ނުކުޅެދުންތެރިކަން ހުންނަ 356 މީހަކަށް ވަޒީފާގެ ފުރުސަތު ތަނަވަސްކޮށްދެވިއްޖެ: ވަޒީރު

ނުކުޅެދުންތެރިކަން ހުންނަ 356 މީހަކަށް ވަޒީފާގެ ފުރުސަތު ތަނަވަސްކޮށްދެވިފައިވާ ކަމަށް އިޖުތިމާޢީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

އިޖުތިމާޢީ ތަރައްޤީއާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު އާއިޝަތު ޝިހާމް ވިދާޅުވީ، ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ހޯދައިދިނުމުގެ ކަންކަން ކުރިއަށް ގެންދަނީ އެ ފަރާތްތަކުގެ ޢާއިލާއާ ގުޅިގެން ކަމަށެވެ.

އެގޮތުން ދާދިފަހުން އަޅުގަނޑުމެންނަށް ކުރެވުނު މަސައްކަތްތަކުގެ ތެރެއިން، މިއަދާ ހަމައަށް 356 ނުކުޅެދުންތެރިކަން ހުންނަ ފަރާތްތައް ވަޒީފާއާ ހަމައަށް ދެވިފައި،

ވަޒީރު ޑރ. ޢާއިޝަތު ޝިހާމް

ވަޒީރު ވިދާޅުވިގޮތުގައި، ނުކުޅެދުންތެރިކަން ހުންނަ ފަރާތްތަކަށް ވަޒީފާ ދެވިފައިވަނީ އަތޮޅުތަކުގެ ކައުންސިލްތަކާ، އޮފީސްތަކާ، ސިވިލްސާވިސް ކޮމިޝަނާ ގުޅިގެން މަސައްކަތްތަކެއް ކޮށް، އެތަންތަނުގެ މީހުން ނުކުޅެދުންތެރިކަން ހުންނަ މީހުންނާ މުޢާމަލާތްލުރާނެ ގޮތާ، ބަލަހައްޓާނެ ގޮތުގެ ތަމްރީނުވެސް ދެވިގެން ކަމަށެވެ.

މީގެ އިތުރުން ކެއާ ސޮސައިޓީއާ ގުޅިގެން ”ޖޮބް ރެޑިނަސް“ ނަމުގައި ތަމްރީނުތަކެއްވެސް ކުރިއަށް ގެންދާކަން ވަޒީރު ފާހަގަކުރެއްވިއެވެ. އެ ތަމްރީނު ތަކަކީ، ނުކުޅެދުންތެރިކަން ހުންނަ މީހުން އެމީހުންގެ މައިންބަފައިންގެ ކައިރީ ތިބުމަށްފަހު ވަޒީފާއަށް ދާއިރު، އެމީހުންނަށް އެކަނި އުޅުމަށް ތަމްރީނު ކުރުމަށް ކަމަށްވެސް ވިދާޅުވުއެވެ.

އެގޮތުން މިހާތަނަށް 22 ނުކުޅެދުންތެރިކަން ހުންނަ މީހުން މިހާރު އެ ތަމްރީނު ފުރިހަމަ ކޮށްފައިވާކަން ވަޒީރު ފާހަގަކުރެެއްވިއެވެ.