ފުވައްމުލައް ކައުންސިލުން ރެސްޓޯރެންޓަކަށް ވާނުވާނޭނގި ފައިސާތަކެއްދިން މައްސަލައެއް

ފުވައްމުލައްސިޓީ ކައުންސިލުން ރެސްޓޯރެންޓަކަށް ވާނުވާނޭނގި ފައިސާތަކެއްދިން މައްސަލައެއް ފެންމަތިވެއްޖެއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ފުވައްމުލައް ސިޓީ ކައުންސިލް އިދާރާގެ 2023 ވަނަ އަހަރުގެ ކޮމްޕްލަޔަންސް އޮޑިޓް އަދި 2024 ވަނަ އަހަރުގެ މާލީ އޮޑިޓްގައި ބުނެފައިވަނީ، ކައުންސިލުން އެރަށުގައި ހުންނަ ރެސްޓޯރެންޓަކަށް 47،520 ރުފިޔާ އިތުރަށް ދީފައިވާކަމަށެވެ. ނަމަވެސް އެ ފައިސާ އިތުރަށް ދިން ގޮތެއް އޮޑިޓް ރިޕޯޓްގައި ބަޔާންކޮށްފައެއް ނުވެއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ފުވައްމުލައް ސިޓީ ކައުންސިލް އިދާރާގެ އޮޑިޓްގައި ވަނީ  2024 އަހަރުގެ ނިޔަލަށް ކައުންސިލް އިދާރާއަށް ލިބެންޖެހޭ ފައިސާގެ ތެރެއިން 4.3 މިލިއަން ރުފިޔާ ނުލިބި ވާކަމަށެވެ. މި ފައިސާގެ ތެރެއިން 2025 ވަނަ އަހަރު ލިބިފައިވާ 747،714 ރުފިޔާ އުނިކުރުމަށްފަހު 3.6 މިލިއަން ރުފިޔާ މިދިޔަ އަހަރުގެ ނިޔަލަށް ނުލިބިވާކަމަށް ރިޕޯޓްގައި ވަނީ ފާަހަގަކޮށްފައެވެ.

އޮޑިޓް ރިޕޯޓްގައި އާއްމުކޮށްފައިވާ މައުލޫމާތުކަށް ބަލާއިރު ނުލިބިވާ ފައިސާގެ ތެރޭގައި އެންމެގިނައިން ހުރީ، ކުއްޔަށް ނަގާފައިވާ ބިންތަކުން ލިބެންޖެހޭ ފައިސާއެވެ.

އޮޑިޓަރ ޖެނެރަލްގެ ރިޕޯޓްގައި ވަނީ މީގެ އިތުރުންވެސް ފައިސާގެ އިތުރު މައްސަލަތަކެއް ފާހަގަކޮށްފައެވެ. މީގެ ތެރޭގައި ޕާފޯމަންސް ގެރެންޓީގެ ގޮތުގައި ކައުންސިލް އިދާރާއަށް ނަގަންޖެހޭ 83،998 ރުފިޔާ ނެގުމުގެ ފުރުސަތު ގެއްލުމާއި، ޤަވާއިދާހިލާފަށް އެޓެންޑަންސް އެލަވަންސް ދިނުން ހިމެނެއެވެ.

މީގެ އިތުރުން ޓެލެކޮމިޔުނިކޭޝަންގެ ހިދުމަތްދިނުމަށް ދޫކޮށްފައިވާ ބިންތަކުގެ އެއްބަސްވުންތައް އާކޮށްފައި ނުވުމުން އެ ބިންތަކަށް ކުލި ދައްކަމުން ގޮސްފައިނުވާ މައްސަލަވެސް ފާހަގަކޮށްލެވެއެވެ.