ބައެއް ފަހަރު އެެހެން ޕާޓީތައް ގާތްކުރަނީ "އައިސިން" ޖަހާލަން: ނަޝީދު
ސިޔާސީ މަަސައްކަތުގައި ބައެއް ފަހަރު އެެހެން ޕާޓީތައް ގާތްކުރަނީ "އައިސިން" ޖަހާލަން ކަމަށާ އަދާލަތާއި ޖުމްހޫރީ ޕާޓީގެ ބައިވެރިވުން އޮވެެގެން ނޫނީ އެމްޑީޕީއަށް ވެރިކަން ނުލިބޭނެ ކަމަށް ގަބޫލުނުކުރުމަށް ކުރީގެ ރައީސް މުހައްމަދު ނަޝީދު, އެމްޑީޕީގެ މެންބަރުންގެ ކިބައިން އެދިވަޑައިގެންފި އެވެ.
ނަޝީދު އެ މޭރުމުން ވާހަކަ ދެއްކެވީ އަންނަ ހުކުރު ދުވަހު އޮންނަ އެމްޑީޕީގެ ޗެއާޕާސަން އިންތިހާބުގެ ކެމްޕެއިންގައި ގދ. ފަރެސްމާތޮޑާއަށް ވަޑައިގެން ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވި ގޮތުގައި ވެރިކަން ހޯދުމަށް ހުރިހާ ކަމެއް ކުރާ ބަޔަކީ ވެސް އެމްޑީޕީގެ "ރީނދޫ ލަޝްކަރެ" ވެ.
އެއް ޕާޓީއަކަށް އެކަނި ރިޔާސީ އިންތިހާބެއް ކާމިޔާބުކުރުމަކީ ކުރެއްވޭނެ ކަމެއް ނޫން ކަމަށާ ރިޔާސީ އިންތިހާބެއް ކާމިޔާބު ކުރަން އޮތް އެންމެ ފަހި މަގަކީ ކޯލިޝަނެއް ކަމަށް ކުރީގެ ރައީސް ސޯލިހް ވިދާޅުވެފައިވަނިކޮށް އެކަމަށް ނުސީދާ ރައްދެއް ދެއްވާ ނަޝީދު ވިދާޅުވީ އަދާލަތު ޕާޓީގެ އެހީތެރިކަން ނެތި އަދި ޖުމްހޫރީ ޕާޓީގެ މަދަދުވެރިކަން ނުލިބި އެމްޑީޕީއަށް ވެރިކަމަށް ނާދެވޭނެ ކަމަށް ބުނާ ބުނުން ގަބޫލުނުކުރައްވާ ކަމަށެވެ. އަދި އެގޮތަށް ނުދެކެން އެމްޑީޕީ މެންބަރުންގެ ކިބައިން އެދިވަޑައިގަތެވެ.
"މިވެނި ބަޔަކާއި އެވެނި ބަޔަކާ ގުޅިލައިގެން، އަދާލަތު ޕާޓީގެ އެހީއެއް ހޯދާލައިގެން، ޖުމްހޫރީ ޕާޓީގެ މަދަދުވެރިކަން ހޯދާލައިގެން [ނޫނީ ވެރިކަމަކީ] އަޅުގަނޑުމެންނަށް ކުރެވެން އޮތް ކަމެއް ކަމަށް އެއްގޮތަކަށް ވެސް ދެކިނުލައްވާތި،"
އެމްޑީޕީއަށް ދެ ފަހަރު ވެރިކަން ލިބުނީވެސް ގިނަ ޕާޓީތައް ހިމެނޭ ކޯލިޝަނަކުންނެވެ. އެއްވެސް އިންތިހާބެއްގައި އެކަނި ނިކުމެ ވެރިކަން ލިބޭ މިންވަރާ ގާތަށްވެސް އެމްޑީޕީއަށް ވޯޓް ލިބިފައެއް ނުވެ އެވެ. ނަމަވެސް ނަޝީދު ވިދާޅުވީ ބައެއް ފަހަރު އެެހެން ޕާޓީތައް ގާތްކުރަނީ "އައިސިން" ޖަހާލަން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
