ލޮލުގެ ގުލަކޯމާއަށް އަދީބަށް ޑޮކްޓަރލިޔެދިން ބޭހަކީ ސިޔާސީ ޕާޓީއަކަށް ސޮއިކުރުން!!

ސޯޝަލްމީޑިއާގެ ޑިސްކަޝަންތަކުގެތެރެއިން މިދިޔަ ހަފްތާގައި އަޅުގަނޑު ވަރަށް އަޅައިގަތް ވާހަކައަކާ ދިމާވިއެވެ. ކުރީގެ ނާއިބް ރައީސް އަހުމަދު އަދީބަށް ޑޮކްޓަރު ލިޔެދިން ޚާއްސަ ބޭހެއްގެ ވާހަކަ އިވުނީމައެވެ. ދައުލަތުގެ މުދަލަށް ޚިޔާނާތްތެރިވުމާއި ރައީސް އަބްދުﷲ ޔާމީން އަވަހާރަކޮށްލަން އުޅުނުކަމަށް ޝަރީއަތަށް ސާބިތުވެ 33 އަހަރުގެ ދިގުމުއްދަތެއްގެ ޖަލުހުކުމެއް ތަންފީޒުކުރަމުންދިޔަ އަހުމަދު އަދީބް ސިއްހީ މައްސަލައަކާގުޅިގެން ގޭބަންދަށް ބަދަލުކޮށްދިނުމުން އާއްމުންގެ ތެރެއަށް ނުކުމެވަޑައިގެން ލޯބީގެ ލަވައެއް ރެކޯޑްކުރައްވައި، ޕަބްލިކަށް ރިލީޒްކޮށްލިއެވެ.

އެލަވާގައި ފެނިގެންދާ އަނބިމީހާވެސް އިނީ ވަރަށް ފުރިހަމައަށް ނަލަހެދި ޒީނަތްތެރިވެ ފިރިމީހާ ގިޓާކުޅެ ކުޅެ ކިޔަމުންދިޔަ ލޯބީގެ ލަވައިގެތެރެއަށް ގެއްލިފައެވެ. ލަވައިގެ ޑައިރެކްޓަރަކީވެސް ހުނަރު ހުރި މީހެއްކަމަށް ފެނެއެވެ. ރާއްޖޭގެ ހުރިހައި ނޫސްތަކަށްވެސް އެލަވައިގެ ވާހަކަ އަރައިފިއެވެ. ނޫސްތަކުން އެކުރި ތާރީފަކުން އެއީ އަސްލު ތެދެއްތޯ ބަލާލަން އަޅުގަނޑު ސޯޝަލް މީޑިއާގެތެރެއަށް ވަންތަނުން އިއްތިފާގަކުން އެބުނާ ލަވަޔަކާ ދިމާވިއެވެ. އަޅުގަނޑަށްވެސް ލިބުނީ ހައިރާންކަމެކެވެ. ހަމަލަވަޔެއް އެއޮއްކިޔަނީއެވެ. އެލަވަ މަޝްހޫރުވެފައިވާވަރުން އެހެންމީހުންނަށް ނޭގުނަސް އުއްތަމަ ފަނޑިޔާރަށްވެސް އަދި ރައީސުލްޖުމްހޫރިއްޔާއަށްވެސް މިހާރު ވާނީ ފެނިވަޑައިގެންފައިތާއޭ އަޅުގަނޑުގެ ހިތަށް އެރިއެވެ.

އެލަވަ ބަލައި ނިންމާލިތަނާ އެހެން ޚާއްސަ ޚަބަރެއް ފެނުނެވެ. ކުރީގެ ނާއިބް ރައީސާ ވަރަށް ގާތްއެކުވެރި ބޭފުޅަކު ރަޖިސްޓްރީ ކުރި ސިޔާސީ ޕާޓީއެއްގައި ޕާޓީގެ އެންމެ ފުރަތަމަ މެމްބަރަކަށް އަދީބު ކޯޓްފަޓްލޫނުގައި އިންނަވައިގެން ސޮއިކުރެއްވިކަމަށް ރާއްޖޭގެ ހުރިހައިނޫސްތަކެއްގައި ޝާއިއުކުރި ޚަބަރެކެވެ.

