ރައީސް ޔާމީންގެ ސުވާލެއް: އިންޑިޔާ އައުޓް ހުއްޓުވަން ނެރުނު ގަރާރު، މިސަރުކާރުން ބާތިލް ނުކުރަނީ ކީއްވެތޯ؟

އިދިކޮޅު ޕާޓީއެއްގެ ގޮތުގައި އޮވެ ޕީޕީއެމާއި ޕީއެންސީން ހިންގި "އިންޑިއާ އައުޓް" ކެމްޕޭނުގެ ސަބަބުން ގައުމީ ސަލާމަތަށް ނުރައްކާވާ ކަމަށް ނިންމަވައި، އެކަން ހުއްޓުވުމަށް ކުރީގެ ރައީސް އިބްރާހިމް މުހައްމަދު ޞާލިހު ނެރުއްވި ގަރާރު، ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ މި ސަރުކާރުން ބާތިލު ނުކުރެވިގެން އުޅެނީ ކީއްވެގެންތޯ ކުރީގެ ރައީސް އަބްދުالله ޔާމީން އަބްދުލްގައްޔޫމް ރޭ ސުވާލު ކުރައްވައިފި އެވެ.

11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ރައީސް ޔާމީނަށް ސިޔާސީ ހަރަކާތްތަކުގައި ބައިވެރިވެވަޑައިގެންނެވުން މަނާ ކުރެވިފައިވީ ނަމަވެސް އެމަނިކުފާނ ގެންދަވަނީ އެ މަނިކުފާނު އުފައްދަވަން މަސައްކަތްކުރާ އާ ސިޔާސީ ޕާޓީ، ޕީޕަލްސް ނެޝަނަލް ފްރަންޓުގެ ސިޔާސީ ހަރަކާތްތަކުގައި ބައިވެރިވެވަޑައިގަންނަވަމުންނެވެ.

އެގޮތުން ރޭ ބޭއްވި ބައްދަލުވުމުގައި އެމަނިކުފާނު ވަނީ، ގިނަ ސުވާލު ތަކެއް ކުރައްވާފައެވެ.

އޭގެ ތެރެއިން އެއްބައި ސުވާލު އަމާޒު ކުރެއްވީ އިންޑިއާ އައުޓް ކެމްޕޭން މަނާ ކުރާ ގަރާރު އަދިވެސް ބާތިލުނުކުރާތީ އެކަމާއި ގުޅުވައި އެވެ.

އެގޮތުން ޔާމިން ވިދާޅުވީ، ސޯލިހް އެ ގަރާރު ނެރުއްވީ އިންޑިއާ ރުއްސަން ކަމަށެވެ. އަދި އެ ހަރަކާތް ކިތަންމެ ކުރިއަށް ގެންދަން ބޭނުންފުޅުވި ނަމަވެސް އެމަނިކުފާނަށް އެ ހަރަކާތް ހުއްޓާލަން ޖެހިވަޑައިގަތީ ސަލާމަތީ ހިދުމަތްތަކާ ކުރިމަތިލައްވަން ބޭނުންފުޅު ނުވާތީ ކަމަށް ވިދާޅުވި އެވެ.

"(އިންޑިއާ އައުޓް) އެ ހަރަކާތް އަޅުގަނޑުމެން ހުއްޓާލީ ސަލާމަތީ ބާރުތަކާއި އަޅުގަނޑުމެން ކްލޭޝް ވާން ބޭނުން ނުވާތީ،"

ކުރީގެ ރައީސް ޔާމީން އަބްދުލްގައްޔޫމް

ޔާމީން އިތުރަށް ވިދާޅުވީ އޭރު އިދިކޮޅުގައި ތިއްބެވީއިރުގައި އެއީ ގާނޫނާ ހިލާފު ގަރާރެއްކަމަށް މި ސަރުކާރުގެ ބޭބޭފުޅުން ވިދާޅުވި ކަމަށެވެ. އެހެން ކަމަށް ވީއިރު، މިހާރު އެ ގަރާރު ބާތިލް ނުކުރެވެންވީ ކީއްވެތޯ އެމަނިކުފާނު ވަނީ ސުވާލު ކުރައްވާފައެވެ.

