ނަޝީދަށް ދިން ބޮމުގެ ހަމަލާގެ އިންކުއަރީ ރިޕޯޓަށް އަމަލުކުރަން އަސްލަމް އެދިވަޑައިގެންފި

ކުރީގެ ރައީސް އަދި މަޖިލީހުގެ ކުރީގެ ރައީސް މުހައްމަދު ނަޝީދަށް ދިން ބޮމުގެ ހަމަލާއާ ގުޅިގެން ރައްޔިތުންގެ މަޖިލީހުން ތައްޔާރުކުރި އިންކުއަރީ ރިޕޯޓަށް އަމަލުކުރުމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ގޮވާލައްވައިފިއެވެ.

ނަޝީދުއަށް ދިން ހަމަލާއަށް މިއަދު ވަނީ 3 އަހަރު ފުރިފައިވާއިރު، އެ މައްސަލާގައި މަޖިލީހުގެ 241 ކޮމިޓީން ކުރިއަށްގެންދިޔަ ޕާލިމެންޓަރީ އިންކުއަރީގެ ރިޕޯޓްގައި ވަނީ އެ މައްސަލާގައި 45 ރެކަމެންޑޭޝަނެއް ހުށަހަޅާފައެވެ.

އަދި މިއަދުގެ މަޖިލީހުގެ ޖަލްސާ ފަށްޓަވަމުން އެކަމާއި ގުޅޭގޮތުން ވާހަކަ ދައްކަވަމުން އަސްލަމް ވަނީ، މި މައްސަލައާ ގުޅިގެން މަޖިލީހުގެ 241 ކޮމެޓީން ހަދާފައިވާ އިންކުއަރީ ރިޕޯޓުގައި ހިމަނާފައިވާ ރިކޮމެންޑޭޝަން ތަކަށް އަމަލު ކުރުމަށް އެދުވަޑައިގެންފައެވެ.

"މަޖިލީހުން އެދެނީ މަޖިލީހުން މިކަމާއި ގުޅިގެން ތައްޔާރުކޮށް އާއްމު ކުރެވިފައިވާ އިންކުއަރީ ރިޕޯޓްގައި ހިމެނިފައިވާ ވިހާވެސް އަވަހަކަށް އަމަލުކުރެވިގެން ދިޔުން. އަދި ރާއްޖެއިން ހަރުކަށި ފިކުރާ އަނިޔާވެރިކަން އެއްކޮށް ނެތި ދިޔުން. އަދިހަމަ އެހެންމެ، ަމި ހަމަލާއާ ގުޅޭގޮތުން ތަހުގީގުތައް އަވަސްކޮށް ޝަރީއަތްތައް ނިމިގެން ދިއުމަކީ މުހިންމުވެފައި ބޭނުންތެރި ކަމެއްކަމުގައި ވެސް ދެކެން."

މުހައްމަދު އަސްލަމް

މަޖިލީހުން މިހެން އެދިފައިވާއިރު، ނަޝީދަށް ދެވުނު ހަމަލާގެ މައްސަލަ ވަރަށް ގާތުން ބައްލަވަމުން ގެންދަވާނެ ކަމަށާ، މައްސަލައާއި ގުޅޭ އިތުރު މައުލޫމާތު ހިއްސާކުރައްވަން އެބަހުރި ކަމަށް ދިފާއީ ވަޒީރު ޣައްސާން މައުމޫން ވަނީ ދާދުފަހުން ވިދާޅުވެފައެވެ.

ނަޝީަދަށް ދެވުނު ބޮމުގެ ހަމަލާއާ ގުޅިގެން ދައުވާ އުފުލާފައިވަނީ މުޖާޒް އަހުމަދު، ތަހުމީން އަހުމަދު، އަލީ ހައިޝަމް، ފަހުމީ އަލީ، އިސްހާގް އަދި މުހައްމަދު ނާޒިމްގެ މައްޗަށެވެ. މި ހަމަލާގައި ބޮން ގޮއްވާލި ވ. ތިނަދޫ، ހިޔާ، އަދުހަމް އަޙްމަދު ރަޝީދު ވަނީ ކުށަަށް އިއުތިރާފުވެފައެވެ. އެހެންކަމުން އޭނާގެ މައްޗަށް ކުށް ސާބިތުވެ ވަނީ 23 އަހަރުގެ ޖަލު ހުކުމެއް އިއްވާފައެވެ.