އަދީބު ޖަލުގައި އޮންނެވިއިރު ލޮލުގެ ވަރަށް ނުރައްކާތެރި ބައްޔެއްކަމަށްވާ ގުލަކޯމާ ކިޔާ ބައްޔެއް ޖެހިގެން އެބައްޔަށް އެކަށީގެންވާ ފަރުވާ ނުދެވިގެން އަދީބުގެ އާއިލާއިން ކަންބޮޑުވެގެން އުޅުނު ޚަބަރުތަކެއް ނޫސްތަކުގައި ޖެހި ހަދާނެއް ވިއެވެ.

އެބައްޔަށް ޑޮކްޓަރު ލިޔެދީފައިވާ ބޭސްސިޓީ ފެނުނުކަމަށް ބުނާ މީހަކު ސޯޝަލް މީޑިއާގައި އެވާހަކަ ދައްކާލީއެވެ. އެސިޓީގައި ޑޮކްޓަރު ލިޔެދެއްވާފައިވާ އެއްބޭހަކީ ފަރުވާއަކަށް ސިޔާސީ ޕާޓީއަކަށް ސޮއިކުރެއްވުމޯއެވެ. އެހެންވެ ވިޔަފާރިވެރިންގެ ޖަމްއިއްޔާގެ ރައީސް އިލެކްޝަންސް ކޮމިޝަނަށް ބޭސް ސިޓީ ހިފައިގެންގޮސް އެތަނުން އާސިފް އަތަށް ދިންއެއްޗެއްދީގެން އަދީބުކައިރިއަށް އައީމާ އެންމެ ފުރަތަމަ ޕާޓީގެމްބަރުކަމުގައި ސޮއިކުރި މީހާއަށް ވާން އަވަހަށް ސޮއިކޮށްލެއްވީއެވެ. ޕާޓީއަށް ސޮއިކުރުމުގެ ކުރިން ކިޑްނީ އޮޕަރޭޝަނެއް އައިޖީއެމްއެޗްގައި އަދީބްކޮށްފައިވެއެވެ. ލަވަކިޔާއިރު ފެންނަފެނުމަށް ހާލު މިހާރު ވަރަށް ރަނގަޅެވެ.

މިވާހަކަކޮޅު އަޅުގަނޑު މިގެނެސްދިނީ އަޅުގަނޑުމެންގެ ގައުމުގެ އަދުލް އިންސާފު ގާއިމުކުރުމުގައި އައިސްފައިވާ އެކްސްޓްރާ އޯޑިނަރީ ކުރިއެރުމުގެ ދަޑިވަޅެއް ހަނދާންކޮށްލުމުގެ ގޮތުންނެވެ. ދުނިޔޭގައި ދިވެހި ރާއްޖެ ފިޔަވައި އަޅުގަނޑުމެން މިދެކޭގޮތަށް މަތީ ފެންވަރުގެ ކުށްވެރިން ހުކުމް ތަންފީޒުކުރަން ޝަރަފްވެރިކަމުގެ ގޮތުގައި މުޖްތަމައަށް ނެރޭ ގައުމެއް އޮންނާނެތޯއެވެ. ކުށްވެރިވެގެން ޖަލުގައި އޮންނަވަނިކޮށް އެގެނެއިގޮތަށް ގެނެސް ރައީސުލްޖުމްހޫރިއްޔާ އެމީހަކަށް މިނިސްޓަރުކަން ދެއްވުމުން އިންސާފު ގާއިމުކުރެވުނީއެވެ.

އަހުމަދު އަދީބަކީ މިސާލެކެވެ. ރާއްޖޭގެ ރައީސުލްޖުމްހޫރިއްޔާ އަވަހާރަކޮށްލުމުގެ ކުށްސާބިތުވެ ރާއްޖޭގައި ދައުލަތުގެ މުދަލުން ހިންގާފައިވާ އެންމެ ބޮޑު ވައްކަމުގެ ކުށް ސާބިތުވެ ޖަލަށްލުމުން ރަށުތެރެއިން ގޮވާމީހަކު ގޮވާލާފައި ބުނަންވީ އޭނާ ދޫކޮށްލަންވީއެވެ.

