މަޖިލީހުގެ ޖަލްސާތައް ނުބާއްވައި ތިބުން ބަލައެއް ނުގަނެވޭ، ޖަލްސާތައް ބާއްވަންޖެހޭ: ހަސަން ލަތީފް
ރައްޔިތުންގެ މަޖިލީހުގެ ޖަލްސާތައް ނުބާއްވައި ތިބުން ބަލައި ނުގަނެވޭ ކަމަށް ޑިމޮކްރެޓްސް ޕާޓީގެ ރައީސް އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވެއްޖެއެވެ.
މިއަދުގެ ޖަލްސާ ނުބޭއްވި މައްސަލައިގައި ކަންބޮޑުވުން ފާޅު ކުރައްވަމުން ހަސަން ލަތީފް އެކްސްގައި ކުރެއްވި ޕޯސްޓެއްގައި ވިދާޅުވީ މަޖިލީހުގެ ގަވާއިދުގައިވާ ގޮތުގެ މަތީން ޖަލްސާތައް ބާއްވަންޖެހޭ ކަމަށާއި، މަޖިލީހުގެ ޖަލްސާތައް ނުބޭއްވުމަށް ޕީޖީ ލީޑަރުންނަކަށް މަޖިލީހުގެ ރައީސަށް ލަފައެއް ނުދެއްވޭނެ ކަމަށެވެ.
"މަޖިލީހުގެ ޖަލްސާތައް ނުބާއްވައި ތިއްބެވުމަކީ ބަލައިގަނެވޭނެ ކަމެއް ނޫން. މަޖިލީހުގެ ގަވާއިދުގައިވާ ގޮތުގެ މަތީން ޖަލްސާތައް ބާއްވަންޖެހޭ. ޖަލްސާތައް ނުބާއްވަން ޕީޖީ ލީޑަރުން މ. ރައީސަށް ލަފައެއް ނުދެއްވޭނެ. މަޖިލީހުން ނިންމާންޖެހޭ އެތައް ބައިވަރު މަސައްކަތެއް އެބަހުރި."
ހަސަން ލަތީފް ވިދާޅުވިއެވެ.
ހަސަން ލަތީފް މިފަދައިން ވިދާޅުވެފައިވާއިރު، ޑިމޮކްރެޓްސް ޕާޓީގެ ޕީޖީ ލީޑަރު އަލީ އާޒިމް ވެސް ވަނީ ވަކި ސަބަބެއް އެންގުމެއް ނެތި މި ގޮތަށް ޖަލްސާތައް ކެންސަލް ކުރުން ބަލައިނުގެނެވޭ ކަމަށް ވިދާޅުވެ އެ މައްސަލާގައި ކަންބޮޑުވުން ފާޅުކުރައްވައިފަ އެވެ.
މެމްބަރުން މިފަދައިން ކަންބޮޑުވުން ފާޅުކުރައްވައިފައި ވާއިރު، މިދިޔަ ބުދަ ދުވަހު މިދިޔަ ހަފުތާގެ ފަހު ޖަލްސާ ނިންމާލައްވަމުން، މަޖިލިހުގެ ރިޔާސަތުން ނައިބު ރައީސް އަހުމަދު ސަލީމް ވަނީ އާންމު އުސޫލާ އެއްގޮތަށް މި ހަފުތާގެ ފުރަތަމަ ޖަލްސާ މިއަދު ބާއްވާނެ ކަމަށް އިއުލާން ކުރައްވާފައެވެ. ނަމަވެސް އެ ޖަލްސާ މަޖިލީހުގެ ރިޔާސަތުން ތާވަލު ކޮށްފައެވެ ނުވެއެވެ. ޖަލްސާ ނޯންނާނެ ކަން މަޖިލިހުގެ އިދާރާ އިން ކަށަވަރު ކޮށްދިނަސް އެކަމުގެ ސަބަބު ހާމަ ކޮށްފައެއް ނުވެއެވެ.
ޖަލްސާގެ އިތުރުން، މިއަދަށް ތާވަލްކުރި މަޖިލީހުގެ ޕެޓިޝަން ކޮމިޓީގެ ބައްދަލުވުން ވެސް ވަނީ ކެންސަލް ކޮށްފަ އެވެ.
މަޖިލީހުގެ ގަވައިދުގައިވާ ގޮތުން ކޮންމެ ހަފުތާއަކު ތިން ޖަލްސާއެއް ބާއްވަން ޖެހެ އެވެ. ޖަލްސާތަކުގެ އެޖެންޑާ ކަނޑައަޅުއްވާނީ މަޖިލީހުގެ ރައީސެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
