ބަންގްލަދޭޝުން ރާއްޖެއަށް 20,000 ގަސް ހަދިޔާކޮށްފި

ބަންގްލަދޭޝް ސަރުކާރުން ރާއްޖެއަށް 20000 ގަސް ހަދިޔާކޮށް އިއްޔެ ހަވީރު ލޮނުޒިޔާރަތް ޕާކުގައި ބޭއްވި ރަސްމިއްޔާތެއްގައި ރަމްޒީ ގޮތުން ހަވާލުކޮށްދެއްވައިފިއެވެ.

ބަންގްލަދޭޝްގެ ފަރާތުން ގަސްތައް ހަވާލުކޮށްދެއްވީ އެ ޤައުމުގެ ޚާރިޖީ ވަޒީރު ޑރ. ޚަލީލުއްރަޚްމާނެވެ. ދިވެހި ސަރުކާރުގެ ފަރާތުން ޙަވާލުވެވަޑައިގެންނެވީ ޚާރިޖީ ވަޒީރު އިރުތިޝާމް އާދަމް އާއި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޢަލީ ޝަރީފެވެ.

ރަސްމިއްޔާތުގެ ތެރެއިން ތިން ވަޒީރުން ވެސް ވަނީ ލޮނުޒިޔާރަތް ޕާކުގައި ގަސް އިންދަވައިދެއްވައިފައެވެ. ހަވާލުކުރެއްވި ގަސްތަކުގެ ތެރޭގައި ހިމެނެނީ ހިޔާދޭ ގަހާއި މާ އަޅާ ގަހާއި މޭވާ ގަސް ކަމަށް ހާމަކޮށްފައިވެއެވެ. މީގެ ކުރިން ބޭރު ޤައުމަކުން ރާއްޖެއަށް އެންމެ ގިނައިން ހަދިޔާކޮށްފައިވަނީ ސްރީ ލަންކާއިން ދިން 1,000 ގަހެވެ.

ވަޒީރު ޢަލީ ޝަރީފް ވިދާޅުވީ ބަންގްލަދޭޝުން ގަސް ގެނައުމުގެ މަސައްކަތަށް އެ ޤައުމުގެ ތިމާވެށީގެ ވަޒީރާ އެކު މަޝްވަރާކުރައްވައި ކުރު މުއްދަތެއްގެ ތެރޭގައި އެ ކަން ކާމިޔާބުކޮށްފައިވާ ކަމަށެވެ. މިއީ ދެ ޤައުމުގެ ދެމެދުގައި އޮތް ގާތް ގުޅުން ރަމްޒުކޮށްދޭ ކަމެއް ކަމަށް ވިދާޅުވެ ރައީސް ޑރ. މުޙައްމަދު މުޢިއްޒު އިޢުލާނުކުރައްވާފައިވާ ފަސް އަހަރު ތެރޭގައި ފަސް މިލިއަން ގަސް އިންދުމުގެ ޕްރޮގްރާމަށް މި ހަދިޔާގެ ސަބަބުން އިތުރު ބާރެއް ލިބޭނެ ކަމަށް ވެސް ވިދާޅުވިއެވެ.

ޚާރިޖީ ވަޒީރު އިރުތިޝާމް އާދަމް ވިދާޅުވީ ތިމާވެށީގެ ރޮނގުން ދެ ޤައުމު ގުޅިގެން މުހިންމު މަސައްކަތްތަކެއް ކޮށްފައިވާ ކަމަށާއި ހަދިޔާކުރެއްވި ގަސްތަކުން ކުރިއަށް އޮތް ޖީލުތަކަށް ފައިދާ ކުރާނެ ކަމަށެވެ. ރަމްޒީ ގޮތުން ހަވާލުކުރެއްވި 10 ގަހަކީ ދެ ޤައުމުގެ ގާތް ގުޅުމުގެ ހެއްކެއް ކަމަށް ވެސް ވިދާޅުވިއެވެ.

ބަންގްލަދޭޝްގެ ޚާރިޖީ ވަޒީރު ޑރ. ޚަލީލުއްރަޚްމާން ވިދާޅުވީ ދެ ޤައުމަކީ ވެސް ތިމާވެށީގެ ބަދަލުތަކުގެ އަސަރު ބޮޑަށް ކުރާ ޤައުމުތައް ކަމަށާއި ހަދިޔާކުރެއްވި ގަސްތައް ރަމްޒުކޮށްދެނީ ދެ ޤައުމުން ވިލުންތެރިކަމާ އެކު ތިމާވެށި ޙިމާޔަތްކުރަން ކުރާ މަސައްކަތް ކަމަށެވެ. ބަންގްލަދޭޝަކީ ސަގާފީ ގޮތުން ވެސް އެކުވެރި ޤައުމުތަކަށް ގަސް ހަދިޔާ ކުރުމުގެ ތާރީޚެއް އޮތް ޤައުމެއް ކަމަށް ވެސް ވިދާޅުވިއެވެ.

ބަންގްލަދޭޝުން ހަދިޔާކުރި ތިން ބާވަތެއްގެ ގަސް ރާއްޖޭގެ އެކި ސަރަޙައްދުތަކުގައި އިންދުމުގެ މަސައްކަތް ކުރިއަށް ގެންދާނީ ރައީސް ޑރ. މުޢިއްޒުގެ ފަސް މިލިއަން ގަސް އިންދުމުގެ ޕްރޮގްރާމުގެ ދަށުންނެވެ.