ބިލުގައި މީޑިއާ މާނަކުރަނީ ރަޖިސްޓަރޑް މީޑިއާތަކަށް: ވަޒީރު

ރައްޔިތުން މަޖިލީހަށް މިހާރު ހުށަހަޅާފައިވާ މީޑިއާ ބިލް ހިނގާނީ ކަމާބެހޭ އިދާރާގައި ރަޖިސްޓްރީކޮށްގެން ހިންގާ މީޑިއާތަކަށް އެކަނިކަމަށް މިނިސްޓަރ އޮފް ޔޫތު އެމްޕަވަރމަންޓް، އިބްރާހީމް ވަހީދު(އަސްވާޑް) ވިދާޅުވެއްޖެއެވެ.

މީޑިއާ ބިލާގުޅޭގޮތުން މިރޭ ބޭއްވި ފޯރަމެއްގައި ވާހަކަދައްކަވަމުން ވަޒީރު ވަނީ ބިލާގުޅޭގޮތުން ބައެއް ފަރާތްތަކުން ދައްކަމުންގެންދަވާ ހަގީގަތާ ހިލާފް ބައެއް ވާހަކަތައް ސާފުކޮށްދެއްވާފައެވެ. އިދިކޮޅު ބައެއް ފަރާތްތަކުން ވަނީ މަޖިލީހަށް ހުށަހަޅާފައިވާ މީޑިއާ ބިލާއެކު ސޯޝަލް މީޑިއާ އެކައުންޓްތައްވެސް ރެގިއުލޭޓްކޮށް ސަރުކާރުން ފިޔަވަޅު އަޅާނޭކަމަށެވެ.

މިކަމާ ގުޅޭގޮތުން ވަޒީރު މިރޭ ވަނީ ވަރަށް ސާފްކޮށް އެކަން އޮތްގޮތް ބަޔާންކޮށްދެއްވާފައެވެ. ވަޒީރު ވިދާޅުވީ، ބިލުގައި މީޑިއާ މާނަކޮށްފައި އެވަނީ، ރަޖިސްޓްރީކޮށްގެން ހިންގަމުން އަންނަ މީޑިއާތަކަށް ކަމަށެވެ.

މީޑިއާ މާނަކޮށްފައި އެއޮތީ ހަމަސީދާ ރަޖިސްޓަރޑް މީޑިއާއަށް. މީޑިއާއަށް ނިސްބަތްނުވާ މީހަކަށް މި ބިލް އެޕްލައި ނުވާނެ

ވަޒީރު ވަހީދު ވިދާޅުވިއެވެ

ވަޒީރު ވިދާޅުވީ ސޯޝަލް މީޑިއާގައި ކޮންޓެންޓް ހަދާ ފަރާތްތަކަށް މީޑިއާ ބިލް އެޕްލައި ނުވާނޭކަމަށެވެ. ނަމަވެސް ނޫހެއްގެ ކުޑަދަށުން ފޭސްބުކް، އިންސްޓަރގްރާމް އަދި އެކްސް ފަދަ ޕްލެޓްފޯމްތަކުގައި ހިންގާ ޕޭޖްތަކަށް މި ބިލް އެޕްލައިވާނޭކަން ވަޒީރު ފާހަގަކުރެއްވިއެވެ. ވަޒީރު ވިދާޅުވީ އެކަން އެގޮތަށް އޮންނަނީ، ނޫހެއްގެ ހައިސިއްޔަތުން އެފަރާތަކުން ފަތުރާ ހަބަރުތަކަށް ޒިންމާވާންޖެހޭތީކަމަށެވެ.

ރާއްޖޭގެ ކޮންޓެންޓް ހަދާމީހުނަށް އަޅުގަނޑު ދޭނެ ޔަގީންކަމަކީ މި ބިލް އެޕްލައިވާނީ ހަމައެކަނި ރަޖިސްޓަރޑް މީޑިއާތަކަށޭ

ވަޒީރު ވިދާޅުވިއެވެ.

ވަޒީރު ވަހީދު ތަކުރާރުކޮށް ވިދާޅުވީ މިއީ ރައްޖޭގެ ކޮންޓެންޓް ކްރިއޭޓްކުރާ މީހުންނާ ބެހޭ ބިލެއް ނޫންކަމަށާއި މިއީ ރާއްޖޭގެ ކަމާބެހޭ އިދާރާގައި ރަޖިސްޓްރީވެގެން ހިންގާ ނޫސްތައް ރެގިއުލޭޓްކުރުމަށް އެކުލަވާލި ބިލެއްކަމަށެވެ. އެހެންކަމުން އަމިއްލަ ފަރުދުންނާއި ކޮންޓެންޓް ކުރިއޭޓަރުން ކަންބޮޑުވުމުގެ މާނައެއް ނެތްކަމަށް ވަޒީރު ފާހަގަކުރެއްވިއެވެ.

މިރޭގެ ފޯރަމްގައި ބައިވެރިވި ފަރާތްތަކުންވެސް ވަނީ ބިލްގައި ކަންބޮޑުވާންޖެހޭ ކަމެއް ނެތްކަން ފާހަގަކުރައްވައި، މިހާރު ލިބިދީފައިވާގޮތަށް ހިފެހެއްޓުމެއްނެތި މިނިވަން ނޫސްވެރިކަމެއް ކަނޑައެޅިފައިވާ ހުދޫދުގެ ތެރެއިން ކުރެވެން މި ބިލް ހުރަސް ނާޅާކަން ފާހަގަކޮށް ވާހަކަދައްކާފައެވެ.