ލޭ ހަދިޔާ ކުރާ ފަރާތްތަކުގެ ރަޖިސްޓްރީ އޮންލައިންކޮށް, ތެލެސީމިއާއަށް ގިނަ ބަދަލުތަކެއް

ލޭ ހަދިޔާ ކުރާ ފަރާތްތަކުގެ ރަޖިސްޓްރީ އޮންލައިންކޮށް، ތެލެސީމިއާ ހިދުމަތަށް ގިނަ ބަދަލުތަކެއް ގެންނަން މިނިސްޓްރީ އޮފް ހެލްތުން ނިންމައިފިއެވެ.

މިނިސްޓްރީން މިގޮތަށް ހާމަކޮށްފައިވަނީ، މިއަދު ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު، މުހައްމަދު އިބްރާހިމް މިނިސްޓަރ އޮފް ހެލްތު ނާޒިމް އަބްދުﷲ އާއި ކުރެއްވި ސުވާލަކަށް ޖަވާބުދެމުންނެވެ.

މެންބަރު މުހައްމަދު އިބްރާހިމް ވަނީ ލޭ ހޯދުމާއި ދިނުމުގައި މިހާރު ދިމާވާ ދަތިތަކަށް ޒަމާނީ ހައްލެއް ނުގެނިވެގެން އުޅޭ ސަބަބާއި ގުޅޭގޮތުން ސުވާލު ކުރައްވާފައެވެ.

މެންބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވެފައިވަނީ، ލޭ އެޅުމުގެ ހިދުމަތްތައް ހަރުދަނާކޮށް އެއް ވިއުގައަކުން ގުޅާލުމަށް ޓަކައި، ބައިނަލްއަގުވާމީ މިންގަނޑާ އެއްގޮތް ވާގޮތުގެ މަތިން ލޭ އެޅުމާއި އަދި ލޭ ހަދިޔާކުރުމުގެ ހިދުމަތް ދިނުމުގެ ކަންކަން ހަމަޖެއްސުން މުހިއްމު ވާތީ، ދުނިޔޭގެ ސިއްހަތު ޖަމިއްޔާގެ ފަންނީ އެހީތެރިކަމާއެކު ނޭޝަނަލް ބްލަޑް ސްޓޭންޑަރޑް އެކުލަވާލާ ނިމިފައިވާ ކަމަށެވެ. އަދި މިހިނގާ މަހުގައި މި ހިދުމަތް ލޯންޗް ކުރެވިގެންދާނެކަމަށް މިނިސްޓްރީން ވަނީ ވިދާޅުވެފައެވެ.

މި މަސައްކަަތަކީ ކަމާގުޅޭ ބައިނަލްއަގުވާމީ ފެންވަރުގެ މާހިރުންނާ އަދި ދިވެހިރާއްޖޭގައި ތިއްބެވި ކަމާ ގުޅޭ އިސް ފަރާތްތަކުގެ ފަންނީ އެހީތެރިކަމާއެކު 2 އަހަރު ދުވަހުގެ ތެރޭގައި ކުރެވުނު ބޮޑު މަސައްކަތެކެވެ.

އެގޮތުން، ހުރިހާ ޓްރާންސްފިއުޝަން ސެންޓަރުތަކުން ފޯރުކޮށްދޭ ލޭގެ ހިދުމަތުގެ މުހިއްމު ތަފާސްހިސާބު ތައް ފެންނާނެހެން ޑީ.އެޗް.އައި.އެސް-2 ސޮފްޓްވެއަރގެ މޮޑިއުލެއް ހާއްސަ ގޮތްތަކަށް ފަރުމާކުރެވި، ކޮންމެ ރަށަކުންވެސް ނުވަތަ ޓްރާންސްފިއުޝަން ސެންޓަރަކުން މައުލޫމާތު އަޅާ ފަރާތްތަކަށް ތަމްރީން ދިނުމާއެކު، ލޭ ދޭ ފަރާތްތައް ގިންތިކުރެވި ތަފާސް ހިސާބުތައް ވަގުތުން ބަލާލެވޭނެ ނިޒާމެއް ގާއިމުކުރެވިފައިވާކަން ވެސް މިނިސްޓްރީން ވަނީ ފާހަގަކޮށްފައެވެ.

މެންބަރު އިބްރާހިމް މުހައްމަދު ކުރެއްވި ސުވާލަށް އިތުރަށް ޖަވާބު ދެއްވަމުން މިނިސްޓްރީން ވިދާޅުވީ، ތެލެސީމިއާ ކޮންޓްރޯލް ކުރުމުގެ ގާނޫނުގައި ބަޔާންކުރާ ތެލެސީމިއާ ކުދިންގެ ގައުމީ ދަފްތަރުގައި ވަންގަވް މެދުވެރިކޮށް ރަޖިސްޓްރީ ވުމާއި އަދި ރަޖިސްޓްރީ ބެލެހެއްޓުން 2026 ވަނަ އަހަރުގެ ޖެނުއަރީ މަހު ވަނީ ފެށިފައެވެ.

އަދި ކުރިޔަށް ޕްލޭން ކުރެވިފައި ހުރި މުހިންމު ޕްރޮޖެކްޓުތަކުގެ ތެރޭައި ނުހަނު އިސްކަމެއް ދޭންޖެހިފައިވާ ލޭ ހަދިޔާ ކުރާ ފަރާތްތަކުގެ ރަޖިސްޓްރީ މިވަގުތު ބަލަހައްޓަމުން އަންނަ މެނުއަލް ސިސްޓަމުން އޮންލައިން އިންފޮރމޭޝަން ސިސްޓަމަކަށް ބަދަލުކުރުމުގެ މަސައްކަތް ފެށިފައިވާކަން ފާހަގަކުރެއްވިއެވެ. އަދި ޑޯނަރ ރަޖިސްޓްރީ އާއި، ޑޯނާރ ރެކްރޫޓްމަންޓް ޕޯރޓަލް ވެބްސައިޓާއެކު ހާއްސަ އެޕްލިކޭޝަނެއް މިހިނގާ 2026 ވަނަ އަހަރުގެ އޮކްޓޫބަރު މަހުގެ ނިޔަލަށް ބޭނުންކުރަން ފެށުމަށް ވަނީ ކަނޑައެޅިފައެވެ.

މި ހިދުމަތްތައް ޒަމާނީ ކުރެވުމުގެ ނަތީޖާއަކަށް ވެގެންދާނީ، ޖަމިއްޔާ ޖަމާއްތަކާއި، ކުންފުނިތަކާއި އަދި އަމިއްލަ ފަރުދުންގެ ތެރެއިން ލޭ ދޭ ފަރާތްތަކާއި، އެފަރާތްތަކުގެ ލޭގެ ގްރޫޕު ހިމެނޭގޮތަށް ރަޖިސްޓްރީ ވުމާއި، ލޭ ހަދިޔާ ކުރުމުގެ ކޭމްޕްތައް އިންތިޒާމުކުރުމާއި އެކު ލޭގެ ގްރޫޕްތައް ލިބެން ހުރި ސަރަހައްދުތައް މެޕް ކުރެވިފައިވާ ގައުމީ ޑޭޓާ ބޭސްއެއް ވުޖޫދު ވުމުން ލޭ ހޯދުމުގައި ދިމާވަމުން އަންނަ ދަތިތަކަށް ވާންޖެހިފައިވާ ހައްލެއް އިންފޮރމޭޝަން ޓެކްނޮލޮޖީގެ ޒަރިއްޔާއިން ލިބިދިޔުންކަމަށްވެސް ވަނީ ވިދާޅުވެފައެވެ.