ޤައުމިއްޔަތަށް ޚިދުމަތްކުރުމުގެ ޝަރަފް ހއ.އުތީމު ރައްޔިތުނަށް ރައީސުލްޖުމްހޫރިއްޔާ އަރުވައިފި

ދިވެހި ޤައުމިއްޔަތަށް ޚިދުމަތްކުރުމުގެ ޝަރަފް، ހއ.އުތީމް ރައްޔިތުންނަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު އަރުވައިފިއެވެ.

އުތީމް ރައްޔިތުންނަށް މި ޝަރަފް އަރުވާފައިވަނީ ޤައުމީ ދުވަހުގެ މުނާސަބަތުގައި މިއަދު އެރަށުގައި ބޭއްވި ރަސްމިއްޔާތުގައެވެ.  ޤައުމިއްޔަތަށް ޚިދުމަތް ކުރުމުގެ ޚާއްޞަ ޝަރަފު، ހއ.އުތީމުގެ ރައްޔިތުންނަށް އެރުވުމަށް ރައީސް ޑރ. މުޙައްމަދު މުޢިއްޒު ނިންމެވީ އުތީމު ގަނޑުވަރު ބެލެހެއްޓެވުމުގައި، އެރަށު ރައްޔިތުން އަދާކުރައްވައިފައިވާ ދައުރާއި، އެކަމަށް ދެއްވި އަހައްމިއްޔަތުގެ އަގު ވަޒަން ކުރެއްވުމުގެ ގޮތުންނެވެ.

އުތީމް ރައްޔިތުންގެ ފަރާތުން މި ޝަރަފާ ހަވާލުވެ ވަޑައިގެންނެވީ، އުތީމް ކައުންސިލްގެ ރައީސް ޢަބްދުﷲ ރަޝީދެވެ.

އުތީމްގެ ރައްޔިތުން ވަނީ ބޮޑުތަކުރުފާނަށް ނިސްބަތްވެ ވަޑައިގަންނަވާ އެ ގަނޑުވަރު 500 އަހަރަށްވުރެ ގިނަދުވަހު ބަލަހައްޓާފައެވެ. އުތީމް ގަނޑުވަރަކީ އައްސުލްތާން އަލް ޣާޒީ މުހައްމަދު ތަކުރުފާނުން އައުޒަމް އުތީމު މަހާރަދުންގެ ޢާއިލީ މައިފުނަގެއެވެ. ރަސްކަމުގެ ތަޚުތުގައި އިށީނދެވަޑައި ގަތުމުގެ ކުރިން އެ ތަކުރުފާނު އުތީމުގައި ދިރިއުޅުއްވި ގެކޮޅެވެ.

އުތީމު ގަނޑުވަރަކީ ރާއްޖޭގެ އާސާރުތަކުގެ ތެރެއިން އެންމެ ރަނގަޅަށް ބަލަހައްޓާ އެއް ތަނެވެ. އުތީމް ރައްޔިތުން އެތަން ބަލަހައްޓަމުންގެންދަނީ އެރަށު ރައްޔިތުންގެ އަމިއްލަ ތަނެއްގެ ގޮތުގައެވެ. އެގޮތުން އުތީމް ގަނޑުވަރުގެ އެކި ކަންކަމަށް ސަރުކާރުން ފޮނުވާތަކެތި ވަރަށް އަމާނާތްތެރިކަމާއެކު އުތީމްގެ ރައްޔިތުން ބަލަހައްޓަވާކަން ސަރުކާރުތަކުން އަބަދުވެސް ފާހަގަކުރެއެވެ.