ޑައުން ސިންޑްރޯމް ހުންނަ ކުދިންނަށް އޯގާތެރިވުމަކީ ދީނީ އަދި އިންސާނީ ވާޖިބެއް: ރައީސް މުޢިއްޒު

ކީރިތި ޤުރުއާނާއި މާތް ނަބިއްޔާ ﷺ ގެ ސުންނަތުން ފެންނަން ހުރި އިރުޝާދުތަކުގައި، މުޖްތަމަޢުގެ ޚާއްޞަ އެހީތެރިކަމަކަށް ބޭނުންވެފައިވާ ކޮންމެ މީހަކާ މެދު އޯގާތެރިކަން އިސްކުރުމަށް ބާރުއަޅުއްވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދުނިޔޭގެ ޑައުން ސިންޑްރޯމް ދުވަހުގެ މުނާސަބަތުގައި މިއަދު އެކްސްގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ، އެފަދަ ފަރާތްތަކަށް އިޙްސާންތެރިވުމަކީ ބޮޑުވެގެންވާ ދަރުމައާއި އަޖުރު އެކަމުގައި އެކުލެވިގެންވާ ކަމެއް ކަމަށެވެ.

ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވި ގޮތުގައި، މުސްލިމަކަށް ވީތީ އަޅުގަނޑުމެންނަށް ކުރެވޭނެ އެންމެ ބޮޑު އެއް ހެޔޮކަމަކީ އަދި ދޫކުރެވޭނެ ދެމިހުންނަނިވި އެއް ޞަދަޤާތަކީ މުހުތާދުތަކުގައި ޖެހިފައިވާ ކޮންމެ އަޚަކާއި އުޚުތަކަށް އަޅައިލުން އިސްކުރުމެވެ. މިއީ ހަމައެކަނި ދީނީ ކަމެއްގެ އިތުރުން، އިންސާނިއްޔަތުކަމުގެ ރީތި ސިފައެއްގެ ގޮތުގައި އެމަނިކުފާނު ސިފަކުރެއްވިއެވެ.

ޑައުން ސިންޑްރޯމްގެ އެކި ޙާލަތްތައް ތަޙައްމަލު ކުރަމުންދާ ކޮންމެ ކުއްޖަކާއި މީހަކަށް ހެޔޮކޮށް ހިތުމަކީ މުސްލިމަކަށް ވީތީ އަދި އިންސާނަކަށް ވީތީ އަޅުގަނޑުމެން ކޮންމެ މީހެއްގެ ބޯމަތީގައި އޮތް ބޮޑު މަސްއޫލިއްޔަތެއް ކަމަށް ރައީސް ވިދާޅުވިއެވެ. މިފަދަ ފަރާތްތަކަކީ މުޖްތަމަޢުގެ އެހެން މީހުންނެކޭ އެއްފަދައިން އިޙްތިރާމާއި އޯގާތެރިކަން ޙައްޤުވާ ބައެއްކަން އެމަނިކުފާނު ހަނދާންކޮށްދެއްވިއެވެ.

މިއަހަރުގެ ދުނިޔޭގެ ޑައުން ސިންޑްރޯމް ދުވަހުގެ ޝިޢާރަށް އަލިއަޅުއްވާލައްވަމުން ރައީސް ވިދާޅުވީ، މިއަހަރުގެ މެސެޖަކީވެސް އެފަދަ އެއްވެސް ފަރާތެއް މުޖްތަމަޢުން ބާކީވެ އެކަހެރިވިޔަ ނުދިނުން ކަމަށެވެ. މުޖްތަމަޢުގެ ހުރިހާ ދާއިރާއެއްގައި އެފަދަ ކުދިންނާއި މީހުން ޝާމިލުކޮށް، އެމީހުންގެ ޤާބިލިއްޔަތުކަން ދެއްކުމުގެ ފުރުޞަތު ފަހިކޮށްދޭންޖެހޭކަން އެމަނިކުފާނު ފާހަގަކުރެއްވިއެވެ.

ސަރުކާރުގެ ސިޔާސަތުތަކާ ގުޅޭގޮތުން ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ވޭތުވެދިޔަ 28 މަސްދުވަހުގެ ތެރޭގައި އެފަދަ ފަރާތްތައް މުޖްތަމަޢުގައި ބައިވެރިކުރުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. އަދި ކުރިއަށް އޮތް ތަނުގައިވެސް އެންމެންނަށް ހަމަހަމަ ފުރުޞަތު އޮތް، އޯގާތެރި އަދި ޝާމިލް މުޖްތަމަޢެއް ބިނާކުރުމަކީ ސަރުކާރުން އެންމެ އިސްކަންދޭ އެއް ސިޔާސަތު ކަމުގައި އެމަނިކުފާނު ވިދާޅުވިއެވެ.