ތިނަދޫ މޭޔަރުގެ ޝަރީއަތް ފަށައިފި، ވަކީލަކު ހަމަޖައްސަން 10 ދުވަސް
ގދ. ތިނަދޫއަށް ސިޓީއެއްގެ ދަރަޖަ ދިނުމުގައި އެ ރަށުގެ އާބާދީ އޮޅުވާލި ކަމަށް ތުހުމަތުކުރެވޭ މައްސަލާގައި އެ ސިޓީގެ މޭޔަރު ސަޢުދު ޢަލީގެ މައްޗަށް ހިންގާ ޝަރީއަތް ފަށައިފި އެވެ.
ސައުދުގެ މައްޗަށް އޮތީ ދެ ދައުވާއެއް އުފުލާފަ އެވެ. އެއީ ރަސްމީ އިދާރާތަކަށް ދޮގު މައުލޫމާތު ދިނުމުގެ ދައުވާ އާއި ތަހުގީގަށް ހުރަސްއެޅުމުގެ ދައުވާ އެވެ. އެ ދެ ދައުވާގެ ޝަރީއަތް މިއަދު ކްރިމިނަލް ކޯޓްގައި ވަނީ ފަށާފަ އެވެ.
މިއަދުގެ އަޑުއެހުމުގައި ވަކީލަކު ހަމަޖައްސަން ސައުދަށް ވަނީ 10 ދުވަހުގެ މުއްދަތެއްދީފަ އެވެ.
ޤާނޫނުގައި ބުނެފައިވާ ގޮތުން ސިޓީއެއްގެ ދަރަޖަ ދެވެނީ އާބާދީ 10،000 ހަމަވުމުންނެވެ. ނަމަވެސް ތިނަދޫއަށް ސިޓީއެއްގެ ދަަރަޖަ ދިނީ އާބާދީ އޮޅުވާލައިގެން ކަމަށް ތުހުމަތު ކޮށްފައިވެ އެވެ. އަދިވެސް އެ ސިޓީގައި އެ އަދަދަށް ރައްޔިތުން ނެތް ކަމަށް ބުނެ އެވެ.
ނަމަވެސް މޭޔަރު ސައުދު ވަނީ އެ ތުހުމަތުތައް ދޮގުކުރައްވާފަ އެވެ.
ތިނަދޫ ސިޓީއެއްގެ ގޮތުގައި ކަނޑައެޅީ 2023 ވަނަ އަހަރުގެ އޮގަސްޓް 30 ގައި ރިޔާސީ އިންތިޚާބުގެ ކެމްޕެއިން ދުވަސްވަރު ރައީސް ޞާލިޙުގެ ވެރިކަމުގައެވެ. މި ސަރުކާރުން ވެސް ވަނީ އެ ނިންމުމަށް ބަދަލެއް ނުގެނެސް ދެމެހެއްޓުމަށް ނިންމައިފަ އެވެ.
ގަވާއިދާ ހިލާފަށް ބިންތަކެއް ދިން މައްސަލާގައި ތިނަދޫ މޭޔަރާއި ކުރީގެ މެންބަރުންނަށް ދައުވާ ކޮށްދޭން ވަނީ އެދިފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
