ފިތުރު ޒަކާތުގެ ގޮތުގައި 15 މިލިއަން ރުފިޔާ؛ ޣައްޒާ އަށް ކާބޯތަކެތި ފޯރުކޮށްދޭން 500،000ރ. ހަދިޔާކޮށްފި

މި އަހަރު ފިތުރު ޒަކާތުގެ ގޮތުގައި ލިބުނު 15 މިލިއަން ރުފިޔާގެ ތެރެއިން 500،000ރ. ޣައްޒާ އަށް ކާބޯތަކެތި ފޯރުކޮށްދޭން އިސްރާ އެސޯސިއޭޝަނާއި ރޭ ހަވާލުކޮށްފިއެވެ.

ޒަކާތު ހައުސް އިން ބުނީ ފިތުރު ޒަކާތުގެ ގޮތުގައި މި އަހަރު ޖުމްލަ 15،009،749ރ. ލިބިފައިވާ ކަމަށެވެ. އެއީ މިދިޔަ އަހަރު ފިތުރު ޒަކާތުގެ ގޮތުގައި ލިބުނު ފައިސާ އަށް ވުރެ 10.6 އިންސައްތަ އިތުރު އަދަދެކެވެ.

މީގެ އިތުރުން އެ އިދާރާ އިން ބުނީ، ‏ދަތި ހާލުގައި އުޅޭ ދިވެހިންނަށް އެހީވުމަށް ސޯޝަލް މިނިސްޓްރީގެ އިޖުތިމާއީ ޓްރަސްޓް ފަންޑަށް އެހީތެރިކަން ފޯރުކޮށްދިނުމުގެ ގޮތުން ރޭ 423,749ރ. ރުފިޔާ އެ މިނިސްޓްރީއާ ހަވާލުކޮށްފައިވާ ކަމަށެވެ.

ރާއްޖޭގައި ފިތުރު ޒަކާތުގެ ގޮތުގައި ފަޤީރުންނާއި މީސްކީނުންގެ ކޮންމެ މީހަކަށް 6،000ރ. މި އަހަރު ވަނީ ދީފަ އެވެ. ފަޤީރުންނާއި މީސްކީނުންނަށް ޖުމުލަ ބަހާފައި ވަނީ 13،896،000ރ. އެވެ.

މިއީ ރާއްޖޭގައި މިހާތަނަށް ހަމަހަމަކޮށް ފިތުރު ޒަކާތް ބެހުމުގައި، ބޮލަކަށް އެންމެ ގިނަ އަދަދަކަށް ފިތުރު ޒަކާތް ލިބުނު ފަހަރެވެ.