ޓްރެޜަރީ ބޮންޑްގައި އިންވެސްޓްކުރުމުން ޑޮލަރުގެ ރިޒާވްއެއް އުފެދިގެންދާނެ: ޕެންޝަން އޮފީސް

ފިނޭންސުން ދޫކުރުމަށް ނިންމާފައިވާ ޓްރެޒަރީ ބޮންޑުގައި އިންވެސްޓްކުރުމުން ދިވެހި ރުފިޔާގެ ދައުރުވުން އިތުރުވެ، އެކަމުގެ ސަބަބުން ނޭދެވޭ ބަދަލެއް އަތުވެދާނޭކަމަށް ދެކެވެމުންދާ ވާހަކަތަކާ ގުޅޭގޮތުން ޕެންޝަން އޮފީހުން ޖަވާބުދީފިއެވެ.

ޕެންޝަން އޮފީހުން ނެރުނު ބަޔާނެއްގައި މިއަދު ބުނީ، ފިނެންސް މިނިސްޓްރީން ތްރެޒަރީ ބޮންޑް ހުށަހަޅާފައިވަނީ ދިވެހި ރުފިޔާ އަދި ޑޮލަރުން އަނބުރާ 2.4 ބިލިއަން ރުފިޔާގެ ޓްރެޜަރީ ބޮންޑެއްގައި އިންވެސްޓްކުރުމަށް ކަމަށެވެ. ޕެންޝަން ފަންޑުގެ ލިކުއިޑިޓީއަށް ބިނާކޮށް މި އިންވެސްޓްމަންޓަށް ފައިސާ ހޯދުމަށް ހުށަހަޅާފައިވަނީ ރިޓަޔަމަންޓް ޕެންޝަން ސްކީމުން މިހާތަނަށް އިންވެސްޓްކޮށްފައިވާ ޓްރެޜަރީ ބޮންޑްތަކުގެ ތެރެއިން 2.4 ބިލިއަން ރުފިޔާގެ ބޮންޑް ސެކަންޑަރީ މާކެޓްގައި ވިއްކާލުމަށްފަހު ލިބޭ ފައިސާގެ ތެރެއިންނެވެ.

ޕެންޝަން އޮފީހުގެ ބޯޑުން ވަނީ ދިވެހި ރުފިޔާ އަދި އެމެރިކާ ޑޮލަރުގެ މި ބޮންޑްގައި އިންވެސްޓްކުރުމަށް ނިންމި ނިންމުން ހާމަކޮށްފައެވެ. އެއޮފީހުން ބުނީ މި މުއާމަލާތުގެ ސަބަބުން ބޭޒާރުން ބޭރުފައިސާ ގަންނަން ނުޖެހި، އިންވެސްޓްމަންޓްގެ ތެރެއިން ޕެންޝަން ފަންޑުގައި ރިޒާވެއް އުފެދިގެންދާނޭކަމަށެވެ. މީގެ އިތުރުން ޕެންޝަން ފަންޑުން މިހާތަނަށް އިންވެސްޓްކޮސްފައިވާ ޓްރެޜަރީ ބޮންޑަށް ބަދަލުކުރުމުގެ ފުރުސަތު މި މުއާމަލާތްތަކުން ލިބިގެންދިޔުމުގެ އިތުރުން ޕޯތްފޯރިއޯ ރިޓާންވެސް އިތުރުވެގެން ދާނޭކަމަށް ޕެންޝަން އޮފީހުން ބުންޏެވެ.

ޕެންޝަން އޮފީހުން ބުނީ ޕެންޝަނާބެހޭ ޤާނޫނުގެ ދަށުން ބޯޑު މެމްބަރުންގެ މައްޗަށް ލާޒިމްކުރަނީ ފަންޑުގެ ބައިވެރިންގެ މަސްލަހަތު އިސްކޮށް އެ މެމްބަރުންނަށް އެންމެ ފައިދާހުރި ގޮތަކަސް ފަންޑު ހިންގުމަށް ބޭނުންވާ ނިންމުންތައް ނިންމުމަށް ކަމަށެވެ. އެގޮތުން ބޮންޑް ގަތުމުގެ މުއާމަލާތްތަކުގައި މިހާތަނަށް އަމަލުކޮށްފައިވާނީ ޕެންޝަނާބެހޭ ޤާނޫނާއި، އަދި ހެދިފައިހުރި ޤަވާއިދުތަކާއި އުސޫލުގެ ތެރެއިންކަމަށްވެސް ޕެންޝަން އޮފީހުން ވަނީ ބުނެފައެވެ.