އުއްމީދަކީ މި ދައުރުގެ ތެރޭގައި 8000 ފުލެޓްގެ މަސައްކަތް ނިންމައި ހަވާލުކުރުން: ރައީސް

މީގެ ކުރިން ރާއްޖޭގެ އެއްވެސް ސަރުކާރަކަށް ހާސިލްކުރެވިފައި ނުވާ ކާމިޔާބީއެއް މި ސަރުކާރުން ހާސިލްކުރާނެ ކަމަށާއި، މި ދައުރުގެ ތެރޭގައި ފަށާ ހައުސިންގް މަޝްރޫއުތައް ނިންމައި ރައްޔިތުންނަށް އެތަންތަނަށް ވަދެވޭވަރު ކުރައްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ރައީސް ފާހަގަކުރެއްވި ގޮތުގައި މީގެ ކުރީގެ ސަރުކާރުތަކުން ފެށި ހައުސިންގް މަޝްރޫއުތައް އެ ސަރުކާރެއްގެ ދައުރުގެ ތެރޭގައި ނިންމައި، ރައްޔިތުންނަށް ބޭނުންކުރުމުގެ ފުރުސަތު ދެވިފައެއް ނުވެއެވެ. ނަމަވެސް މި ސަރުކާރުގެ އަމާޒަކީ އެ އުސޫލު ބަދަލުކޮށް، މަސައްކަތްތައް ހަލުވި ދުވެލީގައި ކުރިއަށް ގެންގޮސް ކަނޑައެޅިފައިވާ މުއްދަތަށް ނިންމުމެވެ.

މީގެ ކުރިން ނެތް އެއްވެސް ސަރުކާރަކުން ފެށި ހައުސިންގް މަޝްރޫއުއެއް އެ ސަރުކާރުގެ ދައުރުގައި ނިންމައި ރައްޔިތުންނަށް ބޭނުން ކުރުމުގެ ފުރުސަތެއް ލިބިފައެއް.

ރައީސް ވިދާޅުވިއެވެ.

ސަރުކާރުން މިހާރު ފަށާފައިވާ ބޮޑެތި މަޝްރޫއުތަކަށް އަލިއަޅުވާލައްވަމުން ރައީސް ވިދާޅުވީ، ބީއެމްއެލްގެ ފައިނޭންސްގެ ދަށުން ސޮއިކޮށްގެން ފަށާ 3,260 ހައުސިންގް ޔުނިޓްގެ މަސައްކަތަކީ މި އަމާޒަށް ދިއުމަށް އެޅޭ މުހިންމު ފިޔަވަޅެއް ކަމަށެވެ. މި މަޝްރޫއުތައް ނިމޭނެ ކަމުގެ ފުރިހަމަ ޔަގީންކަން ރައީސް ވަނީ ރައްޔިތުންނަށް ދެއްވާފައެވެ.

މި މަޝްރޫއުތަކުގެ މަސައްކަތް ހަމަ ޔަގީން ކަމާ އެކީގަ 2028 ގެ ޖުލައި އާއި ހަމަޔަށް ނޫނީ އެއަށްވުރެ އަވަހަށް ވެސް ނިމިދާނެ. އެހެންވީމަ އަހަރުގެ މެދުތެރެއިން ހުރިހާ ހައުސިންގް ޔުނިޓަކަށް ވަދެވޭނެ މި ހިނގާ ހުރިހާ މަޝްރޫއުއެއް ތެރޭގަ.

މަޝްރޫއުތައް ނިމޭނެ ތާރީޚާ ގުޅޭގޮތުން ރައީސް ވިދާޅުވިއެވެ.

ރައީސް އިތުރަށް ވިދާޅުވީ، މިހާރު ހުޅުމާލެ އަދި ވިލިމާލޭގައި އަޅަން ނިންމައިފައިވާ ސޯޝަލް ހައުސިންގް ޔުނިޓްތަކުގެ އިތުރުން އަޅާ ހައުސިންގް ޔުނިޓްތަކުގެ މަޝްރޫއުތައް ވެސް ފެށުމުގެ މަސައްކަތް ކުރިއަށްދާކަމަށެވެ.

އަދި ބޯހިޔާވަހިކަން އެންމެނަށް ސިޔާސަތުގެ ދަށުން ފުލެޓަށް އެދެން ހުޅުވާލާފައިވާއިރު ސަރުކާރުގެ އަމާޒަކީ ހުރިހާ ފުލެޓެއްގެ މަސައްކަތްވެސް ނިންމައި މި ދައުރުގެ ތެރޭގައި ހަވާލުކުރުން ކަމަށް ވިދާޅުވިއެވެ.

ސަރުކާރުގެ އަމާޒަކީ ހަމަ މި ދައުރުގައި މި ފުލެޓްތައް ދިނުން. މާނައަކީ ގާތްގަނޑަކަށް 8000 އެއްހާ ފުލެޓް އެއީ. މިހާރު ހުޅުވާލާފައި އޮތް ސްކީމަކީ. އެ 8000 އެއްހާ ފުލެޓް މި ދައުރުގައި ނިންމާފައި ހަވާލުކުރުން.

ރައީސް ވިދާޅުވިއެވެ.

އެހެންކަމުން ކުރިއަށް އޮތް، ތިން ހަތަރު މަހެއްހާ ދުވަސް ތެރޭގައި ޕްރޮޖެކްޓްތަކުގެ ޢަމަލީ މަސައްކަތް ފެށޭނެ ކަމަށާ، އެކަމަށްޓަކައި ފަންޑް ހޯދުމުގެ މަަަސައްކަތް ކުރިއަށްދާ ކަމަށް ރައީސް ވިދާޅުވިއެވެ.