ގޮންޖެހުންތަކު ތެރޭގައި ޤައުމު ނިކަމެތިވާން ދޫކޮށްގެން ތިބެވެން ނެތްކަން ރައީސް މުޢިއްޒު ދަނީ ސާބިތުކޮށްދެއްވަމުން: ސަޢީދު

ދުނިޔޭގެ އިޤްތިޞާދީ ގޮންޖެހުންތަކުގެ ތެރޭގައި ޤައުމު ކުރިއެރުވުމަށް ހިކުމަތްތެރިކަމާ އެކު ރައީސް ޑރ. މުޙައްމަދު މުޢިއްޒު މަސައްކަތް ކުރައްވަމުން ގެންދަވާ ކަމަށް އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

މާލޭ ވިޔަފާރި ބަނދަރު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ އަދާހަމަ ހިއްސާކުރައްވައި ވަޒީރު ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ވިޔަފާރިއާއި އިޤްތިޞާދީ ކުރިއެރުމާ އެންމެ ބޮޑަށް ގުޅިފައި އޮތް އެއް މަޝްރޫޢަކީ މާލޭ ވިޔަފާރި ބަނދަރުގެ ޙާލަތު ބަދަލުކޮށް މިހާރުގެ އިޤްތިޞާދީ ހަޤީޤަތްތަކާ ފައިހަމަކުރުން ކަމަށެވެ.

އެ ބަނދަރު މެދުވެރިކޮށް ހިނގާ ވިޔަފާރީގެ ކާރުބާރު ހަލުވިކޮށް ފަސޭހަކޮށްދިނުމުގެ މުހިންމުކަން އޭނާ ފާހަގަކުރެއްވިއެވެ.

ވަޒީރު ސަޢީދު ވިދާޅުވި ގޮތުގައި ބަނދަރު ޒަމާނީކުރުމުގެ ވިސްނުމަކީ އެތައް އަހަރެއް ކުރިން ކަމާ ބެހޭ އިދާރާތަކުން ގެންގުޅެމުން ދިޔަ ޚިޔާލެކެވެ. ނަމަވެސް ދިގު މުއްދަތެއް ފާއިތުވީއިރު ވެސް ރާއްޖޭގެ މައި ވިޔަފާރި ބަނދަރަށް މާ ބޮޑު ބަދަލެއް އައިސްފައި ނުވާ ކަމަށާއި ފެނިފައި ހުރީ ކުދިކުދި ކުރިއެރުންތައް ކަމަށް ވިދާޅުވިއެވެ.

އެ ޙާލަތު ނިމުމަކަށް ގެންނެވުމަށް ރައީސް ޑރ. މުޢިއްޒު އިސް ނަންގަވައި ޢަމަލީ މަސައްކަތްޕުޅު ފައްޓަވާފައިވާ ކަމަށް ވަޒީރު ފާހަގަކުރެއްވިއެވެ. ދުނިޔޭގެ މަސްރަޙަށް އަންނަ ބަދަލުތަކާއި އިޤްތިޞާދީ ގޮންޖެހުންތަކުގެ ތެރޭގައި ޤައުމު ނިކަމެތިވެގެން ދާން ދޫކޮށްލައިގެން ތިބެވެން ނެތްކަން ރައީސް ސާބިތުކޮށްދެއްވަމުން ގެންދަވާ ކަމަށާއި ހުރަސްތަކާ ކުރިމަތިލައްވައި އިޙްލާސްތެރި މަސައްކަތްޕުޅުން ޤައުމު އެ ޙާލަތުން މިންޖުކޮށްދެއްވުމަކީ ވެރިއެއްގެ ޒިންމާކަން ރައީސް ކަށަވަރުކޮށްދެއްވަމުން ގެންދަވާ ކަމަށް ވެސް ވަޒީރު ސަޢީދު ވިދާޅުވިއެވެ.

މާލޭ ވިޔަފާރި ބަނދަރު ތަރައްޤީކުރުމުގެ މަޝްރޫޢަކީ ސަރުކާރުން މިހާރު ކުރިއަށް ގެންދާ އިޤްތިޞާދީ ބޮޑެތި މަޝްރޫޢުތަކުގެ ތެރެއިން ފާހަގަކޮށްލެވޭ މަޝްރޫޢެކެވެ.