މިލަންދޫ ފަރަށް އެރި ޓަގު ބޯޓުގެ ވެރިފަރާތް 12 މިލިޔަން ރުފިޔާއިން ޖޫރިމަނާ!

ށ. މިލަންދޫ ފަރަށް މިދިޔަ އަހަރުގެ އޮކްޓޫބަރު 3 ގައި އުރުނު ޓަގު ބޯޓުގެ ވެރިފަރާތް 12 މިލިޔަނަށްވުރެ ގިނަ ރުފިޔާއިން ޖޫރިމަނާކޮށްފިއެވެ.

"ޝްވޭ ލިން ޔޯން"  (އައި އެމް އޯ: 9750488) ނަމަކަށް ކިޔާ މި ބޯޓަކީ އެޓޯލް ނެވިގޭޝަން ސަރވިސަސް ޕްރައިވެޓް ލިމިޓެޑްގެ އޭޖެންޓް ކަމުގެ ދަށުން ދިވެހިރާއްޖެ އައިސްފައިވާ ރިޕަބްލިކް އޮފް ނިޔޫގައި ރަޖިސްޓަރކޮށްފައިވާ ޓަގު ބޯޓެކެވެ.

މި އުޅަނދު 19 އޮކްޓޫބަރު 2024 ގައި ފަރުމަތިން ފުންކޮށް ނަގާފައިވާކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީ އޭއާރްއޭއިން ވިދާޅުވެފައިވެއެވެ. އަދި ފަރަށް ލިބުނު ގެއްލުންތައް ބެލުމުގެ ގޮތުން 7 އަދި 8 ނޮވެންބަރު 2024 ގައި އެ އުޅަނދު ފަރަށް އެރި ސަރަޙައްދުގައި، އެ އުޅަނދުގެ ވެރިފަރާތުން އައްޔަންކުރި ސަރވެޔަރުންނާއެކު ޖޮއިންޓް ސަރވޭއެއް ވަނީ ކުރެވިފައިކަމަށް ވެސް  އޭއާރްއޭއިން ވިދާޅުވިއެވެ.

މި ސާވޭގެ ތެރެއިން ހޯދުނު މައުލޫމާތުގައިވާ ގޮތުން އެ ފަރުގެ 477 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާކަން ފާހަގަކުރެވިފައިވާކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީ ވިދާޅުވިއެވެ.

އެހެންކަމުން އެންވަޔަރަންމަންޓަލް ރެގިއުލޭޓަރީ އޮތޯރިޓީއިން ވިދާޅުވީ ފަރުގެ މާހައުލަށް ލިބުނު ގެއްލުންތަކަށް އުޅަނދުގެ ވެރިފަރާތް ކަމުގައިވާ ސިންގަޕޫރުގެ ކުންފުންޏެއް ކަމަށްވާ ގްލޯހާ މެރިޓައިމް ޕްރައިވެޓް ލިމިޓެޑް 12,006,200.00ރ (ބާރަ މިލިޔަން ހަހާސް ދުއިސައްތަ) ރުފިޔާއިން ޖޫރިމަނާކޮށްފައިވާކަމަށެވެ. އަދި 30 ދުވަހުގެ ތެރޭގައި އެ ޖޫރިމަނާގެ ފައިސާ އެ އޮތޯރިޓީއަށް ދެއްކުމަށް 19 ނޮވެންބަރު 2025 ވަނަ ދުވަހު އަންގާފައިވާކަމަށްވެސް ވިދާޅުވިއެވެ.

ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނާއި ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން ރާއްޖޭގެ ފަރުތަކަށް ލިބޭ ގެއްލުންތަކަށް ޖޫރިމަނާ ކުރެވެއެވެ.