ޣައްޒާގައި 39،000 އަށްވުރެ ގިނަ ކުދިންގެ މަންމަ ނުވަތަ ބައްޕަ ވަނީ ޝަހީދުކޮށްލާފައި: ރިޕޯޓް

ޣައްޒާގައި އިސްރާއީލުން ހިންގަމުންދާ ޤަތުލު ޢާއްމުގެ ސަބަބުން 39،000 އަށްވުރެ ގިނަ ފަލަސްޠީނު ކުދިންގެ މައިންބަފައިން ގެއްލިފައިވާކަމަށް ފަލަސްޠީނު ސެންޓްރަލް ބިއުރޯ އޮފް ސްޓެޓިސްޓިކްސްއިން ބުނެފިއެވެ.

ފަލަސްޠީނު ކުޑަކުދިންގެ ދުވަހާ ގުޅިގެން ނެރުނު ބަޔާނެއްގައި އެ އިދާރާއިން ބުނެފައިވަނީ އިސްރާއީލުން ޣައްޒާއަށް ހަމަލާދޭން ފެށި ފަހުން 534 ދުވަސް ވެގެން ގޮސްފައިވާއިރު، އެ ހަމަލާތަކުގެ ސަބަބުން 39،384 ކުދިން މައިންބަފައިންގެ ތެރެއިން އެކަކު ނުވަތަ ދެމީހުން ޝަހީދުވެފައިވާ ކަމަށެވެ. މީގެ ތެރޭގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް 17،000 އަށްވުރެ ގިނަ ކުދިންގެ މަންމަ އާއި ބައްޕަ ޝަހީދުވެފައިވާ ކަމަށް އެ ބިއުރޯއިން ބުނެފައިވެއެވެ.

"މި ކުދިން މިހާރު ދިރިއުޅެމުންދަނީ ވަރަށް ހިތާމަވެރި ހާލަތެއްގައި. ގިނަ ކުދިން މަޖުބޫރުވެފައި މިވަނީ ޓެންޓުތަކުގައި ނުވަތަ ހަލާކުވެފައިވާ ގެތަކުގައި ދިރިއުޅެން. އެކުދިންނަށް އިޖުތިމާއީ އަދި ނަފްސާނީ އެހީތެރިކަމެއް ނުލިބޭ،" އެ ބަޔާނުގައި ބުނެފައިވެއެވެ.

މި ބަޔާނުގައި އިތުރަށް ބުނެފައިވަނީ އިސްރާއީލުގެ ހަމަލާތަކުގައި މަދުވެގެން 17،954 ކުދިން ޝަހީދުވެފައިވާ ކަމަށެވެ. މީގެ ތެރޭގައި 274 އަލަށް އުފަންވި ކުދިންނާއި އެއް އަހަރުން ދަށުގެ 876 ކުޑަކުދިން ހިމެނެއެވެ. މީގެ އިތުރުން 17 ކުދިން ޓެންޓުތަކުގައި ފިނިވެގެން މަރުވެފައިވާ ކަމަށާއި، 52 ކުދިން ބަނޑުހައިހޫނުކަމާއި ކާނާގެ ނުލިބުމުގެ ސަބަބުން މަރުވެފައިވާ ކަމަށް ވެސް ބުނެފައިވެއެވެ.

ޣައްޒާގައި މިހާރު ކުރިމަތިވެފައިވާ ބަނޑުހައިހޫނުކަމުގެ ސަބަބުން 60،000 ކުދިން މަރުވުމުގެ ނުރައްކަލާ ކުރިމަތިވެފައިވާ ކަމަށް އެ ބިއުރޯއިން އިންޒާރު ދީފައިވެއެވެ. އިސްރާއީލުން ޣައްޒާއަށް އެހީ ފޯރުކޮށްދޭ މައިގަނޑު ބޯޑަރު ކްރޮސިންގްތައް ބަންދުކޮށްފައިވާ ކަމަށާއި، މީގެ ސަބަބުން ކާބޯތަކެއްޗާއި ތެލާއި ބޭސްފަރުވާއަށް ބޭނުންވާ ތަކެތި ވަނުން މަނާވެފައިވާ ކަމަށް ވެސް ބުނެފައިވެއެވެ.

ޣައްޒާގެ ގަވަރމަންޓް މީޑިއާ އޮފީހުން ބުނެފައިވަނީ އިސްރާއީލުގެ ސަރުކާރުން "ގަސްތުގައި ބަނޑުހައިހޫނުކަން ކުރިމަތިކުރުވުމުގެ ސިޔާސަތެއް" ގެންގުޅެމުންދާ ކަމަށެވެ. މުޅި އެއްމަސްދުވަހަށް އެހީއާއި ފުށް ވެއްދުން ހުއްޓުވާލުމުގެ ސަބަބުން ބޭކަރީތައް ބަންދުކުރަން މަޖުބޫރުވެފައިވާ ކަމަށް އެ އޮފީހުން ބުނެފައިވެއެވެ.

ފަލަސްޠީނު ސެންޓްރަލް ބިއުރޯ އޮފް ސްޓެޓިސްޓިކްސްއިން އިތުރަށް ހާމަކޮށްފައިވަނީ ޣައްޒާއާއި ވެސްޓް ބޭންކުގައި ދިރިއުޅޭ 5.5 މިލިއަން ފަލަސްޠީނުގެ ރައްޔިތުންގެ ތެރެއިން 43 އިންސައްތައަކީ 18 އަހަރުން ދަށުގެ ކުޑަކުދިންނާއި ޒުވާނުން ކަމަށެވެ.

މާރިޗު 18 ގައި އިސްރާއީލުން އަލުން ހަމަލާތައް ފެށި ފަހުން މިހާތަނަށް 1،160 އަށްވުރެ ގިނަ ފަލަސްޠީނުގެ ރައްޔިތުން ޣައްޒާގައި ޝަހީދުވެފައިވާ ކަމަށް ބުނެފައިވެއެވެ. އަދި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް މަދުވެގެން 50،523 މީހުން ޝަހީދުކޮށްލާފައިވާކަމަށް ޣައްޒާގެ ސިއްހީ ވުޒާރާއިން ބުނެފައިވެއެވެ. މީގެ ތެރެއިން ގިނައީ އަންހެނުންނާއި ކުޑަކުދިން ކަމަށް ވެސް އެ ވުޒާރާއިން ބުނެފައިވެއެވެ.