އަދީބް ދޫކޮށްލަން ރައީސް މުހައްމަދު ނަޝީދު ގޮވައިލެއްވިއެވެ. ޝައިޚް އިމްރާން ގޮވާނުލައްވާތޯއެވެ. ސުޕްރީމް ކޯޓުގެ އާދަޔާއި ޚިލާފް ކުއްލި ނިންމުމެއްގައި އޭނާ ދޫކޮށްލި ދަނޑިވަޅު ރައީސް މައުމޫން މަރުހަބާ ވިދާޅުވިއެވެ. އަދީބްގެ ދީލަތިކަން ތަޖުރިބާކުރެވުނު ޕާލަމެންޓް މެމްބަރުންވެސް އޭނާ ދޫކޮށްލުމަށް ހަރުއަޑުން ގޮވާލިއެވެ.

މިހުރިހާ ގޮވާލުންތަކުގެ އަޑުގަދަވެގެންގޮސް ކަރެކްޝަނުން އޭނާގެ ބަލިހާލަށްޓަކައި ދުލެއް ދެއްވުމުން ލަވަކިޔައި ސިޔާސީކަންކަމުގެތެރެއަށް އެބުރިވަޑައިގަތުމުގެ ފުރުސަތު ލިބުމަކީ ކިހާބޮޑު އުފަލެއްތޯއެވެ.

ދިވެހި ރާއްޖޭގެ ރައީސުލްޖުމްހޫރިއްޔާއަކު މަރާލަން ރާއްޖެއައި ބިދޭސީއަކު ދޫކޮށްލިގޮތަކީވެސް ސުވާލު ނުއުފެދޭވަރުގެ ކަމެއް ނޫނެވެ. ރިޔާސީ އިންތިޚާބުގެ ކެމްޕެއިން ދުވަސްވަރު ރައީސް މުހައްމަދު ނަޝީދު ސްރީލަންކާގެ ޓީވީއަކަށް އަރާވަޑައިގެން ވާހަކަފުޅުދައްކަވަމުން، އެމްޑީޕީއަށް ވެރިކަން ލިބުމާއެކު އެމީހާ ދޫކޮށްލާނެކަމުގެ ޔަގީންކަން އެމީހާގެ އާއިލާގެ މީހުންނަށް ދެއްވާފައި ވެއެވެ.

ރައީސް އަބްދުﷲ ޔާމީން އަވަހާރަކޮށްލުމަށް އުޅުނަސް ވަރިހަމައެވެ. އޭނާ ދޫކޮށްލާނެއެވެ. ކަންވީ އެހެންނެވެ. އެމްޑީޕީއަށް ވެރިކަން ލިބުމާއެކު ކޯޓުން އެމީހާ ދޫކޮށްލުމުން ހެމުންހެމުން ރަށަށްދިޔައީއެވެ.

ރައީސް އަބްދުﷲ ޔާމީން އަވަހާރަކޮށްލުމުގެ ކުށް ސާބިތުވެފައިވާ އަހުމަދު އަދީބާއި އަދި ހަތިޔާރުން ހަމަލާދީގެން ޔާމީން އަވާރަކޮށްލަން އުޅުނު ސްރީލަންކާގެ މީހާ ދޫކޮށްލުމުގެ ފަހަތުގައިވަނީ ރައީސް އަބްދުﷲ ޔާމީންގެ ހިތުގައި ޖެއްސުމެވެ.

އިއްޔެ ޔާމީންގެ ސިޔާސީ ވާދަވެރިންގެ ހިތުގައި ޖެހުނީއެވެ. މިއަދު ޔާމީންއާއި އަދި އަނބިކަބަލުންނާ، އަނބިކަބަލުންގެ އާއިލާގެ މެމްބަރުން ދަތުރުކުރި އުޅަނދު ގޮއްވާލުމުގެ ފަހަތުގައި ހުންނެވި ބޭފުޅާއަށް ޖަލުންބޭރުކޮށް މިނިވަންކަންދީގެން ޔާމީންގެ ހިތުގައި ޖައްސުވާލެވުނީއެވެ. އިންސާފަކީ މިފަދަ އެއްޗެކެވެ.