ރާއްޖެ ފުދުންތެރި އަމާން ރާއްޖެއަކަށް ހެދޭނީ މަދުވެގެން ދެ ދައުރު، ވެރިކަންކުރަން ދީގެން: ޢަބްދުއްރަހީމް

ދިވެހިރާއްޖެ ފުދުންތެރި އަމާން ރާއްޖެއަކަށް ހެދޭނީ އެ އިރެއްގައި ހުންނެވި ވެރިއަކަށް މަދުވެގެން ދެ ދައުރު، ވެރިކަންކުރަން ދީގެންކަމަށް ކޮންގްރެސް ޕާޓީގެ ޗެއާޕާސަން ޢަބްދުއްރަހީމް ޢަބްދުﷲ ވިދާޅުވެއްޖެއެވެ.

ކޮންގްރެސް ޕާޓީގެ މަތީ މަޖިލީހުގައި މިރޭ ވާހަކަދައްކަވަމުން، ރައްޔިތުން މަޖިލީހުގެ ރައީސްކަމުގެ މަގާމުވެސް ފުރުއްވަމުން އަންނަ ޢަބްދުއްރަހީމް ވިދާޅުވީ، ރާއްޖެއަށް މިވަގުތު ހަމަޖެހުމާއި ތަރައްޤީ އިންތިހާއަށް ބޭނުންވެފައިވާ ކަމަށެވެ. އަދި ރައްޔިތުންނަށް އަމާންކަމާއެކު ދިރިއުޅުމުގެ ފުރުސަތު ލިބި، ފުދުންތެރި ބަޔަކަށް ހެދޭނީ އެއް ވެރިއަކަށް މަދުވެގެން ދެ ދައުރުގެ ވެރިކަމެއް ދީގެން ކަމަށް ޤަބޫލުކުރައްވާ ކަމަށް އެމަނިކުފާނު ވިދާޅުވިއެވެ.

މި ޖަލްސާގައި ބައިވެރިވެވަޑައިގެންނެވި ކުރީގެ ރައީސް މުޙައްމަދު ނަޝީދަށް އިޝާރާތްކުރައްވައި ޢަބްދުއްރަހީމް ވިދާޅުވީ، ސިޔާސީ ޕާޓީތައް އުފައްދަނީ ވެރިކަން ކުރުމަށް ކަމަށާއި، ވެރިކަމުގައި ނެތް ނަމަވެސް ސަރުކާރު ޖަވާބުދާރީ ކުރުވަން ޖެހޭނެ ކަމަށެވެ. އަދި ރައީސް ނަޝީދު އެ ޖަލްސާއަށް ވަޑައިގެންނެވި ކަމަށްޓަކައި ޝުކުރު އަދާކުރެއްވިއެވެ.

ޢަބްދުއްރަހީމް އިތުރަށް ވިދާޅުވީ، ކޮންގްރެސް ޕާޓީން މަސައްކަތް ކުރަމުންދަނީ ދިވެހީންގެ ކަންކަން ނިންމުމުގެ ބާރު ދިވެހީންގެ އަތްމަތީގައި އޮންނަ، އަދި ބޭރުގެ އެއްވެސް ބަޔަކަށް ބަރޯސާނުވެ އަމިއްލަ ފައިމައްޗަށް ތެދުވެ ތިބި ފުދުންތެރި ރައްޔިތަކު ދިރިއުޅޭ "ދިވެހީންގެ ރާއްޖެ"އެއް ބިނާކުރުމަށް ކަމަށެވެ.

އެ ރާއްޖޭގައި އޮންނާނީ އަމާންކަން. އެ ރާއްޖޭގައި އޮންނާނީ ހިމޭންކަން. އެ ރާއްޖޭގައި އޮންނާނީ އަދުލު އިންސާފު. އެ ރާއްޖޭގައި އިރާދަކުރެއްވިއްޔާ އަނިޔާވެރިކަމަކަށް ޖާގައެއް ނޯންނާނެ. އެ ރާއްޖޭގައި ފިތުނަވެރިކަމަކަށް ޖާގައެއް ނޯންނާނެ،

ކޮންގްރެސް ޕާޓީގެ ޗެއާޕާސަން ޢަބްދުއް ރަހީމް ޢަބްދުﷲ

ދިވެހިން އަބަދުވެސް އެދެނީ ކާބަފައިން އުޅެމުން އައި އަމާން، ސުލްހަވެރި އަދި އެއްބައިވަންތަ ދިރިއުޅުން ކަމަށާއި، މާތްވެގެންވާ އިސްލާމްދީނުގެ ހިދާޔަތު މި ޤައުމުގައި އަބަދުމެ ދެމިއޮންނަންޖެހޭނެ ކަމަށް ވިދާޅުވިއެވެ. އަދި އެހެން ދީންތަކަށް މި ފަސްގަނޑުން ފުރުސަތު ދެވެން ނޯންނާނެ ކަމަށްވެސް އެމަނިކުފާނު ފާހަގަކުރެއްވިއެވެ.

ވާހަކަފުޅު ނިންމަވާލައްވަމުން ޢަބްދުއްރަހީމް ވިދާޅުވީ، މީގެ 900 އަހަރު ކުރިން ދިވެހިން ބަލައިގަތް އިސްލާމްދީނުގެ ހިޔާވަހިކަމުގައި ތިބެ، މިނިވަންކަމާއި ތަރައްޤީއާއެކު ޤައުމު ކުރިއަށް ގެންދިއުމުގެ ފުރިހަމަ ޤާބިލުކަމާއި ތަސައްވުރު އޮތް ހަމައެކަނި ޕާޓީއަކީ ކޮންގްރެސް ޕާޓީ ކަމަށެވެ.