އީރާންގެ ރިޔާސީ އިންތިހާބު: އެއްވެސް ކެނޑިޑޭޓަކަށް މެޖޯރިޓީއެއް ނުލިބުނު، ދެވަނަ ބުރު ޖުލައި 5 ގައި

އީރާން ގައި ކުރިއަށްދިޔަ އެގައުމުގެ ރިޔާސީ އިންތިހާބުގައި ވާދަކުރި އެއްވެސް ކެނޑިޑޭޓަކަށް މެޖޯރިޓީއެއް ލިބިފައިނުވާތީ، އިންތިހާބުގެ ދެވަނަ ބުރަކަށް ދާން ނިންމައިފިއެވެ.

ދަތުރުކުރެއްވި ހެލިކޮޕްޓަރު ވެއްޓި މިިދިޔަ މަހު ހިނގި ހާދިސާއެއްގައި އީރާނުގެ ރައީސް ކަމުގައި ހުންނެވި އިބްރާހިމް ރައިސީ އަވަހާރަވުމާއި ގުޅިގެން އައު ރައީސަކު ހޮވުމަށް ބާއްވާ މި އިންތިހާބުގައި ވާދަކުރެއްވީ އެގައުމުގެ ކުރީގެ ނިއުކްލިއާ ނެގޯޝިއޭޓަރު ސައީދު ޖަލީލީ އާއި އީރާނުގެ މަޖިލީހުގެ ރައީސް މުހައްމަދު ބަޣްރު ޤާލިބާފް ގެ އިތުރުން މަސްއޫދު ޕެޒެޝްކިއަން އާއި ކޮންޒަވޭޓިވް އިސްލާމިކް ލީޑަރު މުސްތަފާ ޕައުރްމުހައްމަދީއެވެ.

މިދިޔަ ހުކުރު ދުވަހު ކުރިއަށް ދިޔަ މި އިންތިހާބު ކާމިޔާބު ކުރުމަށް ކެނޑިޑޭޓުން 50% އަށް ވުރެ ގިނަ ވޯޓް ހޯދަން ޖެހުނު ނަމަވެސް، އެންމެ ގިނައިން ވޯޓް ލިބިވަޑައިގެން ދެބޭފުޅުން ކަމަށްވާ މަސްއޫދު ޕެޒެޝްކިއަން އަށް 10.41 މިލިއަން (42.5%) ވޯޓް ލިބުނު އިރު، ސައީދު ޖަލީލީ އަށް ލިބިވަޑައިގަތީ 9.47 (38.6%) ވޯޓެވެ.

މި އިންތިހާބުގައި މުހައްމަދު ބަޣްރު ޤާލިބާފް އަށް 3.38 މިލިއަން ވޯޓް ލިބިވަޑައިގެންއިރު، މުސްތަފާ ޕައުރްމުހައްމަދީ އަށް ލިބިވަޑައިގަތީ 206,397 ވޯޓެވެ.

އެއާއިއެކު، މި އިންތިހާބު ސުޕަވައިޒް ކުރާ އިންޓީރިއާ މިނިސްޓްރީން ވަނީ އަންނަ މަހުގެ 5 ވަނަ ދުވަހު އިންތިހާބުގެ ދެވަނަ ބުރު ބޭއްވުމަށް ނިންމާފައެވެ. މި ބުރުގައި ވާދަކުރާނީ އެންމެ މަތިން ވޯޓް ލިބުނު މަސްއޫދު ޕެޒެޝްކިއަން އާއި ސައީދު ޖަލީލީއެވެ.

އެ މިނިސްޓްރީން ބުނީ، އިންތިހާބުގައި ވޯޓްލުމަށް ޝަރުތު ހަމަވާ 61 މިލިއަން މީހުން ތިބި ނަމަވެސް އޭގެ ތެރެއިން ވޯޓްލައިފައިވަނީ އެންމެ 40% މީހުން ކަމަށާއި، މިއީ 1979 ގެ ފަހުން އެގައުމުގެ އިންތިހާބެއްގައި އެންމެ މަދުން މީހުން ވޯޓްލީ ފަހަރު ކަމަށެވެ.

މި އިންތިހާބުގައި ވޯޓްލުމަށް އީރާނުގެ އެކި ސަރަހައްދުތަކުގައި ޖުމްލަ 58،640 ވޯޓު ފޮށި ބަހައްޓާފައިވާއިރު އޭގެ ތެރެއިން 6،000 އަށް ވުރެ ގިނަ ވޯޓު ފޮށި ހުރީ ީރާނުގެ ވެރިރަށް، ތެހެރާންގަ އެވެ. އޭގެ އިތުރުންވެސް، އެގައުމުން ބޭރުގައި ވެސް 344 ވޯޓުލާ މަރުކަޒެއް ވަނީ ކަނޑައަޅާފައެވެ.