ރާއްޖޭގެ ހުރިހާ ސިޓީއެއް ހުރިހާ މަގެއް ހަދާންނަން: ރައީސް ޑރ.މުއިއްޒު

ރާއްޖޭގެ ހުރިހާ ސިޓީއެއްގެ ހުރިހާ މަގެއް އެންމެ ޒަމާނީ ފެންވަރަށް މި ސަރުކާރުން ހަދާ ނިންމާނެކަމަށް ރައިސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ މިހާރު ދެކުނު އަތޮޅުތަކަށް ކުރައްވަމުން ގެންދަވާ ދަތުރުފުޅުގައި މިއަދު ހަވީރު ފުވައްމުލައް ސިޓީއަށް ވަޑައިގެން މިރޭ އެސިޓީގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

އެގޮތުން މިއަދު ހަވީރު ފެށުނު ފުވައްމުލައް ސިޓީގެ މަގުހެދުމުގެ ދެވަނަ ފިޔަވަހީގެ މަޝްރޫއު ގެ ފެށުމަށް އިޝާރާތް ކުރައްވާ ރައީސް ޑރ.މުހައްމަދު މުއިއްޒު ވިދާޅުވީ މިއަދު ފެށިގެން މިދިޔައީ ރާއްޖޭގެ ހުރިހާ ސިޓީއެއްގެ މަގުމަގުތައް ހެދުމުގެ ބޮޑު ބިޔަ މަޝްރޫޢުގެ ފެށުން ކަމަށެވެ.

"މިއަދު ފެށިގެން މިދިޔައީ ރާއްޖޭގެ ހުރިހާ ސިޓީއެއްގެ ހުރިހާ މަގެއް އެންމެ ޒަމާނީ ފެންވަރަށް ހަދަން ފެށުމުގެ ރަސްމިޔާތު، ހުރިހާ ސިޓީއެއްގެ ހުރިހާ މަގެއް އަޅުގަނޑުމެން ނިންމާނަން":

ރައީސް ޑރ.މުހައްމަދު މުއިއްޒު ވިދާޅުވިއެވެ.

މަގުތައް ރަނގަޅު ފެންވަރަކަށް ހެދިއްޖެ ނަމަ އެރަށެއްގެ ރައްޔިތުންނަށް ނުހަނު ގިނަގުނަ ފައިދާތައް ލިބިގެން ދާނެކަމަށާއި، އޭގެ ތެރޭގައި އިޖުތިމާއީ ފައިދާ އާއި އަދި އިޤްތިޞާދީ ފައިދާ ހިމެނޭކަމަށް ރައީސް ވިދާޅުވިއެވެ.

ރައީސް ޑރ.މުހައްމަދު މުއިއްޒު މިއަދު ހަވީރު ފުވައްމުލައް ސިޓިއަށް ވަޑައިގެން އެސިޓީގެ މަގުތައް ހެދުމުގެ ދެވަނަ ފިޔަވަހީގެ އަމަލީ މަސައްކަތްތައް ވަނީ ފައްޓަވައިދެއްވާފައެވެ.

އެމްޓިސީސީން މައުލޫމާތު ދެއްވާފައިވާ ގޮތުގައި ފުވައްމުލައް ސިޓީގެ މަގުތައް ހެދުމުގެ ދެވަނަ ފަޔަވަހީގެ މަސައްކަތް ނިމޭއިރު 50 މަގެއް (ގާތްގަޑަކަށް 12.7 މީޓަރ) ގައި ތާރުއެޅި އެންމެ ޒަމާނީ ފެންވަރަށް ހެދިގެން ދާނެއެވެ. އަދި އެމަސައްކަތަށް މުޅި ޖުމުލަ 225 މިލިޔަން ރުފިޔާ ޚަރަދުވާނެކަމަށްވެސް އެމްޓީސީސީން ވަނީ ހާމަކުރައްވާފައެވެ.