"ކީއްވެގެންތޯއޭ މި ސަރުކާރަށް ވިތު ޖަސްޓް އަ ސްޓްރޯކް އޮފް ޕެން [ގަލަން ކުރި ޖައްސާލައިގެން] އެ ގަރާރު ބާތިލުކޮށް ނުލެވިގެން މިއުޅެނީ ކީއްވެގެންތޯ. "ބާތިލުކުރީމާ ދެއްތޯ މާދަމާ ވެސް އަޅުގަނޑުމެން ގޭގައި އިންޑިއާ އައުޓު ބެނާ ހުންނާނީ. އަދި އަޅުގަނޑުމެން އިންޑިއާ އައުޓްގެ މަސައްކަތުގައި މަގުމައްޗަށް ވެސް ނުކުމެވޭނީ. އެކަމަކު އަދިވެސް އެ ގަރާރު ބާތިލެއް ނުކުރޭ،"

ކުރީގެ ރައީސް ޔާމީން އަބްދުލްގައްޔޫމް

މިއާއެކު ޔާމީން ވަނީ ގާނޫނާއި ޚިލާފް ކަމަށް ބުނެ، 'ގޮވެލިފަތި ގޮވަމުން އައި ސަރުކާރަކަށް' ގަރާރު ބާތިލުނުކުރެވިގެން އުޅެނީ ކީއްވެތޯ ތަކުރާރުކޮށް ސުވާލު ކުރައްވާފައެވެ.

"މި ކަންކަމަށް ގޮވެލިފަތި ގޮވަމުން އައި ސަރުކާރެއް އަދިވެސް މިއުޅެނީ އެ ގަރާރު ބާތިލުކޮށްނުލައިގެން. ކޮބައިތޯއޭ މީގެ ސިއްރަކީ،" އެ މަނިކުފާނު ވިދާޅުވިއެވެ.

ރާއްޖޭގައި ތިބި އިންޑިޔާ ސިފައިން ބޭލުމަށް ރައީސް ޔާމީން އިސްވެ ހުންނަވައި، ކުރީ ސަރުކާރުގައި އިދިކޮޅުގައި އޮވެގެން ޕީޕީއެމް/ޕީއެންސީން ކުރިއަށް ގެންދިޔަ އިންޑިޔާ އައުޓް ހަރަކާތް ހުޓުވަން ކުރީގެ ރައީސް ސޯލިހް ގަރާރު ނެރުއްވާފައި ވަނީ އޭޕްރީލް 21، 2022 ވަނަ ދުވަހުއެވެ.

އެ ގަރާރުގައި ބަޔާންކުރައްވާފައި ވާގޮތުން އިންޑިއާ އައުޓް ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ގައުމީ ސަލާމަތާބެހޭ މަޖިލީހުން ކަނޑައަޅައިފައިވާ ކަމަށެވެ. އަދި އިންޑިއާ އައުޓް ކެމްޕޭނުގެ ސަބަބުން އިންޑިއާއާއި ރާއްޖެއާ ދެމެދު އޮތް ޒަމާންވީ ގުޅުމަށާއި، ރާއްޖޭގެ ތަރައްގީއަށާއި އަދި ސަރަހައްދުގެ ސަލާމަތާއި ހަމަޖެހުމަށް ހުރަސްއެޅިގެންދާ ކަމަށާ އެއީ އެންމެހާ ބައިނަލްއަގްވާމީ މުއާހަދާތަކާ ވެސް ދެކޮޅު ހަރަކާތެއް ކަމަށް ބުނެފައިވެއެވެ.

އެހެންކަމުން އެ ކެމްޕެއިނާ ގުޅޭ ހުރިހާ ހަރަކާތެއް ވަގުތުން ހުއްޓުވަން ސަލާމަތީ ހިދުމަތްދޭ މުއައްސަސާތަކަށް އަމުރު ވެސް ކުރެއްވި އެވެ. އެއާއެކު، އޭރު އެކި ތަންތަނުގައި ދަމާފައިހުރި އިންޑިޔާ އައުޓް ބެނާތައް ވަނީ ފުލުހުން ނުކުމެ ނަގާފައެވެ.