ހަތަރު ރަށެއްގައި އަލަށް އާބާދުވި ސަރަހައްދުތަކަށް ފެނަކައިން ކަރަންޓުގެ ޚިދުމަތް ފޯރުކޮށްދީފި

ރާއްޖޭގެ ހަތަރު ރަށެއްގައި އަލަށް މީހުން ދިރިއުޅެން ފެށި ސަރަހައްދުތަކަށް ފެނަކައިން ކަރަންޓުގެ ޚިދުމަތް ގުޅައިދީފިއެވެ.

ކަރަންޓު ދިން ރަށްތަކުގެ ތެރޭގައި ހިމެނެނީ ލ. ފޮނަދޫ ހދ. ނޮޅިވަރަންފަރު ތ. ބުރުނި އަދި ތ. ތިމަރަފުށި ކަމަށް އެ ކުންފުނިން ބުނެފައިވެއެވެ.

ފޮނަދޫގެ އާ ސަރަހައްދަށް ކަރަންޓު ފޯރުކޮށްދިނުމުގެ މަސައްކަތް ޖޫން މަހުގެ ނިޔަލަށް ނިންމައި 80 ގޭބިސީއަކަށް ޚިދުމަތް ލިބޭ ގޮތް ހަމަޖައްސާފައިވާ އިރު ބުރުނީގެ އާ ސަރަހައްދުގައި ހިމެނޭ 48 ގޭބިސީއަކަށް ވެސް މިހާރު ކަރަންޓު ލިބެއެވެ.

ނޮޅިވަރަންފަރާއި ތިމަރަފުށީގައި ހުރި 100 ހައުސިން ޔުނިޓަށް ބޭނުންވާ ނެޓްވޯކް ފުޅާކުރުމުގެ މަސައްކަތް ނިމިދިޔަ އަހަރުގެ ތެރޭގައި ވަނީ ނިމިފައެވެ. އެ ގޮތުން ނޮޅިވަރަންފަރުގައި 825 މީޓަރުގެ ލޯ ވޯލްޓޭޖް ކޭބަލް ވަޅުލައި 12 ޑިސްޓްރިބިއުޝަން ފޮށި ހަރުކޮށްފައިވެއެވެ.

މީގެ އިތުރުން ރ. މާކުރަތާއި ރ. ވާދޫގެ އާ ސަރަހައްދުތަކަށް ކަރަންޓު ގެންދިއުމުގެ މަސައްކަތުގެ ބޮޑު ބައެއް ވެސް ނިމިފައިވާ ކަމަށާއި ބާކީ ހުރި ކަންކަން ވީ އެންމެ އަވަހަކަށް ނިންމައި ދާއިމީ ޚިދުމަތް ދޭން ފެނަކައިން މެދުނުކެނޑި މަސައްކަތް ކުރަމުންދާ ކަމަށް އެ ކުންފުނިން ބުނެފައިވެއެވެ.

ފެނަކައިން އަމާޒު ހިފާފައި ވަނީ އަލަށް އާބާދުވާ ރައްޔިތުންނަށް ދަތިކަމެއް ނެތި އަސާސީ ޚިދުމަތްތައް ފޯރުކޮށްދިނުމަށެވެ.