އިންޑިޔާއާއެކު ވެފައިވާ އެއްބަސްވުން ތަކުގެ ތެރެއިން ޑިފެންސްއިން ޒިންމާވާ އޮތީ 4 އެއްބަސްވުން: ޣައްސާން

ދިވެހި ސަރުކާރުން އިންޑިޔާއާއެކު ސަތޭކަ އެތައް އެއްބަސްވުން ވެފައިވާ ކަމަށާ، އެ އެއްބަސްވުން ތަކުގެ ތެރެއިން ދިފާޢީ ވުޒާރާއިން ޒިންމާވާ އޮތީ އެންމެ 4 އެއްބަސްވުން ކަމުގައި ދިފާޢީ ވަޒީރު ޣައްސާން މައުމޫން ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ވައިކަރަދޫ ދާއިރާގެ މެންބަރު ޙުސެއިން ޒިޔާދު ވަނީ، 2023 ވަނަ އަހަރުގެ ޑިސެމްބަރު މަހުގެ ތެރޭގައި ރައީސް އޮފީހުން ބޭއްވި ނޫސްވެެރިންގެ ބައްދަލުވުމުގައި، ދިވެހި ސަރުކާރާ އިންޑިޔާއާ ދެމެދު 100 އެތައް އެއްބަސްވުމެއް ވެފައިވާކަން ހާމަކޮށްފައިވާކަން ފާހަގަކުރައްވާފައެވެ.

”އެ އެއްބަސްވުންތައް ވަޒީރު ބައްލަވައިފިންތޯ؟ އަދި މިއިން އެއްވެސް އެއްބަސްވުމެއްގައި ގައުމުގެ ސިޔާދަތަށް ނުރައްކާވާ ވަރުގެ ކަމެއް އެބައޮތްތޯ؟ ރައީސް އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވިދާޅުވި ވަރަށް ބައިވަރު އެއްބަސްވުންތަކަށް ބަދަލުގެނެވުނު ވާހަކަ. އެ އެމެންޑްމަންޓް ގެނެވުނީ ކޮން ރަށެއްގައިތޯ؟ އަދި އެ އެއްބަސްވުންތަކުގައި ސޮއި ކުރެއްވީ ކޮންބޭފުޅުންނެއްތޯ؟“ މެންބަރު ހުސައިން ޒިޔާދު ސުވާލުކުރެއްވިއެވެ.

އެ ސުވާލަށް ޖަވާބު ދެއްވަމުން، ޣައްސާން ވިދާޅުވީ، 1965 ވަނަ އަހަރު ދިވެހި ރާއްޖެ މިނިވަންވީ ފަހުން، އިންޑިއާ އާއި ދިވެހި ރާއްޖެއާ ދެމެދު 100 އެތައް އެއްބަސްވުމެއްގައި ސޮއި ކުރެވިފައިވާ ކަމަށެވެ.

1965 ވަނަ އަހަރު ދިވެހި ރާއްޖެ މިނިވަންވީ ފަހުން، އިންޑިއާ އާއި ދިވެހި ރާއްޖެއާ ދެމެދު 100 އެތައް އެއްބަސްވުމެއްގައި ސޮއި ކުރެވިފައި އެބައޮތް. އެހެން ނަމަވެސް މިނިސްޓްރީ އޮފް ޑިފެންސް އިން ޒިންމާވާ އޮތީ 4 އެއްބަސްވުން. އެ އެއްބަސްވުންތައް ، ދެޤައުމުގެ ދެމެދުގައި އޮތް ގާތް ގުޅުމުގެ ތެރެއިން، ރާއްޖޭގެ މިނިވަންކަމާއި ސިޔާދަތާއި އިސްތިޤުލާލަށް އެއްވެސް ގެއްލުމެއް ނުވާ ގޮތަށް ބަދަލު ކުރުމުގެ މަސައްކަތްތައް ކުރެވި، އަދިވެސް ކުރެވެމުން އެބަދޭ.

ވަޒީރު ޣައްސާން މައުމޫން

އިންޑިޔާއާއެކު ވެފައިވާ އެއްބަސްވުން ތަކުގެ ތެރެއިން، ގައުމީ ސަލާމަތަށް ނުރައްކާވާގޮތަށް ހުރި އެއްބަސްވުންތައް ބަދަލުކޮށްފައިވާކަން ދާދިފަހުން ރައީސް މުޢިއްޒު ބޭއްވި ނޫސްވެރިންގެ ބައްދަލުވުމުގައުވެސް ވަނީ ހާމަކުރައްވާފައެވެ.