ތަހުޒީބުވުމަކީ ކާބޯތަކެތީގެ ރައްކާތެރިކަން މަތީ ފެންވަރުގައި ކަށަވަރުވުން: މެޑަމް ސާޖިދާ

ގައުމެއްގައި ކާބޯތަކެތީގެ ރައްކާތެރިކަން މަތީ ފެންވަރުގައި ކަށަވަރުކޮށްދެއްވިފައިވާ ނަމަ، އެ ކަމުން ބުނެދެނީ އެ ގައުމެއް ތަހުޒީބުވެފައިވާ މިންވަރު ކަމުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެ އެވެ.

އެކަމަނާ މިހެން ވިދާޅުވީ ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހާއި ގުޅިގެން ފ. ނިލަންދޫގައި މިއަދު ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

އެކަމަނާ ވިދާޅުވީ ކާބޯތަކެތީގެ ރައްކާތެރިކަމަކީ ހަމައެކަނި ބައެއްގެ ސިއްހަތާ ގުޅޭ ކަމެއް ނޫން ކަމަށާ އެއީ އެއަށް ވުރެ އޭގެ މާނަފުޅާ ކަމެއް ކަމަށެވެ.

"ގައުމެއްގައި ކާބޯތަކެތީގެ ރައްކާތެރިކަން މަތީ ފެންވަރުގައި ކަށަވަރުކޮށްދެއްވިފައިވާ ނަމަ، އެ ކަމުން ބުނެދެނީ އެ ގައުމެއް ތަހުޒީބުވެފައިވާ މިންވަރު. އިންސާނީ އަހްލާގު އެ ގައުމެއްގައި ހަރުދަނާ ކުރެވިފައިވާ މިންވަރު. ދިރިއުޅުމުގެ އާދަތައް ރީތިކުރެވިފައިވާ މިންވަރު. އެހެންވީމާ ހަގީގަތުގައި ކާބޯތަކެތީގެ ރައްކާތެރިކަމަކީ ގައުމެއްގެ ހޭލުންތެރިކަމާއި އަހްލާގާއި ތަހުޒީބާ ވެސް ގުޅިފައި އޮންނަ ކަމެއް,"

މީގެ އިތުރުން އެކަމަނާ ވިދާޅުވީ ދިރިއުޅުމުގެ ރީތި އާދަތައް ހަގީގަތުގައި ފެށެނީ ޅަފަތުގެ ތަރުބިއްޔަތުން ކަމަށާ މި ކަން އަށަގަންނަވައި ހަރުލައްވަނީ މަދަރުސާގެ ތެރޭން ކަމަށެވެ. އޭގެ އިތުރަށް ދައުލަތުގެ ފެންވަރެއްގައި ސަރުކާރުން އުފައްދަވާ ގާނޫނުތަކާއި އުސޫލުތަކާ ސިޔާސަތުތައް ހުންނަ ކަން ފާހަގަ ކުރެއްވި އެވެ.

މިކަންކަމަކީ މީހުން ހޭލުންތެރިކޮށް، ކާބޯތަކެތީގެ ރައްކާތެރިކަމަށް މީހުން އަހުލުވެރިކުރުވާ ހިތްވަރުދީ، އަދި ކާބޯތަކެތީގެ ރައްކާތެރިކަން ކަށަވަރުކުރުމުގެ ގޮތުން އެކުލަވާލާ ތަންފީޒުކުރެވޭ ކަންކަން ކަމަށާ ގައުމެއް ރަނގަޅަށް ބިނާކުރުމަށްޓަކައި މިފަދަ ބޭނުންތެރި ގާނޫނުތަކާއި އުސޫލުތަކަށް ތަރުހީބު ދޭންޖެހޭ ކަމުގައި ވިދާޅުވި އެވެ.

