"ސިލޯނާއެކު ދިވެހީން" ޓެލެތޯންއަށް މިހާތަނަށް 10.7 މިލިޔަނަށްވުރެ ގިނަ ރުފިޔާ

ސްރީލަންކާއަށް ކުރިމަތިވި ތޫފާނުގެ ސަބަބުން އެ ގައުމަށް ކުރިމަތިވެފައިވާ ގެއްލުންތަކަށް އެހީތެރިކަން ފޯރުކޮށްދިނުމަށް ދިވެހި މީޑިއާތަކުން ފެށި ޚާއްސަ ޓެލެތޯނަށް މިހާތަނަށް 10.7 މިލިޔަނަށްވުރެ ގިނަ ރުފިޔާގެ އެހީ ލިބިއްޖެއެވެ.

އާދިއްތަ ދުވަހުގެ ހެނދުނު 9:00 ޖެހިއިރު ފެށި މި ޓެލެތޯން، 37 މީޑިއާއެކު، މިއަދުގެ މެންދުރު 2:00 ޖެހުމާއިހަމައަށް ވަނީ ކުރިއަށްގެންގޮސްފައެވެ. މި ޓެލެތޯން ކުރިއަށް ގެންދިޔުމަށް ފުރަތަމަ ނިންމާފައިވަނީ އާދިއްތަދުވަހުގެރޭ މެންދަމު 1:00 ޖެހުމާ ހަމައަސެވެ. ނަމަވެސް ގިން ބަޔަކަށް ބައިވެރި ވުމުގެ ފުރުސަތު ދިނުމުގެ ގޮތުން ހޯމަދުވަހުގެ މެންދުރުފަހު 2:00 ޖެހުމާއި ހަމައަށް ޓެލެތޯން ވަނީ ކުރިއަށްގެންގޮސްފައެވެ.

މިއަދުގެ މެންދުރު 14:00 ޖެހުމާއާ ހަމައަށް، ބީއެމްއެލްއިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް 10,722,660 ރުފިޔާ ވަނީ ލިބިފައެވެ. އޭގެތެރޭގައި ހިމެނެނީ 10،049،870 ރުފިޔާ އަދި 43،631 ޑޮލަރެވެ.

މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްތަކަށް އަދި ޓީވީ ބިލްޑިންގއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތު އަދިވެސް ވަނީ ހުޅުވާލާފައެވެ.