އަންނަ ހަފުތާގައި ޕާސްޕޯޓު ދޫކުރުން އާންމު ހާލަތަށް ގެންނާނެ ކަމަށް އިމިގްރޭޝަނުން ބުނެފި
ޕާސްޕޯޓު ބުކްލެޓުގެ އައު ސްޓޮކެއް ލިބި އަންނަ ހަފުތާގައި ޕާސްޕޯޓު ދޫކުރުމުގެ ހިދުމަތް އާންމު ހާލަތަށް ރުޖޫއަވާނެ ކަމަށް އިމިގްރޭޝަނުން ބުނެފިއެވެ.
ޖަރުމަންވިލާތުގެ ކުންފުނީގެ ޕްރިންޓިން މެޝިންތަކަށް ދިމާވި މައްސަލައެއްގެ ސަބަބުން ޕާސްޕޯޓު ބުކްލެޓް ސްޓޮކް ލިބުން ލަސްވެ މިދިޔަ އޮގަސްޓް މަހުގެ 28 ވަނަ ދުވަހުން ފެށިގެން ދިވެހި ޕާސްޕޯޓު ދޫކުރުމުގެ އުސޫލަށް އިމިގްރޭޝަނުން ވަނީ ބަދަލުތަކެއް ގެނެސްފައެވެ.
އެގޮތުން ފުރަތަމަ ބަދަލެއްގެ ގޮތުން، ރާއްޖޭގައި ތިބެގެން މުއްދަތު ހަމަވެފައިވާ ޕާސްޕޯޓު އައުކުރަން ހުށަހަޅާ ފަރާތްތަކަށް އައު ޕާސްޕޯޓެއް ހެދުމުގެ ބަދަލުގައި ކުރީގެ ޕާސްޕޯޓުގެ މުއްދަތު 2027 ޖޫން 30 ގެ ނިޔަލަށް އިތުރުކޮށްދިނުމަށް އެއިރު އިމިގްރޭޝަނުން ވަނީ ނިންމާފައެވެ.
މި ޚިދުމަތަށް އެއްވެސް ފީއެއް ނުނަގާނެ ކަމަށް އެ އިދާރާއިން ބުނެ، ދެވަނަ ބަދަލެއްގެ ގޮތުން އަލަށް ޕާސްޕޯޓު ހައްދާ ފަރާތްތަކުގެ ތެރެއިން އިންޑިއާ އާއި ސްރީލަންކާ ފަދަ ޤައުމުތަކަށް ކުރު މުއްދަތަށް ދަތުރުކުރާ ފަރާތްތަކަށް އެއް އަހަރު ދުވަހުގެ މުއްދަތުގެ އަށް ޞަފުހާގެ އިމަޖެންސީ ޕާސްޕޯޓެއް ހިލޭ ދޫކުރުމަށް ވަނީ ނިންމައިފައެވެ.
މި ޕާސްޕޯޓަކީ އިންޓަނޭޝަނަލް ސިވިލް އެވިއޭޝަން އޯގަނައިޒޭޝަން (އައިކާއޯ) ގެ މިންގަނޑުތަކާ އެއްގޮތް މެޝިން ރީޑަބަލް ޕާސްޕޯޓެކެވެ.
އެގޮތުން، މިދިޔަ އޮގަސްޓު މަހު އިމިގްރޭޝަނުން ހާމަކުރީ ސްޓޮކް ލިބުމަށް ގާތްގަނޑަކަށް މަހެއްހާ ދުވަސް ނަގާނެ ކަމަށެވެ. އެ މުއްދަތު މިދިޔަ ހަފުތާގެ އާދީއްތަ ދުވަހަށް ހަމަވީ އިރުވެސް ސްޓޮކް ލިބިފައެއް ނުވެއެވެ. ފާހަގަކޮށްލެވޭ ގޮތެއްގައި، އެ އިދާރާއިން އަދިވެސް ޕާސްޕޯޓު ދޫކުރަމުން ގެންދަނީ ހަމައެކަނި އިމަޖެންސީ ހާލަތްތަކުގައެވެ.
ނަމަވެސް، އިމިގްރޭޝަނުން މިހާރު އިއުލާނުކޮށްފައިވާ ގޮތުން އަންނަ ހަފުތާގައި ސްޓޮކް ލިބުމާ އެކު ޕާސްޕޯޓު ދޫކުރުމުގެ ހިދުމަތް ފުރިހަމައަށް އިއާދަވާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
