ހަފުތާ ނިމުމުގެ ކުރިން ބަޖެޓު ހުށަހަޅާނެ، އޭރަށް ބާކީ ހުރި މަޝްރޫއުތައް ފެށޭނެ: ރައީސް
މި ހަފުތާ ނިމުމުގެ ކުރިން މި އަންނަ އަހަރަށް ލަފާކުރާ ދައުލަތުގެ ބަޖެޓު މަޖިލީހަށް ހުށަހަޅުއްވާނެ ކަމަށާއި، އެ ބަޖެޓުން މިހާރު ސޮއިކޮށްފައިހުރި މަޝްރޫއުތަކާއި އަލަށް ފަށާ މަޝްރޫއުތަކުން ޖަގާ ލިބޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޅ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އޮޅުވެލިފުއްޓަށް ވަޑައިގެން އެ ރަށުގެ ރައްޔިތުންނާއި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ބޭނުންފުޅުވަނީ ވެވަޑައިގެންނެވި ވައުދުތަކުގެ އިތުރުން ވެސް، ރަށްތަކަށް ބޭނުންވާ ގިނަ ކަންތައްތަކެއް ވީހާ ވެސް އަވަހަކަށް ނިންމައިދޭން ކަމަށެވެ.
އެގޮތުން ޤާނޫނޫގައި ބުނާ ބަޖެޓު ހުށަހެޅުމުގެ ވަގުތު މިހާރު އައިސްފައިވާއިރު، މި ހަފުތާ ނިމުމުގެ ކުރިން އެ ބަޖެޓު ހުށަހަޅުއްވާނެ ކަމަށް ރައީސް ވިދާޅުވިއެވެ. އެގޮތުން ވައުދުތައް އަމަލީ ގޮތުން ފުއްދުމުގެ މަސައްކަތް ކުރަމުންދާނީ ދެ އަހަރަށް ބަހާލައިގެން ކަމަށާއި، އެހެންކަމުން އަންނަ އަހަރަށް ހުށަހަޅާ ބަޖެޓު ވާނީ ރައްޔިތުންނަށް ވީ ވައުދުތައް ފުއްދުމުގެ ބަޖެޓަކަށް ކަމަށް ރައީސް ވިދާޅުވިއެވެ.
އަދި އެ ބަޖެޓުގައި އެމަނިކުފާނު ވެވަޑައިގެންނެވި ވައުދުތަކުގެ ތެރެއިން މި އަހަރު އަމަލީ ގޮތުން މަސައްކަތް ފެށުމަަށް ސޮއިކުރެވުނު މަޝްރޫއުތަކާއި ދެން އިތުރަށް ވެސް ފެށުމަށް ނިންމައިފައިވާ މަޝްރޫއުތަކަށް ޖާގަ ދެއްވާނެ ކަމުގައި ރައީސް ވިދާޅުވިއެވެ.
ރާއްޖޭގައި ހުރިހާ ރަށެއްގައި އަޅުގަނޑުވެފައި ހުރި ވައުދުތަކުގެ ތެރެއިން، މި އަހަރު އަމަލީ ގޮތުން ސޮއިކުރެވިގެން މަސައްކަތް ފެށުނު މަޝްރޫއުތަކުގެ އިތުރަށް، ދެން ހުރި ވައުދުތައް ފުއްދަން ބޭނުންވާ ހުރިހާ މަޝްރޫއަކާއެކު މި އަންނަ އަހަރުގެ ބަޖެޓްގައި ޖާގަ އަޅުގަނޑުމެން ހަމަޖައްސާފައި ބަޖެޓް ހުށަހަޅާނީ
ރައީސް ޑރ. މުޙައްމަދު މުޢިއްޒު
އަންނަ އަހަރު ޤާނޫނު އަސާސީއަށް ގެނައުމަށް ނިންމައިފައިވާ ބަދަލުތަކުގެ ތެރެއިން އަތޮޅު ކައުންސިލުތައް އުވާލަން ނިންމައިފައިވާކަން ތަކުރާރުކުރައްވައި، އެ ކައުންސިލުތައް އުވާލުމުން ބަޖެޓުން ބާކީވާ ފައިސާ ރަށު ކައުންސިލުތަކަށް ބަހާލުމަށް ނިންމައިފައިވާކަމަށް ރައީސް ވަނީ މިއަދު ވިދާޅުވެފައެވެ. އެ ފައިސާ ރަށު ކައުންސިލްތަކުގެ ބަޖެޓުގައި ހިމެނުމަށް ފަހު، ވަކި އިޖުތިމާއީ ހިދުމަތްތަކަށް އެ ފައިސާ ހަރަދުކުރުމަށް ލާޒިމުކުރާނެ ކަމަށް ވެސް އެ މަނިކުފާނު ވިދާޅުވިއެވެ.
ރައްޔިތުންގެ ތެރޭގައި ތިބި، ވަލްނަރަބަލް ނުވަތަ އެހީ ބޭނުންވާ މީހުންނަށް، އެއީ ނުކުޅެދުންތެރިކަން ހުންނަ ފަރާތްތަކަށް ދޭން، ނުވަތަ އެމަޖެންސީ ކަންކަމަށް، މިފަދަ އިޖުތިމާއީ ހިދުމަތްތަކަށް ހޭދަކުރަން ލާޒިމުވާ ގޮތަށް ކައުންސިލްތަކަށް މި އިތުރުވާ ބަޖެޓް އަޅުގަނޑުމެން މި ހަމަޖައްސަނީ
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ އެކަމުގެ ސަބަބުން އެހެން އަަހަރުތަކާއި އަޅާބަލާއިރު، އަންނަ އަހަރުން ފެށިގެން ރަށު ކައުންސިލްތަކަށް ލިބޭ ބަޖެޓް އިތުރުވާނެ ކަމަށާއި، އެ އިތުރުވާ ބަޖެޓުން ކައުންސިލުތަކުން ހަރަދުކުރަމުން ދާނީ، އާންމު ރައްޔިތުންނަށް ދޭން ޖެހޭ އިޖުތިމާއީ ހިދުމަތްތަކަށް ޔަގީންކުރަން ކަމަށް ވެސް ރައީސް ވިދާޅުވިއެވެ.
އެގޮތުން ޤާނޫނުން ކައުންސިލުތަކަށް ލާޒިމުކޮށްފައި އޮންނަނީ ރައްޔިތުންނަށް ބޭނުންވާ އިޖުތިމާއީ ރައްކާތެރިކަން ފޯރުކޮށްދިނުން ކަމަށްވާއިރު، އެކަން މި ބަޖެޓުން ކުރެވޭނެ ކަން ކަށަވަރުކުރައްވާނެ ކަމަށް ރައީސް ވަނީ ވިދާޅުވެފައެވެ.
ރައީސް މިއަދު ޅ. އަދި ކ. އަތޮޅަށް ފެއްޓެވި ދަތުރުފުޅުގެ ތެރެއިން އެންމެ ފުރަތަމަ ވަޑައިގެންނެވި ރަށަކީ އޮޅުވެލިފުއްޓެވެ. އެއަށްފަހު އެ އަތޮޅުން ހިންނަވަރު، ނައިފަރު އަދި ކުރެންދޫ އަށް އެމަނިކުފާނު ވަޑައިގަންނަވާނެއެވެ.
އަދި މާލެ އަތޮޅުން ކާށިދޫ އަދި ދިއްފުށްޓަށް އެމަނިކުފާނު ވަޑައިގަންނަވާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
