އެމެރިކާގެ ހެލްތުކެއަރ ސީއީއޯއެއް މަރާލި މީހަކު މެރުމަށް ދައުލަތުން ކޯޓުގައި އެދެނީ

ޔުނައިޓެޑް ހެލްތްކެއަރގެ ސީއީއޯ ބްރަޔަން ތޮމްޕްސަން މަރާލި ކަމަށް ތުހުމަތުކުރެވޭ ލުއިޖީ މަންޖިއޯނީއަށް މަރުގެ އަދަބު ދިނުމަށް ޕްރޮސެކިއުޓަރުންނަށް އިރުޝާދު ދެއްވާފައިވާ ކަމަށް އެމެރިކާގެ އެޓަރނީ ޖެނެރަލް ޕަމް ބޮންޑީ ހާމަކޮށްފިއެވެ.

މިއީ އެމެރިކާގެ ރައީސް ޑޮނަލްޑް ޓްރަމްޕް މިއަހަރުގެ ޖެނުއަރީ މަހު ވެރިކަމާ ހަވާލުވިފަހުން، މަރުގެ އަދަބު ދިނުމަށް ޖަސްޓިސް ޑިޕާޓްމަންޓުން އެދުނު ފުރަތަމަ ފަހަރެވެ.

ތޮމްޕްސަން މަރާލި މައްސަލައިން ވިޔަފާރި ދުނިޔެ ސިހުނެވެ. އަދި ބައެއް އިންޝުއަރެންސް ކުންފުނިތަކުން ކުއްލިއަކަށް ރިމޯޓްކޮށް މަސައްކަތްކުރުމަށާއި ޙިއްޞާދާރުންގެ ބައްދަލުވުންތައް އޮންލައިންކޮށް ބޭއްވުމަށް ނިންމިއެވެ.

ފުލުހުން ބުނާ ގޮތުގައި މަންޖިއޯނީގެ ލިޔުންތަކުން ދައްކުވައިދެނީ އޭނާ އިންޝުއަރެންސް ކުންފުނިތަކާއި ދެކޮޅު ކަމެވެ.

"ލުއިޖީ މަންޖިއޯނީ ބްރަޔަން ތޮމްޕްސަން، ކުށެއް ނެތް، ދެ ކުޑކުދިންގެ ބައްޕައެއް މަރާލުމަކީ، ކުރިން ރޭވިގެން ހިންގި، ނުރައްކާތެރި، އެމެރިކާ ސިހުނު ޢަމަލެއް،" އެޓަރނީ ޖނެރަލް ބޮންޑީ އަންގާރަ ދުވަހު ނެރުނު ބަޔާނެއްގައި ވިދާޅުވިއެވެ. އަދި އިތުރަށް ވިދާޅުވީ ތޮމްޕްސަން މަރާލުމަކީ "ސިޔާސީ އަނިޔާވެރިކަމުގެ ޢަމަލެއް" ކަމަށެވެ.

"ފުންކޮށް ވިސްނުމަށްފަހު، އަޅުގަނޑު ވާނީ ފެޑެރަލް ޕްރޮސެކިއުޓަރުންނަށް މި މައްސަލައިގައި މަރުގެ އަދަބަށް އެދުމަށް އިރުޝާދު ދީފައި. މިއީ ރައީސް ޓްރަމްޕްގެ އެޖެންޑާ ކަމަށްވާ އަނިޔާވެރި ކުށްތައް ހުއްޓުވުމާއި އެމެރިކާ އަލުން ރައްކާތެރި ތަނަކަށް ހެދުމުގެ މަސައްކަތުގެ ތެރެއިން ކުރާ ކަމެއް،" ބޮންޑީ ވިދާޅުވިއެވެ.

ޓްރަމްޕްގެ ފުރަތަމަ ދައުރުގެ ފަހު ދުވަސްތަކުގައި އެތައް ބަޔަކަށް މަރުގެ އަދަބު ތަންފީޒުކުރެވުނެވެ. އަދި މަރުގެ އަދަބު އިތުރަށް ފުޅާކުރުމަށް ޓްރަމްޕް ވަނީ ހާމަކޮށް ވަކާލާތުކުރައްވާފައެވެ.

ނަމަވެސް ބައިޑެންގެ ދައުރު ނިމުމާ ކައިރިވަމުން އައި ދުވަސްވަރު، ފެޑެރަލް މަރުގެ އަދަބު ލިބިފައިވާ 40 މީހުންގެ ތެރެއިން 37 މީހެއްގެ އަދަބު އުމުރު ދުވަހުގެ ޖަލަށް ބަދަލުކުރެއްވިއެވެ.