ރައީސް މުއިއްޒު، ރާއްޖޭގެ މެރިޓައިމް ދާއިރާއަށް އިންޤިލާބީ ބޮޑު ބަދަލެއް ގެނެސްދެއްވާނެ: ވަޖީހު
ރާއްޖޭގެ މެރިޓައިމް ދާއިރާއަށް އިންޤިލާބީ ބޮޑު ބަދަލެއް ރައީސުލްޖުމުހުރިއްޔާ ޑރ. މުހައްމަދު މުއިއްޒު ގެންނަވާނެކަމަށާ އެމަނިކުފާނަކީ އިގްތިޞާދީ މާހިރެއް ކަމަށް އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވެއްޖެއެވެ.
ވަޖީހު މިފަދައިން ވިދާޅުވީ ރައީސް ޑރ. މުއިއްޒު ލ. ފޮނަދޫ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުންނެވެ.
ވަޖީހު ވިދާޅުވީ ރައީސްގެ އިޤްތިސާދީ އެޖެންޑާގައި ހިމަނުއްވާފައިވާ ކަންކަމަކީ ރާއްޖެއަށް އިގްތިޞާދީ ބޮޑެތި ބަދަލުތަކެއް އަންނާނެ ކަންކަން ކަމަށާ މިއިން ޒަމާނަކު ރާއްޖޭގެ އިޤްތިސާދީ ކަންކަމާ މެދު ރައީސްއަކު ނުވިސްނާ މިންވަރަށް ރައީސް ޑރ. މުއިއްޒު ވިސްނާވާކަމަށެވެ.
"ދިވެހި ރާއްޖެ ލޮކޭޓްވެފައިވާ އޭރިއާ. މި އޭރިއާއަކީ ދުނިޔޭގެ އެކިކަންކޮޅުތަކުން ރެއަކާއި ދުވާލު އެތައް ބިލިއަން ޑޮލަރެއްގެ ވިޔަފާރި ދައުރުވަމުންދާ އޭރިއާއެއް. އެކަމަކު މިހާހިސާބައް އައިއިރު މިކަމުގެ މަންފާ ދިވެހި ރާއްޖެއަށް ހޯއްދަވައި ދެއްވުނު އެއްވެސް ރައީސަކު ނެތް. އެހެންވީމަ އަޅުގަނޑު ޤާބޫލު ކުރަނީ ރައީސް ޑރ. މުހައްމަދު މުޢިއްޒަކީ އިޤްtިޞާދީ މާހިރެއް ކަމަށް"
މުޙައްމަދު ވަޖީހު އިބްރާހިމް
މީގެ އިތުރުން، ރޭ ސޮއި ކުރެވިގެންދިޔަ ލ. އިންޓަގްރޭޓެޑް މެރިޓައިމް ހަބް މަޝްރޫޢު އާއި ގޫލޭ ގޮތުން ވާހަކަ ދައްކަވަމުން ވަޖީހު ވިދާޅުވީ، މަޝްރޫޢުގެ މަސައްކަތް ފެށުމުގެ ކުރިންވެސް އެ މަސައްކަތް ފެށުމަށް ބޭނުންވާ މާކެޓު ހޯދުމުގެ މަސައްކަތް އެކުންފުނިން ފަށާފައިވާ ކަމަށެވެ.
"މި މާކެޓު ކުރުމުގެ މަސައްކަތް އަޅުގަނޑުމެންގެ އެމްޕީއެލް މުވައްޒަފުން ވަނީ ފަށާފައި. އަޅުގަނޑު ޔަޤީން ކުރަނީ މިއިން ކޮންމެ މަސައްކަތެއް ނިމޭއިރު، މީގެ ޚިދުމަތް ވާނީ ފެށިފައި. ކަސްޓަމަރުން އަންނާނެއޭ ޔަޤީންކަމާއެކު އަޅުގަނޑުމެންގެ އާމްދަނީ އެދުވަހުން ފެށިގެން ލިބިގެންދާނެއޭ"
މުޙައްމަދު ވަޖީހު އިބްރާހިމް
މީގެ އިތުރުން ވަޖީހު ވަނީ ޓްރާންސްޝިޕްމެންޓް ބަނދަރަށް ދުނިޔޭގެ ބޮޑެތި ޝިޕިންގް ލައިނާ ލައިނާތައް ގެންނަން ބޭނުންވާ ކަމަށާ، އެއިން އެންމެ ޝިޕިންގ ލައިނާއަކުންވެސް ރާއްޖޭގެ އިޤްތިޞާދު ބަދަލުވެގެންދާނެކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
