2025 ބަޖެޓްގައި ތަފްސީލެއް ނެތް؛ ދާއިރާގައި ހިނގާ މަޝްރޫއު މެމްބަރަށް ވެސް ނޭނގެ: ރައީސް ޔާމީން

އަންނަ އަހަރަށް ލަފާކޮށް ސަރުކާރުން ހުށަހަޅައި، މަޖިލީހުން ފާސްފައިވާ ބަޖެޓްގައި މަޝްރޫޢު ތަކުގެ މާބޮޑު ތަފްސީލެއް، ހިމަނާފައި ނުވާކަމަށް ވިދާޅުވެ، ކުރީގެ ރައީސް އަބްދުالله ޔާމީން އަބްދުލްޤައްޔޫމް ބަޖެޓަށް ފާޑުވިދާޅުވެއްޖެއެވެ.

ޕީއެންއެފްއަށް އަހަރެއް ފުރުން ފާހަގަ ކުރުމަށް ރޭ އެ ޕާޓީގެ ޖަގަހައިގައި ބޭއްވި ޖަލްސާގައި ޔާމީން ވިދާޅުވީ، ސަރުކާރަށް ވީ އެއް އަހަރުގެ ތެރޭގައި ތަރައްގީގެ އެއްވެސް މަޝްރޫޢުއެއް ނުހިނގާ ކަމަށެވެ. އަދި 2025 ވަނަ އަހަރުގެ ބަޖެޓް ފާސްކޮށްފައިވަނީ، ދުނިޔޭގެ އެހެން ގައުމެއްގައި ވެސް އެކަން ނުކުރާ ގޮތަށް ކަމަށެވެ.

އެއްވެސް ދާއިރާއަކަށް ދަނީ މިޔަނި ބޮޑު މަޝްރޫޢު އެކޭ، ބުނާކަށް މިއަދަކު އެއްވެސް ދާއިރާއެއްގެ މެންބަރަކަށް އެނގިވަޑައި ނުގަންނަވާނެ. އެއްވެސް ރަށެއްގެ ރައްޔިތަކަށް، ކައުންސިލަކަށް، އަދި މަޖިލީހުގައި އެ ދާއިރާ ތަމްސީލު ކުރައްވާ މެމްބަރަށް ވެސް. ދެން އެވެސް، މި ބުނީ ރައީސުލްޖުމްހޫރިއްޔާ، ދާއިރާތަކަށް ގެންނަން ބޭނުންވާ ތަރައްގީ ބޮޑުކަމުންނޭ މިހެން މި ވީ. އެކަން ބޮޑުވާ ކަމަށް ވަންޏާ ބަޖެޓް ފޮތުގެ ޞަފްޙާތައް އިތުރުކޮށްލަން ރަނގަޅުވާނެ.

ރައީސް ޔާމީން

ޔާމީން އިތުރަށް ވިދާޅުވީ، މިދިޔަ 12 މަސް ދުވަހުގެ ތެރޭގައި ދައުލަތުން ހަރަދު ކުރި ގޮތް އެނގޭން ނެތް ކަމަށެވެ. އެގޮތުން އެއްވެސް މަޝްރޫޢުއެއް ހިންގާފައި ނުވާއިރު ދައުލަތަށް ލިބުނު ފައުސާއަށް ވީނުވީއެއް ނޭނގޭ ކަމަށް ވިދާޅުވުއެވެ. އަދި ފިނޭންސް މިނިސްޓްރީން މާލީ ހިސާބުތައް އާއްމު ނުކުރާތާ ހަ މަހަށް ވުރެ ގިނަ ދުވަސްވެފައިވާ ކަމަށާ، ރައްޔިތުންނަށް ރައްޔިތުންގެ ފައިސާއަށް ވާނުވާ އެނގެންޖެހޭ ކަމަށް ވިދާޅުވިއެވެ.

މީގެ އިތުރުން ރައީސް ޔާމީން ވަނީ، އީސީގެ ރައީސް އާއި ނާއިބު ރައީސްގެ އިތުރުން އޭސީސީގެ ރައީސް އާއި ނާއިބުވެސް އައްޔަނު ކުރައްވާ ފަރާތަކީ ރައީސުލްޖުމްހޫރިއްޔާ ކަމަށް ކަނޑައަޅައި ގާނޫނަށް ބަދަލު ގެންނަން ނިންމި ނިންމުމަށްވެސް ފާޑުވިދާޅުވެފައެވެ.

އެގޮތުން ވިދާޅުވީ، އެފަދައިން ކަންކުރައްވަމުން އައީ މީގެ 30 އަހަރު ކުރިން ކަމަށާ، އަލުން އެގޮތަށް އިއާދަކުރުމަކީ ރާއްޖެ 30 އަހަރު ފަހަތަށް ދިޔުން ކަމަށެވެ.

"މީގެ 30 އަހަރު ކުރިން، އޭރު ހުންނަވާ ރައީސަކު މި ތަންތަނަށް މީހުން އައްޔަން ކުރައްވާނީ. ޑިމޮކްރަސީގެ މަގުގައި އަޅުގަނޑުމެން ކުރި ދިގު ޖިހާދު، އަދި އިސްލާހީ މަގުގައި ވަކާލާތު ކުރެއްވި ބޭފުޅުން މިއަދު އެ ތިބީ މަންމަންވެ، އަތާފައި ގުޑުވާ ނުލެވިފައި،" ޔާމީން ވިދާޅުވި އެވެ.

ރައީސް ޔާމީން ވަނީ ތަކުރާރުކޮށް އޭސީސީ މިނިވަން ތަނެއްގެ ގޮތުގައި ހިންގުމަށް ފުރުސަތު ދެއްވުމަށް ގޮވާލައްވާފައެވެ.