުވީ، މުބާރާތުގައި ތިން އުމުރުފުރާ އަކުން ބައިވެރި ވުމުގެ ފުރުސަތު ހުޅުވާލެވިފައިވާ ކަމަށެވެ. އެއީ؛

• 4 އަހަރާއީ 7 އަހަރުގެ އުމުރުފުރާ

• 8 އަހަރާއި 11 އަހަރުގެ އުމުރުފުރާ

• 12 އަހަރާއީ 16 އަހަރުގެ އުމުރުފުރާ

މި އުމުރުފުރާ ތަކުން 1 ވަނަ 2 ވަނަ އަދި ތިންވަނަ އަށް ހޮވޭ ފަރާތްތަކަށް ފައިސާގެ އިނާމް ދިނުމަށް ހަމަޖެހިފައިވާއިރު، މުޅި މުބާރާތުން ވެސް 1 ވަނަ 2 ވަނަ އަދި 3 ވަނަ އަށް އަންނަ ފަރާތްތަކަށް ވެސް ފައިސާގެ އިނާމް ދިނުމަށް ހަމަޖެހިފައިވާ ކަމަށް އާތިފް ވިދާޅުވި އެވެ.

އެގޮތުން، އުމުރުފުރާތަކުން 1 ވަނަ އަށް އަންނަ ފަރާތްތަކަށް 1000 ރުފިޔާ، 2 ވަނަ އަށް 500 ރުފިޔާ އަދި 3 ވަނަ އަށް 350 ރުފިޔާގެ ފައިސާގެ އިނާމް ދޭއިރު، މުޅި މުބާރާތުން 1 ވަނަ އަށް އަންނަ ފަރާތްތަކަށް 3000 ރުފިޔާ، 2 ވަނައަށް 2000 ރުފިޔާ އަދި 3 ވަނަ އަށް 1000 ރުފިޔާ ދިނުމަށް ހަމަޖެހިފައިވާ ކަމަށް އާތިފް މައުލޫމާތު ދެއްވައެވެ.

މީގެ އިތުރުން، މުބާރާތުގައި ބައިވެރިވާ ހުރިހާ ފަރާތަކަށްވެސް ބައިވެރިވި ކަމުގެ ފިލައެއް ދިނުމަށް ހަމަޖެހިފައިވާކަން އާތިފް ފާހަގަކުރެއްވިއެވެ.

މިއީ ހިޔާ ޖަމިއްޔާއިން ގެނެސްދޭ މިފަދަ ފުރަތަމަ ގުރުއާން މުބާރާތެވެ.