"ހަގީގަތުގައި ކާބޯތަކެތީގެ ރައްކާތެރިކަމަށް އުނިކަން ލިބޭ ސަބަބުތައް ވެސް ވަރަށް ތަފާތު. ބައެއް ފަހަރަށް އެކަށޭނަ އިލްމީ ފަންނީ އިންސާނީ ގާބިލުކަން ނެތުން. ބައެއް ފަހަރަށް އެކަށޭނަ ވަސީލަތްތައް ނެތުން. އަނެއް ބައި ފަހަރަށް ހަރުދަނާ ގަވާއިދުތަކާއި އުސޫލުތަކާއި ސިޔާސަތުތައް ނެތުން ހިމެނޭ. އަދި ހަމަ އެހެންމެ ޤަވާއިދުތައްހުރެފައިމެ، އެ ގަވާއިދުތައް އެކަށައެޅިފައި ހުންނަ ގޮތުން، ކޮންމެ ވެސް ހުސްޖާގައެއް އޮންނާތީ، ތަންފީޒުނުކުރެވޭ ހާލަތުވެސް އާދޭ," ރައީސުލްޖުމްހޫރިއްޔާގެ އަނބިކަނބަލުން ވިދާޅުވި އެވެ.

ނަމަވެސް މިއަދު ކާބޯތަކެތީގެ ރައްކާތެރިކަމާބެހޭ ގާނޫނުގެ ދަށުން މޯލްޑިވްސް ފުޑް އެންޑް ޑްރަގް އޮތޯރިޓީން މިހާރު އެކުލަވާލަމުންދާ ގަވާއިދުތަކާއި އުސޫލުތަކަކީ ކުރިޔަށްވުރެ ރަނގަޅަށް މިކަން ހަރުދަނާ ވެގެން ދާނެ ކަމެއް ކަމުގައި އެކަމަނާ ވިދާޅުވި އެވެ.

ޖިއޮގްރަފިކަލީ ރާއްޖެ އުފެދިފައި އޮންނަ ގޮތުންނާއި އެ ނޫން ވެސް ބައެއް ސަބަބުތަކާ ހުރެ، ރާއްޖޭގައި ދެމެހެއްޓެނިވި ގޮތެއްގައި ކާބޯތަކެތީގެ އެކި ބާވަތްތައް އުފައްދައި ބޭރުގެ ބޮޑެތި މާކެޓުތަކަށް އެކްސްޕޯޓު ކުރުމުގެ ފުރުސަތު އަބަދުވެސް އޮންނަނީ ހަނިކޮށް ކަން ފާހަގަ ކުރައްވާ ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ އެކަން އެގޮތަށް އޮތް ނަމަވެސް މިހާރު ޓެކްނޯލޮޖީ ފަހިވެފައިވާ މިންވަރަށް ބަލާ އިރު، މަސްވެރިކަމުގެ ބައެއް ބާވަތްތައް ވެސް، އަދި ހާއްސަކޮށް ދަނޑުވެރިކަމުގެ ބައެއް ވިޔަފާރި ވެސް ހަމަ އާންމު ގޭގެ ފެންވަރުގައި ކުރާކަށް ދައްޗެއް ނޫން ކަމަށެވެ.

"ވަންގަވް ޕޯޓަލް މި ކަމަށް މަގުފަހިކުރާކަން އަޅުގަނޑު އުފަލާއެކު ފާހަގަކުރަން. އަދި މި ދާއިރާއަކީ އަޅުގަނޑު ވެސް މަސައްކަތްކުރާދާއިރާ ކަމަށްވީތީ، މި ދާއިރާގައި ރާއްޖެއަށް ހުރި ގިނަ ގޮންޖެހުންތަކާއި، އަދި ޒަމާނާއެކު ހުޅުވެމުން އަންނަ ފުރުސަތުތައް ވެސް ހިޔާލަށް އާދޭ," ރައީސުލްޖުމްހޫރިއްޔާގެ އަނބިކަނބަލުން ވިދާޅުވި އެވެ.