މަޖިލީހުން އާއްމުކުރާ މެމްބަރުންގެ މާލީ ބަޔާން؛ ކުންފުނިތަކުން ސިޔާމަށް ލިބުނު އާމްދަނީ 6.6 މިލިއަން ޑޮލަރުގައި

ދ.މީދޫ ދާއިރާގެ މެންބަރު އަހުމަދު ސިޔާމް މުހައްމަދަށް އެއް އަހަރު ދުވަހުގެ ތެރޭގައި 6.6 މިލިއަން އެމެރިކާ ޑޮލަރާއި ފަސް މިލިއަނެއްހާ ދިވެހި ރުފިޔާ އާމްދަނީއާއި ޑިވިޑެންޑްގެ ގޮތުގައި ލިބިފައިވާކަން މާލީ ބަޔާނުން ދައްކައިފިއެވެ.

ވިހިވަނަ ރައްޔިތުންގެ މަޖިލީހުގެ މެންބަރުން ހުށަހެޅި ދެވަނަ އަހަރުގެ މާލީ ބަޔާންތައް އެ މަޖިލީހުގެ ވެބްސައިޓުގައި މިހާރު ވަނީ ޢާންމުކޮށްފައެވެ. މި ބަޔާންތަކުގައި ހިމެނެނީ 28 މެއި 2025 އިން 27 މެއި 2026 އާ ދެމެދުގެ މާލީ ތަފްސީލެވެ.

ޓޫރިޒަމްގެ ގިނަ ވިޔަފާރިތަކެއް ހިންގަވާ ސިޔާމްގެ ބަޔާނަށް ބަލާއިރު މަޖިލީހުގެ މެންބަރުކަމުން 604,567 ރުފިޔާ ލިބިފައިވާ އިރު ސަންސިޔާމް ގްރޫޕް އޮފް ކޮމްޕެނީސް އިން 6,540,194 ޑޮލަރު އާމްދަނީގެ ގޮތުގައި ލިބިފައިވެއެވެ. ހިއްސާގެ ފައިދާއަށް ބަލާ ނަމަ ބީއެމްއެލް އިން 1.3 މިލިއަން ރުފިޔާ ސިޔާމަށް ލިބިފައިވެއެވެ.

އެއާ އެކު ކޮމްޕެނީ ޑިވިޑެންޑްގެ ގޮތުގައި އިތުރު 54,000 ޑޮލަރު ވެސް ލިބިފައިވާ ކަމަށް އެ ބަޔާނުގައި ބަޔާންކޮށްފައިވެއެވެ.

މަޖިލީހުން އާއްމުކުރި މާލީ ބަޔާނުގައި ސިޔާމްގެ މާލީ ބަޔާނުގައި ބެންކް އެކައުންޓްތަކުގެ ތަފްސީލު ވެސް ހާމަކޮށްފައިވެއެވެ. އެ ގޮތުން ރާއްޖޭގައި ހަތަރު އެކައުންޓެއް ސްރީ ލަންކާގައި ދެ އެކައުންޓެއް އަދި ޔޫއޭއީގައި ދެ އެކައުންޓެއް ހުރި އިރު، އެ އެކައުންޓްތަކުގެ ޖުމްލަ ބެލެންސްގެ ގޮތުގައި 33.6 މިލިއަން ރުފިޔާ އާއި 1.9 މިލިއަން ޑޮލަރު ހުރި ކަމަށް ބަޔާންކޮށްފައިވެއެވެ.

މެންބަރުންގެ މާލީ ބަޔާން ހާމަކުރުމަކީ ކޮންމެ އަހަރަކު ވެސް ރައްޔިތުންގެ މަޖިލީހުން ކުރަމުން އަންނަ ކަމެކެވެ.